АТШРЫГIВРА ГВЫРГЪЬАХЪВ ПШДЗАТА ЙАКIВШАТI

Июнь а 16 Абашта айсра Ду апны АйгIайра йгьи Россия а-Мш йырзынархаз атшрыгIвраква Черкесск город агIвадахь шта йаныргIалу аипподром апны йакIвшатI. Анкъвакъвраква йрылаз атшырхIагIвчва йрыцыркIырныс уагIа щарда гIайззатI. АтшрыгIвраква гIахъитIуата йгIачважваз КЧР а-Правительства а-Председатель йапхъахауа йзаместитель Байчоров Эльдар КЧР а-Хъада Темрезов Рашид йыхьызла йгIайззаз тшырзынайырхатI. – ХIреспублика апны уагIахъа 80 айхIа йгIарылцIыз ауагIа акъыльаквшвара рызбжьата, ацзакIыра акъару шдуу гIаргвынгIвуата йацынхитI, мамырта йбзазитI. УахьчIва хIыуа дзачIвызлакIгьи хIуагIахъаква йрызбжьу айгвара, ащтаныкъвара рыцIагьи йшбагъьахуш хIазхъвыцуата хIкъраль, хIреспублика ркъагIара хIазынхитI. ХIара хIапхъанчIви хабзакви ацIаскви гьхIрыдзуам, хIыгвлачва хIрыщтаныкъвитI, ркультура тынхаква хвы рзыгIбитI. Хвду ззызбауа схаквлагIвчва! Агвы йгIатыцIуата Россия а-Мшла сшвайхIвахIвитI. А-ГIид мыш тлапIа агIан хIвахIврата йырхIваз атгIачваква зымгIвагьи йрыквыршва, – йхIватI Байчоров Эльдар. Ари атшын анкъвакъвра апны зща цкьу тшыта 60 айхIа гIадрыгIвтI. Йапхъахуз атшрыгIвра йалаз Совет Союз йгьи Россия а-Фырква рыхьыз зхъхIвалгIу асогIа йазабакIтI. ГIвысквша йырту хIреспублика йауу ажвыгIвтшыкI йрыуата Каппушев Умар йтшы Жасмин зымгIва рапхъа йгыла километркI йгIагIвтI. Абашта айсра Ду аветеранква йырзынархаз йгIвбахуз атшрыгIвра апны гIвысквша йырту тшыта жвба гIадрыгIвтI. Россияла зыхьыз бергьльу ажоккей Каппушев Мурзабек дызквчIваз атшы Леон зымгIва йрапхъахатI. Йхпахуз атшрыгIвра йашIаз – сом зыкь 400 а-ГIид а-Мш йазынархан. Хысквша йырту атшква ангIадрыгIв тшрыгIврала зыхьыз хъарата йзыргаз ХIаткъва Резуан дызквчIваз Хард Бой тшы зымгIва рапхъа йгыла метр 1200 йгIагIвтI. Абашта айсра Ду агIан атыл анхагIвчва йырзынархаз йпщбахуз атшрыгIврагьи джьащахъван. Ари азынгьи ХIаткъва Резуан дызквчIваз атшы Русалка зымгIва йрапхъахатI. Ари атшрыгIвра йазалхыз акубоки ахча согIи Абаза район администрация ахъада Ныр МухIаджьыр апхъагылара зкIыз ХIаткъва Резуан йыйттI. Йхвбахуз атшрыгIвра йашIаз КЧР а-Хъада Темрезов Рашид йсогIа – сом мильуанкI Россия а-Мш йазынархан. АтшрыгIвра асогIа хъада йазабакIыз асквш 2015 хIреспублика ййыз зща цкьу атшква агIвра йазычпата, рквпшырала йпшдзата акIвын йшаъаз. ЖватшыкI райхIа метр 1800 йгIагIвтI. Каппушев Мурзабек дызквчIваз Уртенов Хусей йтшы Сенсация Стайл зымгIва йгIарапхъаныстI. ЙгIвбахауа агыларта зкIыз Чква Анзор йтшы Сармат Чук ХIаткъва Резуан йгIайрыгIвтI. КЧР а-Правительства а-Председатель Байчоров Эльдар КЧР а-Хъада йсогIаква апхъагылагIвчва йриттI. ЙцIыхъвахуз атшрыгIвра Россия Федерация ауагIахъаква райгвара йазынархан. Караев Мурат йтшы Царицын зымгIва йгIарапхъаныстI. Ари атшын атшрыгIвраква гвыргъьахъв дута йакIвшара ахъазла концертгьи гIадырбатI. ТшрыгIврипхьадза амщтахь асцена йгIаквылуаз Лагъь КIавкIазла йбергьльу ашвахIвагIвчва Амирина, Китаова ФатIима, «Джегетей» гвып датшагьи аршIыйагIвчва ашва пшдзаква рхIватI, йгIайззаз ауагIа ргвы пшыхь тадрыстI.