Акъарча уагIахъа ргIащаквгылхра а-Мш зтшын
йдыртлапIуз Къарча город апны нархара щарда
зму акультура тшауацIнарыхрала Квта гIахъыртIытI. КЧР а-Хъада Темрезов Рашид йщаквыргылрала ауи йбергьльыз
ауысагIв, агIвгIвы Кулиев
Къайсын йыхьыз ахъырхIвалгIатI.
Акультура тшауацIнарыхрала а-Квта агIахътIра йалан Къабард-Балкъар агIащтийыгIвчва.
Ауат КБР а-Хъада КIвакIва КIазбек йыхьызла
акъарча уагIахъа ргIащаквгылхра а-Мш йазынархаз
айззара апынгьи йгIачважватI.
Акультура Квта гIахъыртIуата алентIа къапщ пыркъытI КЧР а-Хъада ТЕМРЕЗОВ Рашид, КБР
а-Правительства а-Председатель йзаместитель
КЪАРДАН Мурат, Къарча город округла айсри
анхари рветеранква р-Совет аунашвачпагIв АЛИЕВ Ракай. Ауи амщтахь
а-Квта анашылырта адзхъа йдыргылыз КъабардБалкъар ауагIа руысагIв
Кулиев Къайсын Шувай
йпа йбюст гIахъыртIытI.
Темрезов Рашид агвыргъьахъв айззара йалаз
тшырзынайырхауата зымгIва йрапхъата акъарча
уагIахъа ргIащаквгылхра а-Мшла драйхIвахIвтI,
Квта Азия йгьи Къазахстан рпны 14 сквша ахьти
амли йгIарылсыз ауагIахъа рхъацIара, рчхIара
йгьи анхара азгIашыкърата йазрыму гIаликIгIатI.
– Акъарча уагIахъа
рышта зтшын йгIахъынхIвыхыз йачвахъабагата
Къарча город апны акультура тшауацIнарыхрала
Квта гIахъхIтIитI, – йхIватI
КЧР а-Хъада. – ХIреспублика шабгу ахъазла ауи
гIаншара дупI. Йауа ухIварыквын, акультура гIазхчуш, тшауацIназрыхуаш
Квта гIахътIра абанпараква апызщылуа ацIасква, абызшва, акультура
хацква шымдзуа йаквшахIатпI.
Ауи йшгIаликIгIазла,
Къарча город абзазагIвчва а-Квта шIыц агIвгIвы,
ауысагIв, ажурналист, айсра корреспондент, Къабард-Балкъар ауагIа ргIвгIвы
Кулиев Къайсын йыхьыз
ахъырцIарныс ажванахъа
ъагIаргыз швабыжта йгвапахатI.
Йшбергьльу апшта,
асквш 2018, октябрь а 5
КЧР а-Хъада Темрезов
Рашид йгьи КБР а-Хъада
йхъвдаквцIараква зырхъйуз КIвакIва КIазбек асквш
2019 Къабард-Балкъар
апны Къарча-Черкес
йа-Сквшта йгьи КъарчаЧеркес апны КъабардБалкъар йа-Сквшта йшщаквдыргылызла аунашваква мачвы рыцIарцIатI. Акультура тшауацIнарыхрала а-Квта ауат
асквшква рагIан йъагIахъыртIыз уаргвышхвитI.
Темрезов Рашид йширыбагъьазла, а-Квта Кулиев
Къайсын йыхьыз ахъцIара агIвреспубликакI ращтаныкъвара рыцIагьи йарыбагъьуштI.
– УахьчIва йгIахъыртIуа а-Квта хIхаквлагIв,
абалкъар гIвгIвы йыхьыз
ъахъхIвалгIу магIын ду
амапI, – йхIватI йгIачважвара апны КБР а-Правительства а-Председатель йзаместитель Къардан Мурат. – А-Квта апны талант зму, хIахIбачва
йдымрыдзыз ацIасква хвы
рзызбауа асабиква шгIадзынгылуаш йазхъасцIитI.
Къарча город округла
айсри анхари рветеранква р-Совет аунашвачпагIв
Алиев Ракай ахIбачва рыхьызла а-Квта гIахътIра
збзиру дшырзыразу йхIватI,
ауаъа зъадаб-намыс пшдзу
асабиква шгIадзынгылуаш гIаликIгIатI.
АгIачважвараква рымщтахь асасчва а-Квта
ауацIа шаныргIалу тшахадыргIвазатI. Ари атшын
араъа йадыргалтI Кулиев
Къайсын йыршIыйара, йбзазара йырзынархаз агIарбара джьащахъва. КЧР
а-Хъада Темрезов Рашид асасчвагьи йыцта
а-Квта йгIадгылуаз асабиква йрынйатI, аинновация технологияквала
ашIаква йлырхуа апроектква тшрыхадыргIвазатI.
Акультура тшауацIнарыхрала а-Квта нархара
щарда зму азал апны
атыпква 255 йнадзитI.
Ауи акIвымкIвагьи, атшпсщара-хъвмарра йазалху
датшагьи зал алачпапI.
Йшалу а-Квта квадрат
метр 1500 айхIа гIацIанакIитI.
Получайте свежие новости на электронную почту
Комментарии