АЙГВАРИ АЩТАНЫКЪВАРИ РАНКЪВАКЪВРА

Февраль ацIыхъва Черкесск город «АдзыгIвбжьа ЙачIва» культуратшпсщара парк йаныргIалу «Юбилейный» спорт дворец апны Совет Союз архъвква Афганистан йгIатырдахищтара йцIыз асквш 30 йазынархата гандболла анкъвакъвра акIвшатI. «Единая Россия» политика партия КЧР-ла ахъвшара, физкультурали спортли КЧР а-Министерства, Афганистан айсра аныкъвадыкъваква рыжвлара организация КЧР-ла ахъвшара, гандболла ареспублика спорт апхьарта йадыргалыз анкъвакъвра апны Краснодар, Ставрополь крайква йгIартыцIыз, Къарча-Черкес йауу агIкомандакI тшгIадырбатI. ЙцIасхаз анкъвакъвра ангIахъыртIуаз йгIачважватI «Единая Россия» партия КЧР-ла ахъвшара а-Исполком аунашвачпагIв йхъвдаквцIараква зырхъйауа Джамбаев Руслан, гандболла ареспублика спорт апхьарта адиректор Цекъва ХIасана, ажвлара организацияква ргIащтийыгIвчва, Афганистан айсра аветеранква. Анкъвакъвра адгалагIвчва асабиква згIвадара багъьа, аспорт апны адахIвраква рзыртахъта йрайхIвахIвтI. Айгвари ащтаныкъвари зрыбагъьауа анкъвакъвра пщымшкI йакIвшатI йгьи апхъагылара Ставрополь город аспортсменква йгIатыргатI. Отрадна станица (Краснодар край) ркоманда йгIвбахауа агыларта ркIытI, Къарча город (КъарчаЧеркес) рспортсменква – йхпахауа. Анкъвакъвра йалаз агвыпква зымгIва ачIахIра грамотакви ачвахъабага согIакви рырттI. Йапхъахауа агылартаква зкIыз агвыпква акубоккви адипломкви рквнадыргатI. ЗымгIва рацкIыс бзита тшгIазырбаз асогIаквала рыхьыз рхIватI.