АТШТЛАПКЪ ГЬДРЫДЗУАМ

 5-дза Санкт-Петербург город апны «Иппосфера» ахьызта дуней тшгIарбара акIвшатI. Араъа йаныргIалу адунейла йбергьльу «Экспофорум» гIарбарта комплекс тлапкъ 20 йгIарылцIыз атшква гIадыргалтI. ЙгIважвизынхауата йадыргалыз агIарбара апкъ йтата конкурсла анкъвакъвраква акIвшатI. Эстония, Латвия, Белоруссия, Россия рпны атшзаводква йдырхIаз зтлапкъ бзийу атшква йрыквчIваз ачкIвынчви ахIвсси апхъагылара йазабакIуата мыгIвхъгаракIгьи ндмыршауата йанкъвакъвтI. Йапхъахауа агылартаква зкIыз акубоккви асогIакви рырттI. АгIарбара программа швабыжта йалачпан. АтшзгIваква йшрабакIуа йъаквчважвуз адуней конференция йалаз тлапкъ бзита йгIандыршаз атшква рызгIвадара йазынхауа аъачIвагIагIвчва рынхара шагъьырчIвуаш, йапшым ахъвшвква шрыдыргалуашла ргвгIанаграква рхIватI. Адунейла тштлапкъта йаъу щарда йнадзитI. Ауат знырцIаз хабзала йдрыбагъьаз, йгIандыршаз акнига тшазынауырхарквын, къабард тштлапкъ шгIандыршаз, йшахъшахъырщтыз узырдыруа агIвыраквагьи урынйитI. ЙгIалкIгIара атахъыпI, ауи акнига йанрымцIаз атштлапкъква йгIарылцIыз атшква адуней гIарбара йыгьнадрыскIьум. ЧхIара злу, йщаласу тшбзита йырпхьадзауа акъабард тшквагьи Санкт-Петербург йакIвшаз агIарбара йалан. АтшырхIара йазынарху дырра зму аъачIвагIагIвчва, атштлапкъква ртурых цIолата йыздыруа апхьахьаква агIарба-ра йалаз акъабард тшква швабыжта йшыргвапхаз гIархIватI. Йапшым акъральква йгIартыргаз зтлапкъ бзийу тшыта 200 ауаъа йгIадырбатI. Туркмения, Ирландия, Нидерланды, Норвегия, Бельгия, Шотландия, Франция, Германия, Англия йгьи Россия къральква рпны йгIаншаз атлапкъ бзиква йгIарылцIыз атшква ауагIа йддырбатI. АгIарбара йалаз акъабард тшквагьи гьмачIмызтI. ЙгIалкIгIара атахъыпI, ауи апш тшы зму абазаквагьи щардагIвы йнадзитI. Лагъь-КIавкIаз йгьи ГIвадахь федеральна округква йрыланакIуа хреспубликакI рпны атшырхIагIвчва агIарбара йалазларныс йдрайгватI. Ауат къабард тлапкъ йауу атшква (жвба) ауаъа йгIадырбатI. ХIреспублика апынгьи тшбзи шаъу ахабар дыргарныс Санкт-Петербург йцатI. ЙынджьыгьчкIвын, КвачхIабльа йгьи ПсауычIадаха йтыцIыз ачкIвынчва. Адыгьа фашаква зшвыз атшыгIвчва черкес, абаза баракъква рымата ауатыкв йгIаталуа йаналага апшыгIвчва напIасра ауырала йырпылтI. ЗымгIва драйцIбадзата агIарбара далан жвиз сквша йырту Папшу Денислам. Асаби КвачхIабльа дауапI. Ауи рыцIагьи дхвыцта йаба Спартак атшква бзи ййырбатI, йара-йара даквчIвауа, йрыгIвуа дибжьатI. ЦIыпх йгьи ауи апхъала асквшква рагIан хIреспублика йтыцIта Къабард-Балкъар, Адыгея тшыла йцаз агвып дрыцта ашIыпIа пшдзаква гIамидатI. Ауи йуагIахъа рбаракъ йыма «Мамлюк» зхьзу акъабард тшыла зымгIва рапхъа ауатыкв дгIаталтI. АгIарбара акIвзыршуз атшква кьазу йгIарыквчважватI, ауат йрыквчIваз ачкIвынчва кIьыда рыхьызква гIархIватI, агIарбара бзита тшъаздрыхIазырыз ахъазла атшырхIагIвча ажва пха щарда рзырхIватI. Санкт-Петербург йцаз агвып рахIба ДАХЪВМА Рустам йшихIвазла, ауаъа йыргаз атшква агIарбара йаздрыхIазыруата тшдрыгIапсатI. – Санкт-Петербург йзакIымкIва тшы гIаугырныс, йугахырныс гьмайрам. АгIарбара адгалагIвчва сынчIвагьи хIангIадрайгва хIтшквагьи, хIуагIагьи, хIтехникагьи хIрыхIазыруа хIалагатI. Къабард тшы араъа йгIазгыз агвып щардагIвы хIнадзитI. Къабард-Балкъар, Адыгея йгIартыцIыз хIайщчвагьи хIаргьи тшадхIкIылын, йгIайззаз ауагIа хIтшква дхIырбитI, – йгIаликIгIатI Рустам. Дахъвма Рустам ЙынджьыгьчкIвын йтигата Санкт-Петербург йгаз атшква йрыквчIвата абаза баракъква рымата ауатыкв йгIаталтI ауи йпа Дахъвма Альберт йгьи йаба йахща лпа йпа Цекъва Ансар. Айщчва агIвыджьгьи тшы бзи йырбитI, агIарбара йъагIадрайгваз швабыжта йыргвапахатI. – АгIарбара йалу атлапкъ бзиква йгIарылцIыз атшква уызпшуаш уымдыруата йпшдзапI, йджьащахъвапI. ХIара йгIахIырбаз йгIайззаз зымгIва йыргвапхатI, щардагIвы хIтшква йрыдзхъагылата сурат рхъырхитI, йызуу атштлапкъ йазцIгIитI, акIвдырква, рызна злу агьарычIваква, агъвраква шчпу джьарщитI, – рхIвитI агIарбара апны сзынйаз айщчва. ПсауычIадаха йауу Кидакоев Замрат йгIайырбаз атшы «Къазауат»-хIва йапхьитI. АчкIвын йаби йари сквшщарда цIитIта къабард тлапкъ йауу тшы дырхIитI. АтшрыгIвракви агIарбаракви гьагIвырщтуам, йъакIвызлакIгьи ртшква гIалыркIгIитI, асогIаква гIарквнадыргитI. К ъ а б а р д - Б а л к ъ а р йгьи Адыгея йыртыцIыз ачкIвынчвагьи чхIара злу, йщаласу тшыпшдза щарда рымапI. Ауат СанктПетербург йгIадырбаз атшквагьи йуымгвапхушта, рчхIара, рласыра джьауымщушта йгьаъам. «Иппосфера – 2019» йалаз Къабард-Балкъар, Адыгея йгьи хIреспублика атшырхIагIвчва йгIадырбаз атшква щардагIвы йшыргвапхаз уаквнаршахIатуата адуней гIарбара асогIаква рквнадыргатI.