«АТГIАЧВА ХАБЗАКВА ЙАНАКIВЫЗЛАКIГЬИ ЙБАГЪЬАЗТI»

азхъацIара ры-Мш асквш 2008 агIан РФ а-Федеральна Айззара а-Федерация а-Совет йгьи РФ а-КъральыгIва Дума йщаквдыргылтI, ауаъа йгIашIарышвта ансисквшагьи йхIыртлапIитI. Июль а 8 Черкесск акультура Тдзы апны атгIачва, абзибара йгьи азхъацIара ры-Мш йазынархата гвыргъьахъв акIвшатI. Ауи йалан КЧР а-Хъада ТЕМРЕЗОВ Рашид, КЧР-ла афедеральна инспектор ДРАЛЬЩИКОВ Игорь, КЧР АуагIа Айззара (а-Парламент) адепутатква, Черкесск город амэр ТАМБИ Руслан, КЧР а-Правительства анхагIвчва, агородкви арайонкви рхъадаква, сквшщарда акъыльаквшвара зызбжьата йацбзазауа, саби щардагIв гIадзынзыргылыз атгIачваква. Темрезов Рашид йгIадрайгваз атгIачваква агвыргъьахъвла драйхIвахIвтI. – АгIвычIвгIвара щаквгылынгьи ауагIа тгIачва гIандыршауа, саби гIадзындыргылуа абзазара акIвшитI. АгIвычIвгIвыс йтгIачва ракIвпI цIагылагIвта, ргвышхвагIвта, цхърагIагIвта йзалуа. ХIкъраль апны атгIачва хабзаква, анра, асабихъа рхчара, гIари зщарду цхърагIара драдзара магIын ду ззырбауа акъральыгIва уысква йрыуапI, – йхIватI Темрезов Рашид. – ХIреспублика апны саби щардагIв гIадзынзыргылыз, нхарала зыхьыз зыргаз ахIбачва пшдзаква щардапI, атгIачва хабзаква швабыжта йбагъьапI. УахьчIва йгIахIрайгвазгьи хIхъа зладуу, чкIвыныргIа рыхъазла йшвапху атгIачваква йрыуапI. ХIара апхъахьылагьи атгIачва, анра, асабихъа рхчара, акъральгIвчва рбзазара агъьчIвра хIазынхуштI. ЙгIадзынгылуа абанпара ртшауацIыхра йацхIкIуата анхараква гьгIашIахIрысуашым. Къарча-Черкес апны саби щардагIв зму атгIачваква йъарылахIауа швабыжта хIайгвыргъьитI. ХIара йгIадзынгылуа ахвыцква рыхъазла апхьартаква, асабигIзартаква, аспорт тшыбжьартаква ргIаныршара хIазынхуштI, саби щардагIв зму атгIачва шIаква йрыцхIкIуаштI. КЧР а-Хъада аныдъа, абадъа йгIанхаз асабиква здызкIылта рбзибарала йкIвыршата йзыгIзауа атгIачваква кIьыдата ахIвахIвракви аразыра ажвакви рзынайырхатI. Ауи хIреспублика агородкви арайонкви йгIартыцIыз тгIачвата 25 «За любовь и верность» медаль рквнайыргатI. Ари артшхъвага зыртыз Абаза район, ЙынджьыгьчкIвын кыт йауу ЧКВАРГIА Нурбии Зулии сквш 39 цIитIта йацбзазитI, хгIвысабичва гIадзындыргылтI, ауат йгIархъшахъыцIхыз жвгIвы йнадзитI. Гвым кыт йауу ДЖЬМАКЪВЫЛРГIА Нурии Майи сквш 37 цIитIта ракъыль аквшвауата йбзазитI, хгIвысабичва рыгIзатI, ауат йгIарыцIагылхуа ахвыцквагьи (быжьгIвы йнадзитI) рабадуи рандуи дыргвыргъьауа йгIадзынгылитI. АдыгьахIабльа кыт абзазагIвчва ХЪАГIВАРГIА Алии Рози сквш 44 цIитIта йацбзазитI, йгIадзындыргылыз агIвысабичва хвгIвы рыгIзитI. Ари атшын Темрезов Рашид унагIвара йалалыз КАНГЛИЕВРГIА ртгIачвагьи згIвадара багъьа, акъыльаквшвара рзитахъта драйхIвахIвтI, чвахъабага согIа риттI. ХIреспублика аршIыйагIвчва гвыпква атгIачви абзибари йырзынарху ашваква рхIватI, асаби гIахIвыгIвчва гвыпква укьахвра йаладырхIауата, унашх гIащтIырхуата ауатыкв дрыпшдзатI.