АСПОРТ ЙАДКIЫЛУ ДЫРГВЫШХВИТI

Октябрь а 27 Черкесск город йаныргIалу чкIвыныргIа райсра-патриот бжьарала а-Квта адзхъа йыруыхваз аспорт воркаут-площадкIа ангIахъыртIуаз айззара йалан КЧР а-Хъада ТЕМРЕЗОВ Рашид, Черкесск город амэр ТАМБИ Руслан, «Трезвая Россия» федеральна проект аунашвачпагIв ХАМЗАЕВ СултIан, асаби спорт апхьартаква ргIащтийыгIвчва. Темрезов Рашид йгIайззаз тшырзынайырхауата йшгIаликIгIазла, «Трезвая Россия» проект аунашвачпагIв Хамзаев СултIан йцхърагIарала хIреспублика апны йхпахауа воркаут-площадкIа гIахъыртIитI. – Щарда мцIуата Хамзаев СултIани сари хIреспублика апны чкIвыныргIа рызгIвадара рыбагъьара йазынарху, афизкультури аспорти ртшауацIыхрала анхараква ъагIарбу ангIалра мачвы ацIахIцIатI. Ауи апкъ йтата хIреспублика агородкви арайонкви рпны ужвыгьи аспорт площадкIаква гIанхIыршарныс хIмурадпI. Аспорт тшадызкIылуа чкIвыныргIа йрылахIитI, ауат йанхьтугьи йанпхагIвугьи рызгIвадара дрыбагъьитI. Ауи ахъазла аурамква, апшцIаква рпны атшыбжьартаква щардата йгIанхIыршуштI, – йхIватI Темрезов Рашид. Ауи йшгIаликIгIазла, воркаут-площадкIа ъаруыхваз АйгIайра парк гIадыршIыцхуата анхараква асквш 2020 агIан йалдыргуштI. Хамзаев СултIан аспорт йадкIылу чкIвыныргIа рыргвышхвара йазынарху апроект йацызкIыз хIреспублика аунашвачпагIвчва дшырзыразу йхIватI. – ЙгIадзынгылуа асабиква рыхъазла акIвпI аплощадкIаква ззыгIахъхIтIуа. УахьчIва согIата йшвзыхIчпаз аворкаутплощадкIа швазсакъхауа йгIашврысабапырквын, араъа йъадзашвтахъу тшыжвбжьарныс, швызгIвадара шврыбагъьарныс швылшуштI. Апхъахьылагьи аспорт йадкIылу швыхъазла ауыжвгIанчIви тшыбжьартаква гIанхIыршуштI, – йхIватI Хамзаев СултIан. Аворкаут-площадкIа ангIахъыртIы ауатыкв йгIаталыз аспортсмен шIаква ауи зладгалу аспорт ъамапсымаква шрызгIарысабапуа зымгIва йджьаддырщатI. УадыргIвана «Росгвардия» КЧР-ла а-УнашвахъцIарта акъвырльыкъвхагIвчва атшыбжьараква шакIвдыршауа гIадырбатI.