СКФО В Северной Осетии в 2024 году появятся прямые авиарейсы в Нижний Новгород СКФО Сельхозкооперативы в КБР набирают популярность Актуально Региональный этап Всероссийской олимпиады по истории российского предпринимательства прошел в КЧР на базе КЧГУ Актуально Глава КЧР Рашид Темрезов в Приэльбрусье встретился с активистами Общероссийского движения детей и молодежи «Движение Первых» Актуально Глава КЧР Рашид Темрезов в Тырныаузе КБР принял участие в открытии Дворца культуры им. Кайсына Кулиева

«АТУРЫХ ГIАНЗЫРШАУА АУАГIА РАКIВПI»

12.11.2018 462
«АТУРЫХ ГIАНЗЫРШАУА АУАГIА РАКIВПI»
Октябрь а 29 Черкесск город акультура Тдзы апны акомсомол йахъыцIыз асквшы 100 йазынархата айззара акIвшатI. Ауи йалан КЧР а-Хъада ТЕМРЕЗОВ Рашид, КЧР АуагIа Айззара (а-Парламент) а-Председатель ИВАНОВ Александр, адепутатква, КЧР а-Правительства а-Председатель УАЗ Аслан, ВЛКСМ аветеранква. Айззара ангIахъыртIы сквшышвкI зхъыцIуа акомсомол атурых йгIаквчважвауа видеофильм гIадырбатI. УадыргIвана Черкесск йаныргIалу чкIвыныргIа райсра-патриот бжьарала а-Квта аюнармеецква ВЛКСМ а-Баракъ Къапщ асцена йхъаргылтI. Совет Союз агIан ВЛКСМ а-Баракъ Къапщ йаднакIылуаз ауагIа р-Абашта йазцIабыргта ауыхвара пхатшаква акIвдыршун. СССР йхIаракIу ацорденкI злу ауи а-Баракъ Абашта айсра Ду агIан агъа йпшIагылыз, афашизм аладрыхъвашауата фырта тшгIазырбаз акомсомолецква, айсра амщтахьгьи хIкъраль апромышленность гIащтIызххуаз ауагIа ркъару йамайгьдзауа йшынхуз гIаунаргвалашвитI. – Совет Союз агIан хIкъраль, хIобласть ркъагIара, руачIвымш йазхъвыцуаз ачкIвынчви ахIвсси акомсомол йалата нхарала рыхьыз шдыргаз ухъаштылуашта йгьаъам. Акомсомол анщаквгылуаз абзазара шхIатлазгьи ауи йалаз чкIвыныргIа азаводкви афабрикакви руыхвара къару ду аларцIатI, афронт йпшцIалыз р-Псадгьыл йазцIабыргта фырра гIадырбатI. ХIреспублика апны йлырхуа анаука, акультура, арыпхьара йгьи аспорт йырзынарху апроектква абзазара йалажьра йацхърагIитI чкIвыныргIа руысквала акъральыгIва нхартаква, апатриот, аволонтер адкIылараква. Ауат анхараква йудырдыритI акомсомол йгIахъшахъыцIыз ацIас пшдзаква уахьчIвагьи йшхIымрыдзыз. Бзирала хIзайгвыгъауа чкIвыныргIа хIреспублика йгьи хIкъраль сабапра рызгIазгуа ауысква йрыдкIылата тшауацIырхитI, – йхIватI КЧР а-Хъада Темрезов Рашид. Ауи хIреспублика акомсомол организацияква йрылата Къарча-Черкес йгьи Россия ркъагIара, ртшауацIыхра къару алазцIаз «Комсомольская слава» ЧIахIра знак рквнайыргатI. Акомсомол аветеранква йрыуата ари артшхъвагала йгIалыркIгIатI КАРАКЕТОВ Мурат Аубекир йпа, КАТАГАНОВ Ажмагомет Эреджеп йпа, КIВЫДЖ Али МхIамат йпа (артшхъвага йпа Руслан йырттI), КЪВЫЛ Фардауыс Кьазибан йпхIа, МАЛСУГЕНОВ Владимир Махтей йпа, ПИВОВАРОВА Надежда Иван йпхIа, ТЕМЫР Умар Йараджьыб йпа, ТЛЬАБЫЧА Анатолий Рамазан йпа, ХАПЧАЕВ СальыхI Юсуф йпа. «Комсомолу-100» дуней адгалра комитет ащаквыргылрала, ВЛКСМ аюбилей йазынарху айззаракви агвыргъьахъвкви радгалра дъацхърагIаз ахъазла КЧР а-Хъада ТЕМРЕЗОВ Рашид «Комсомольская слава» ЧIахIра знак гIайквнадыргатI. Артшхъвага «Воспитанники комсомола – Мое Отечество» жвлара организация КЧР-ла ахъвшара апредседатель Гвана Игорь хIреспублика аунашвачпагIв йыйттI. Иванов Александр дангIачважвуз йшгIаликIгIазла, совет заман агIан чкIвыныргIа нхаралагьи къвырльыкъвхаралагьи акомсомол ахьыз дыргатI. Ауи азаман йызлабзазуз ацIас пшдзаква ужвы йъагIадзаздза хIбзазара йалапI. – Азаман агата тшапсахызтынгьи, акъраль апхъаламгIвайсра йацхърагIауа чкIвыныргIа ркъаруи рдырракви ажвлараполитика бзазара йалымцIуата йалапI. «Единая Россия» политика партия апны йгIаныршу «Молодая гвардия», «Юнармия» организацияква йрылу ВЛКСМ йагъьу ацIасква надырдзахитI, чкIвыныргIа райсра-патриот бжьара йазынхитI, ашIаква апхьари анхари йрыквгIазшIыртуата йрыдынхалитI. УахьчIва авласть йалу ахабзалыхыгIвчва, а-Правительства анхагIвчва, ажвлара организацияква йрылу рщарда комсомол гвплацIа нкъвызгаз йрыуапI. Ауат йрапшу аъачIвагIагIвчва хIреспублика, хIкъраль ркъагIара, ртшауацIыхра йазынхара йахъазымкIва чкIвыныргIа гвыбзыгъата, нхагIвыта ргIадзныргылрагьи къару аларцIитI, – йхIватI Иванов Александр. Ауи акомсомол организацияква йрылата нхарала зыхьыз зыргаз АСЛАНЫКЪВА Римма МухIамад йпхIа, БАСКАЕВ Валерий КIазбек йпа, ДЖУМАЕВ Алибек Менглиби йпа, КIВЫДЖ ХIазрат МхIамат йпа, МИХАЙЛОВ Игорь Владимир йпа датшагьи ВЛКСМ аветеранква КЧР АуагIа Айззара (а-Парламент) а-Президиум ачIахIра грамотаква рквнайыргатI. Айззара апны датшагьи йгIачважватI асквшква 1962–1990 рагIан ВЛКСМ аобласть комитет аунашвачпагIвчва – «КIавкIаз» федеральна автомобиль мгIваква р-УнашвахъцIарта КЧР-ла ахъвшара адиректор йзаместитель Уаз Анатолий, «Росреестр» КЧР-ла а-УнашвахъцIарта знапIыцIу йзаместитель Каракетов Мурат, Къарча город апны ВЛКСМ акомитет йапхъахауа секретарьта сквшщарда йынхаз, анхара аветеран Перепелица Николай, асквшква 1972–1978 руацIа ВЛКСМ Черкесск городла акомитет йапхъахуз асекретарь, РТИ завод адиректорква р-Совет апредседатель Тльабыча Анатолий, ВЛКСМ аобласть комитет абюро йалаз, Афганистан айсра аветеран Дюрменов Юсуф. Арыпхьарали наукали КЧР аминистр Кравченко Инна акомсомол аюбилей йазынархаз алацIарали суратгIврали анкъвакъвра йапхъагылагIвхаз апхьагIвчва аграмотакви асогIакви рылттI. «Воспитанники комсомола – Мое Отечество» жвлара организация КЧР-ла ахъвшара апредседатель Гвана Игорь «100 лет ВЛКСМ» медальква риттI акомсомол аветеранква АЛАДДИНА Ольга Владимир йпхIа, УАЗ Аслан Анатолий йпа, ТАТАРШВАУА Рема Щамсадин йпа, ТАМБИ Руслан Али йпа датшагьи. Айзара апны «За верность традициям Комсомола» медальква, «Комсомолу – 100» дуней адгалра комитет аразыра швъаква, КПРФ ачвахъабага орденква щардагIвы йрырттI. Ари атшын гIачважварипхьадза ауатыкв йгIаталуаз аршIыйагIвчва ашвахIварали гIахIврали йгIайззаз ргвы пшыхь тадрыстI. Черкесск город й-18-хауа апхьарта йыцIу асабиква ауысаква йгIарыпхьатI, «Акварель», «Карамельки», «А-класс» гвыпква йрылу асабиква ашва рхIватI, йгIахIвытI. Къарча город йгIатыцIыз аршIыйагIвчва хвыцква акомсомол ашваква рхIватI. КъарчачкIвын район йауу асабиква «Мой адрес – Советский Союз» ашва рхIватI. Разин Артем, Батчаев Таулан, Китаева ФатIима «Надежда» ашва ацырхIватI. Айззара алгауата ВЛКСМ а-Баракъ анджвылыргахуаз зымгIвагьи гIагылтI. Акомсомол адамыгъа йанакIвызлакIгьи йщтIыхызтI, ауи йацта хIкъраль абзазара йгIалалыз ацIас пшдзаква зымрыдзуаш, апхьаралагьи нхаралагьи зыхьыз хъарата йзыргуш, ахIбачва ргIаджвыквцIараква назырдзахуаш чкIвыныргIа йанакIвызлакIгьи йщардагIвызтI.
462 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный