АЙГIАЙРА ГIАТЫЗГАЗ АНЦIРАЛА ЙБЗАЗЛУШТI

Асуд приставква йгьи «Росгвардия» КЧР-ла рунашвахъцIартаква рынхагIвчва АйгIайра йахъыцIуа асквш 74 йазынархата асаби-йыбаква ъаныргIалу МосковскIа поселок асаби Тдзы апны йакIвшаз агвыргъьахъв йдрайгватI. Асабиква асасчва рыхъазла йдрыхIазырыз концерт гIадырбатI. Ауат айсра йгIаннаршаз йнашхыйу ауысакви ашвакви анырхIвуз зыладзква гIахъххылуаз щардагIвын. «Мшы 1418 йакIвшаз айсра рыцхIагIарата ауагIа йрызгIанагыз злаузышвуш гьаъам. Айсра унагIвипхьадза йнашылтI, агIвычIвгIвыс лахьква пнатшытI, мильуанпхьадзарала уагIа аладзтI. ХIкъраль йгIагвыквсыз афашист гIакIыгIвчва городти кытти зыкь 70 айхIа аладрыхъвашатI. Агъачва пхIвысгьи, тажв-лыгажвгьи, сабигьи йырмайгьдзауа йхъырщгIун» – йбыжьгатI араъа. – АгIвычIвгIвара афашизм йачвызхчаз совет солдатква рфырра анцIрала атурых йалалтI. Ауат хI-Абашта йахъазымкIва арахьарат акъральквагьи ауи йгIашIыргатI, рхъахвитра рызгIащаквыржьтI. УахьчIва хIызлу агвыргъьахъвгьи АйгIайра гIатызгаз рыхьызква анцIрала йшбзазлуш багъьата йхъахIнарцIатI, – йхIватI Черкесск городла атынчра хчара адгалра а-УнашвахъцIарта (УОПДС) ахъвшара аунашвачпагIв йзаместитель Семенов СолтIан.