АУАГIАХЪА МАКЪЫМКВА ГIАЗХЧУШ ГIАДЗЫНЛЫРГЫЛИТI

МосковскІа поселок йтагылу асаби азъазара апхьарта «Народные инструменты» хъвшара апны амузыкант шІаква збжьауа ДАГВЖВЕЙ (ХІаткъва) Марина Мерам йпхІа лынхара швапха сквш 35 гІацІанакІитІ. Марина дъайыз ЙынджьыгьчкІвын кыт апны акультура бзазара зынгьи йшапымшвтуа, ауи атшгІва зымрычвуа ахІбачва аршІыйара чІвец айцІбачва йшрыларгауа бергьльыпІ. Маринагьи лсабихъа угІалагата ауагІахъа макъымква бзи йылбауа, анадылраква рагІан акъвабыз абжьы дхънахуа дгІадзынгылтІ. Ауи лылызбгІаз лани лаби ХІабаз музыка апхьарта дырщтитI. Ауаъа аккордеон дасуа, анота гІальма лдыруа тшылбжьатІ. ЪачІвагІа гІалхра даназынадза Черкесск музыка училища ауагІахъа ъамапсымаква рхъвшара дыцІалтІ. Дъадзапхьаз асквшква руацІа анкъвакъвра щарда рпны лазъазара гІалырбатІ, йызнымкІва дапхъагылагІвхатІ. Ауи лдиплом ангIалырт музыкала арыпхьагІвта лынхара ХІабаз акультура Тдзы апны йджвыквылцІатІ, пщысквша данынха унагІвара далалын, лылахь дъагаз Къвбина кыт йаргваныз МосковскІа поселок асабигІзарта ахвыцква музыкала асахІатква рзадылгалуа хвысквша дынхатІ. – УахьчІва съанхауа амузыка апхьарта сгвы йтамкІва сгІанагтІ. СпхІа хореография хъвшара дрыстырныс дангІазд адиректор Каспарянц Эмма Михаил йпхІа сшмузыканту зынла йгІалгвынгІвытІ. Музыка гІальма шсыму анласхІв, нхара сгІайырныс тшгІасзыналырхатІ, схъналрыхтІ. Абар ужвы йъагІадзазгьи Къвбина, МосковскІа поселок, Устьджьгваты город йгІартыцІуа асабиква аккордеон йгьи акъвабыз йасуа йызбжьитІ. Рыуа щардагІвы ауи рща йшалазжьыз багъьата йсзыхІвуштІ. Акъвабыз йапщылахаз, хІреспублика утыцІтагьи йбергьыльхаз Тластанкъвыл Владислав, ауагІа бзи йырбауа ЛагІвычв СултІан, Архагъ Роман азрыпхьаз сара сакІвпІ. Ажва аламкІва, снапІы йыцІцІыз абаза чкІвынчва рдахІвраква сдыргвыргъьитІ, – лхІвитІ арыпхьагІв дразыта. АрыпхьагIв датшагьи лхъа рыладупІ акультури азъазари рколледж йапхьауа Айсан Марйат, ЕмгІвыкъва Самира, Мамхагъ Лариса, Нальчик апны акультури азъазари рколледж дахIврала йапхьауа ХIасарокъва Амина. УахьчIва йалрыпхьауа йрыуата йгIалылкIгIитI анкъвакъвраква рпны йапхъагылагIвхауа акъвабызч шIаква Нанай Неля, Быджь Джьамильа, Дауыр Милана, Кьанджьа Тимур, Текеева Милана, зыршІыйара джвыквызцІагІвацауа Асанай Адам. – ХIзаман къвабыз бзи швабыжта йтлапIапI, айхIарагIв йгьырзыхвгIум, – лхIвитI аршIыйагIв. – Акъвабызасра кIадымрышвра, разыгIальаматра дымрыдзра ахъазла аккордеон йасрыситI. РпынхачIвы тшызлаздрыхIазыруагьи ауи амузыка ъамапсыма акIвпI. Аккордеон аквцIаква ращтацаща акъвабыз йаквшвитI. Ауи ахъазла аккордеонква йтлапIамкIва йрызгIасауамца тшрыларбжьитI. Марина хIшахалыргIвазазла, щардагIвы йхпахауа акласс йанцара амщтахь оркестр йаларжьитI. КЧР-ла гIатгара зму артист Згонников Анатолий Алексей йпа унашва зхъицIауа оркестр рымапI. МартI а 13 Черкесск йакIвшаз ансамблькви аоркестркви ранкъвакъвра апны йапхъахауа агыларта гIатыргатI. Асабиква гIвыджьта, хгIвыта ауагІахъа музыка ъамапсымаква йгІарыстI, уадыргIвана оркестртагьи йгIахъвмартI. «Сувенир» зхьзу арыпхьагIвчва роркестр арепертуар ауагIахъа макъымква аналу, лара лакІвпІ акъвабыз йасуа. Ауи йахъазымкIва Устьджьгваты город амузыка апхьарта апынгьи «Жемчужины Кавказа» хореография гвып концертмейстерта дынхитI. – Апрограмма амаль амамкІва йалапI аклассика музыка, Бах, Моцарт ргIвыраква нотала йасуа йызбжьитI. Пщысквша нотала йахIрыпхьитIта, йхвбахауа акласс йанцара мчыбжьыкI апны зны нотадъа амакъым шыргвныркIылуа апшта акъвабыз йгIатырщтырныс хвитнагIа гIахIнатитI. Ауи агIан асабиква къвабызасрала ртехникагьи щатакI йтагылхьатI, рымачвчкIвынквагьи азыхIазырпI, ркъаругьи рыцIа йбагъьахитI, амузыкагьи рахIа бзита йгIаргвынгIвуа йцитI. Амузыка апхьарта санапхьузгьи, аучилища саныцIаз агIангьи йазалху уагIахъа къвабыз гьаъамызтI. Аучилища апны Гваджьа Галина Бесльан йпхIа акъазан къвабызквала акIвын йызлалбжьуз. Сара аккордеонын сызсуаз. ЙыздырхитI Галина Бесльан йпхIа «Марина, сахьыла бгIахъысх. АуагIахъа макъымква ауи аъара бзи йббауата ачIвыйа аклассика музыка тшзадбкIылыз?» – шгIасалхIвлуз. Ауи акъвабызчква ъалбжьуз акласс санагІвсуаз сгIашIасуанта срыздзыргIвуан. Сынхауа саналага рыцIа сызрыгIапсуз абаза макъымквала анотаква йгIвыта йъахIымамыз акIвпI. Амакъымква рнотаква сарасара йызгIвыхуан. Осетия, Къабард-Балкъар сцауамца йгIасауазла сынхара адызгалуан. УахьчIвала сабита 17-гIв сызгIайитIта, хгІвы ракІвмызтын, арахьарат зымгІва абазапІ, ауи швабыжта сайгвыргъьитІ. Ауат ауагІахъаква рмакъымква злапшым, йгІарныцІуа, агІаншара йаквшвауата йшгІалухуаш йырзызбжьауата абаза макъымква, ауарадыжвква йрызсрыдзыргІвитІ. Ауи магІын ду амата йспхьадзитІ. Йауа ухІварыквын, ауат ацауымкІуата, йгІанзыршаз ауагІаква акъвабыз йшгІатырщтуаз апшбыргта урысра атахъыпІ. Ауи акІвмызтын, абаза макъымква арахьарат ауагІахъаква йрыладзхуаштІ, йыгьхІзыгІахчушым, – лхІвитІ амузыкант. Ари арыпхьагІв лынхара апны йгІалрысабапуа амузыкадырыгІв бергьльы, афольклорист, акомпозитор Гваджьа Галина Бесльан йпхІа ауагІа макъымквала лазкІкІраква швабыжта йшгІалцхърагІауа лхІвитІ. Ауат йрыуапІ «Абазашта ашваква», «Акъвабызч шІа» «Апхьарца», «Ауарадква – сгвы гІазырпхауа». Марина йшгІалылкІгІауала, ауат азкІкІраква хвы рыквцІауачвапІ, йрыншвалыз ауагІахъа ашваква йгьи агІахІвра макъымква анотаква рыцпІ. Нота здыруа дзачІвызлакІгьи амакъымква рквпшыра йымрыдзуата ауагІа йрылайгарныс йылшуштІ. Ауи акІвпІ Марина Мерам йпхІа лара лхъатала дыззынхауа. АршIыйагIв луыс щарда цІуата дазъазахазтІхІва, лъачІвагІадырра рыцІагьи йъалалырхІуш акурсква дымцауата йгьагІвылщтуам. Щарда мцІуата Краснодар аъачІвагІагІвчва зылшараква ахъарысу асаби-ныкъвадыкъваква йрыуата аккордеон тшазызбжьара зтахъу ушрыдынхалуашла хІышта апны йадыргалыз акурсква даъан. ЙагІвсыз асквш агІан Нальчик апны культурали азъазарали аколледж йгьи аинс-титут ръачІвагІагІв хъада Кожева Мадина Анзор йпхІа йакІвлыршаз арыпхьара сахІатква цхърагІара дута йшылзалыз лхІвитІ. Ауи асеминаркви амастеркласскви дырхъысуата асабиква рыдынхалрала луыс рахIагьи дазъазахитІ. Йшылрыбагъьауала, ужвы ари асахІат хІреспублика акъвабызчквала йшадгалу гьгвымхам, йгьи ауи дайгвыргъьитІ. Марина лгІвыпхІчвагьи лара йалрыпхьатІ, агІвыджьгьи къвабыз бзита йаситІ. АхІба Юлия ауи анархарала аколледж дангІалга сквшпхьадзара лан длыцта асабиква дрыдынхалтІ. Ужвы ари асахІат айсра ъачІвагІа гІалызхыз ауи лпа дъарщтийыз Североморск тгІачвала йцахын, йбзазитІ. АйцІба Льильа датша мгІва гІалылххызтІхІва, акъвабыз гькІалрышвуам. Ауыгьи лпа айсра ъачІвагІапІ дызпхьаз, ларгьи ауи йкъвырльыкъвхара ъакІвшауа Мурманск аналог къвырльыкъвхарта апны ъачІвагІагІвта дынхитІ. Ан лыпхІчва хІуагІахъа макъымква йъану ашІыпІа хъараква рпынгьи йшдыргауа кьангьаш гьазгІалгуам. Дагвжвей Марина йхІаракІу категория зму дарыпхьагІвпІ, культурала КЧР а-Министерства, арайон УнашвахъцІарта рыртшхъвагаква лщардапІ, Къарча-Черкес къральыгIва университет лнархарала йхIаракIу дыррагьи гIацIылгахтI. Ауи МосковскІа поселок асаби азъазара апхьарта дъадзанхауа асквш 26 йрыуата «Народные инструменты» хъвшара 10 сквша унашва ахъылцІатІ. Ауаъа акъвабыз, аккордеон, абалалайка, адомбра йасуа йырбжьауа асабиква талант зму, ауагІахъа макъымква зымрыдзуаш шгІарылцІуаш багъьата йазхъалцІитІ.