АУАГIА РШВАРАГIВАРАДАРА РХЧИТI

Июль а 3 Черкесск город «АдзыгIвбжьа ЙачIва» культура-тшпсщара парк йаныргIалу Амфитеатр апны амгIва ныкъвара шварагIварадарала акъральыгIва инспекция (ГИБДД) ангIанша а-Мш йазынархата айззара акIвшатI. Ауи йалан МВД а-ГИБДД КЧР-ла а-УнашвахъцIарта знапIыцIу аполиция аполковник КУШНАРЕВ Владимир, ауи йзаместительква, автомобиль мгIваква рпны ауагIа ршварагIварадара йахъпшылуа ГИБДД анхагIвчва, сквшщарда руацIа ари ауыс гвхътIыла йзырхъйаз аветеранква. Айззара акIвзыршуз ГИБДД шгIаншаз айшыста йгIаквчважватI. Ауат йшгIархIвазла, асквш 1936, июль а 3 СССР АуагIа Комиссарква р-Совет ащаквыргылрала акъральыгIва автомобиль инспекция аположение андрыбагъьа амщтахь амгIва ныкъвара шварагIварадара йахъпшылуаз НКВД ахъвшара шIыц анхара джвыквнацIатI. Ахъвшара анхагIвчва (йапхъахуз агвып 57-гIв ракIвын йнадзуз) амгIваква рпны амыгIвхъгараква ргIашIакIра, апхастаква, амашина гъычраква рабакIра йахъазымкIва, ашоферква ррыхIазыррагьи йазынхун. Асквшква агIвспхьадза ОГАИ ахачIвквагьи йрылахIун, амгIваква рпны ауагIа ршварагIварадара йахъпшылуаз рыцIа-рыцIа йщардагIвхун. Сквш 83 руацIа хIкъраль апны ага псахра ншазтынгьи, ГИБДД анхагIвчва амгIваква рпны йымчIапщауата мшкIгьи гьагIвымстI. Айззара апны ажва зыртыз МВД а-ГИБДД КЧР-ла а-УнашвахъцIарта знапIыцIу аполиция аполковник КУШНАРЕВ Владимир йгIайззаз ръачIвагIа гвыргъьахъвла драйхIвахIвтI. – ХIреспублика автомобиль мгIваква рпны ауагIа ршварагIварадара йахъпшылуа ГИБДД анхагIвчва рыцхIагIа зщтагIайуа апхастаква гIашIашвкIуата, амгIва ныкъвара хабзаква мыгIвхъызгауа шврабакIуата швхъвдаквцIараква гвхътIыла йшвырхъйитI. ХIреспублика апны ашоферква рарыпхьарагьи рбжьарагьи къару ду рылашвцIитI. Пхаста ншарныс йъашварагIвару амгIваква рпны ачIапщараква гьашIашврысуам, амашинанкъвцагIвчва ласыта йшнымкъвушла амальква гIашврысабапитI, мыгIвхъгара нзыршауа джьауап дшвыркIитI. Швара апхьартаква рпны асабиква амгIва ныкъвара хабзаква дшвырдыруата шврылабжьитI, арыпхьагIвчва аргваныта шврыцынхитI. АмгIва ныкъвара шварагIварадара йахъпшылуа ГИБДД анхагIвчва швъачIвагIа гвыргъьахъвла пхата сшвайхIвахIвитI. Швуыс майрамызтынгьи, ажвлара йрыхъвитI, ртынчра ахчитI. АмгIваква рпны швъачIапщалакIгьи швхачIвква дахIврала йшвырхъйаларныс, швсабиква рыхайырква жвбарныс швзыстахъпI, – йхIватI Кушнарев Владимир. Айззара йалаз зборч зырхъйауата пхастала йыдзыз ГИБДД анхагIвчвагьи гIаргвалашвахтI. Кушнарев Владимир зхъапщыла, заба дызчвыдзыз атгIачваква ажва пхаквала тшырзынайырхатI, ауат шырхъмаштылуа, йанакIвызлакIгьи цхърагIара шддрадзалуш гIаликIгIатI. Кушнарев Владимир амгIва ныкъвара шварагIварадара хчара сквшщарда азтыз ГИБДД аветеранквагьи драйхIвахIвтI. Ауи амгIваква рпны ауагIа ршварагIварадара гвхътIыла йазынхауа аинспекторква аофицер чынква риттI, КЧР а-Правительства а-ЧIахIра грамотаквала йгIалыркIгIаз драйхIвахIвтI. ГИБДД а-УнашвахъцIарта аразыра швъа зквнадыргаз дрыуапI Черкесск город йаныргIалу чкIвыныргIа райсра-патриот бжьарала а-Квта анхагIвы Эркенов Ибрагим. Кушнарев Владимир МВД КЧР-ла а-УнашвахъцIарта агIаджвыквцIарала йакIвшауа айззараква зрыпшдзауа аршIыйагIвчва гвыпква рунашвачпагIвчвагьи драйхIвахIвтI, ГИБДД а-УнашвахъцIарта аразыра швъаква риттI.