«АЙРЫШТА БЗИ ХІАБАШВЫРБА!»

Лермонтов Михаил йыхьыз зхъу Ставрополь край анаука библиотека апны урышв бызшвала йгІацІцІыз Мыхц Кьарим йуысаква разкІкІра рпрезентация акІвшатІ. Афилология наукаква рдоктор, апрофессор ЧкІала Петр ауи йалаз аршІыйагІв йынцІра-бзазара йахайыргІвазатІ, йуысара алкІгІараква дрыквгІашІастІ. Апхьахьа йшихІвазла, Мыхц Кьарим йгІвыраква йырзынархата йгІацІцІхьаз анаука нхараква 200 йайхІапІ, ауат рпхьадзара йалапІ 4 монографиякІ. ЧкІала Петр «Возвращаюсь» азкІкІра йаншвалыз ауысаква рсатырцІахьква йара йырхъйатІ, атакІра йадынхалыз ауысагІв Галамага Андрейи йари шацынхаз даквгІашІастІ, агІацІщтра йацхърагІаз «Алашара» адкІыларагьи ажва пха щарда рзынайырхатІ. Апрезентация анакІвшуз йгІачважваз зымгІвагьи Ставрополь край «Абаза» уагІахъа-культура автономия йалу уыс бзи щарда шакІвдыршауа гІархІватІ. «Бзибара» зхьзу чкІвыныргІа радкІылара абаза уысагІв Мыхц Кьарим йысквш 70 йапылуата йадыргалыз «Айрышта бзи хІабашвырба» флешмоб йацызкІыз рпхьадзара рыцІа-рыцІа йщардагІвхитІ. АшІаква радкІылара аунашвачпагІв Тхагалегова Айза йшылхІвазла, Кьарим йуысаква абаза йгьи урышв бызшваквала йгІарыпхьатІ ахІбачва, йапшым аъачІвагІагІвчва, астудентква, апхьагІвчва. МызкІи бжакІи руацІала афлешмоб йгІалалыз Ставрополь, Кисловодск, Къарча-Черкес, Апсны абзазагІвчва 65-гІвы йрайхІахатІ, йаъапІ Мыхц Кьарим йуысаква йшрызгвалымсым тгІачвала йгІазырбазгьи. Асоциальна сеть апны афлешмоб тшахазыргІвазаз зыкь 83-гIв йрайхIапІ. Тхагалегова Айза абиблиотека йгІадгылыз асасчва афлешмоб йалаз уыса йшгІапхьауа гІазырбауа ароликква йрыхалыргІвазатІ. Кисловодск город абзазагІв шІа, й-10-хауа акласс апхьагІв Чагва Сабина Мыхц Кьарим йуыса дшгІапхьаз йаздзыргІвыз 1170-гІв йнадзитІ, абаза театр актер Ныр Мурадин, АлбыргІан кыт апхьарта арыпхьагІв Къвач Айщат, Черкесск город йаныргІалу апедколледж астудентка Пщмахва Лиана, Апсны абзазагІв Делба Камила йрыздзыргІвызгьи рыцІа йыгьмачІым. Афлешмоб гІазхъвыцыз, йадызгалыз Ставрополь край «Абаза» уагІахъа-культура автономия аунашвачпагІв Чагва Армида йгьи йацызкІыз зымгІвагьи АлахІ дырзыразхатІ. Ауи амаль джьащахъва абзирала Мыхц Кьарим йыршІыйара йахагІвазу рпхьадзара агалагьи йалахIатI. Араъа йгІалкІгІара атахъыпІ рыцІа йахІбата афлешмоб йалаз сквш 79 дшырту, ауи РФ-ла гIатгара зму акультура анхагІвы Къвырча Владимир йакІвпІ, рыцІа йайцІбадзу хвысквша йырту ХІашвцІа Элина Черкесск город дбзазитІ. Ставрополь край «Абаза» уагІахъа-культура автономия апредседатель Чагва Армида йшылхІвазла, Мыхц Кьарим йуысаква рсатырцІахьква йрыдынхалыз ЧкІала Петр, ауысагІв Галамага Андрей йгьи «Возвращаюсь» книга гІацІызщтыз «Алашара» адкІылара аъачІвагІагІвчва швабыжта дырзыразпІ. Ауи йшгІалылкІгІазла, афлешмоб йгІалалыз уысата йгІазпхьаз 125 йнадзитІ. Ауат ауысаква рпроцент 25 урышв бызшвала йатаркІыз йрыуапІ. Аурышвква, акъарчаква, ачеркесква, анагІвайква, абазаква адызкІылыз Мыхц Кьарим йуысара афилософия ацІолара ужвыгьи зны йаквшахІатхатІ. АпхьагІвчва гІазпхьаз ауысаква анырцІарныс йырцхърагІаз ан-абачвагьи уыс ду акІвдыршатІ. Дасу йунагІва дшыгІвназ уыса йгІапхьан, хІсайт йазыгІарщтихтІ. Ауи йапшу аъаща абазаква хІуыжвгІанчІви заман йгІалалыз ашІыцраква шрызгІарысабапуа йаквшахІатхитІ. Мыхц Кьарим йгІарикви йъахІыльчви хІфлешмоб йъацыркІыз ахъазла швабыжта хІырзыразпІ. АуысагІв йахщчва КІвращын Любовь, ШенкІауа Марйан,класскІ йыцапхьаз, дызцгІадзынгылыз ШенкІауа Абдул гІазпхьаз Кьарим йуысаква йрыздзыргІвыз рпхьадзара швабыжта йщардапІ. Апрель а 11 афлешмоб ацIыхъва йнадзатI. Къарча-Черкес, Апсны, датшагьи шIыпIа щарда йауата ауи йалалыз апхьагIвчви астуденткви гьмачIгIвым. АуысапхьагIвчва йрыздзыргIвыз рпхьадзара зкьы 130 йнаднацалтI. Афлешмоб агIарбараква Ставрополь край анаука библиотека апны апрель а 24 йгIарпхьадзахуаштI.