Айраннынъ байрамында

Карашай-Шеркеш Республикасынынъ Басшысы Рашид Темрезов аьр йыллык 7-нши регионлар ара «Медовый водопадларда айран байрамы» карашайбалкар халкынынъ маданиятынынъ фольклорэтнографиялык фестивалининъ торжестволы ашылувында катнасты. Фестивальдинъ калыбында декоративли-ялгама затларынынъ, таза фермер продуктларынынъ выставкасы уйгынланган эди. Конаклар карашай-балкар асларынынъ даьмин карадылар, миллет кийимининъ, аьдеттеги халк каьрлерининъ (ремесла) эм халк фольклорынынъ презентациясын коьрдилер. КЧР Басшысы сыйлы конаклар ман, олардынъ санында: туризм бойынша Федераллык агентствосынынъ етекшисининъ орынбасары Николай Королев, КЧР Халк Йыйынынынъ (Парламентининъ) Председатели Александр Иванов, КЧР Правительствосынынъ агзалары, республикадынъ Парламентининъ депутатлары, Карашай-Шеркеш ерининъ мусылманларынынъ муфтийи Исмаил-аьжи Бердиев, Кисловодск курорт-каласынынъ басшысынынъ орынбасары Александр Данилов, ямагатшылык организацияларынынъ эм диннинъ элшилери, туристлик комплексининъ еринде орынласкан этнографиялык музейди йокладылар. Музейде Карашай-Шеркеш эм Кабарты-Балкар юртларыннан катнасувшылардынъ коллары ман аьзирленген «Усталар каласы» деген декоративли-ялгама оьнершилигининъ ярмалык-выставкасы орынласкан эди. Комплекстинъ директоры Мусса Боташев конакларга туристлик комплекс акында хабарлады. «Байрамнынъ катнасувшыларынынъ географиясы кенъеетаганы эм онда катнасатаган аьдемлердинъ саны оьсетаганы кувандырады. Фестивальдинъ келеектегиси бар болувына ыйнанаман», – деди фестивальдинъ торжестволы ашылувында КЧР Басшысы Рашид Темрезов. Ол амалламадан алдын аьлиги замангы онъайлы йолдынъ ашылувы туркомплексте оннан да артык конакларды йолыгып алмага амал береегин эске алды. «Сондай болып йолдынъ ашылувы кишкей эм орта бизнестинъ оьрленуьвине эм оьзлик эпшиллик аьрекетти юргистпеге амал береек. Сол зат Кишкей Карашай районынынъ оьрленуьвине себебин тийдиреегине берк сенемен», – деп белгиледи Рашид Темрезов. Туризм бойынша Федераллык агентствосынынъ етекшисининъ орынбасары Николай Королев баьри йыйылганларды йол туьзилисининъ маьнели объектининъ кулланувга берилуьви мен кутлады. «Соьзсиз де, КарашайШеркеш юрты оьзининъ маданият, табиат мырсатлары ман бай, ама олардынъ ишинде энъ маьнелиси – тамак азык продуктлары. Ол айлак ярасык, оьзиншеликли тамак азык туьри. Мен онынъ даьмин алганман эм айтайым, ол айлак даьмли», – деди Николай Королев. Туьзилген аьдетке коьре, этнографиялык фестивальдинъ уйгынлавшылары бурынгы рецепт пен 500 литр эмлев ишимлигин-айранды аьзирледилер. Сол уьйкен савыттан фестивальдинъ юзлеген конаклары айраннынъ даьмин алдылар. Айраннынъ эмлев болымлыклары фольклор-этнографиялык фестивальдинъ озгарылувына, тавлы халклардынъ оьзиншеликли маданиятларын саклавга эм оьрлендируьвге себеп боладылар.