АЦIЛАУАТРАКВА ЙРЫЛАХIИТI

АдыгьахIабльа район ауацIала ужвыгьи гектар 60 гIазцIазкIуа ашта апны ачIвацIлаква ларцIатI. «Сады Карачаево-Черкесии» инвестиция проект абзазара йаларжьуата ацIлауатраква адгьылта гектар 203,1 ддыркIытI. ХIапхъа агIапындза ужвыгьи хгектаркI рпны цIлауатра гIаншуштI. Анхараква аъачIвагIагIвчва рхъпшылра йацIапI. АцIлаква йгIаршIалуа ачIваква рзигIваквала йгьапшым, йрылапI ласы йауа, йкIьасу, архарджьра йазалху. Адуней джыпхаква йрыквшвауа цIлапI йгIадрысабапуа. Асквш 2016 агIан аинвестиция проект ЛагъьКIавкIаз Федеральна округ атшауацIыхрала акъральыгIва программа йаларцIатI, цIыпх угIалагата абзазара йаларжьуа йалагатI. Ауи йахъазымкIва хIызту асквш апны Россия Федерация ауацIала Къарча-Черкес заджвыкI апны хIацIлауатра ларцIатI.