АСПОРТ АЗГIВАДАРА ЙАЩАТАПI

ЙцIыхъвахауа асквшква анаркотиккви атутынчвари тшазтуа збальыгъ йнамдзас чкIвыныргIа рпхьадзара йалахIитI. Ауат зыдызгалуа рныбыжьла 7–8 классква йапхьауа ачкIвынчви ахIвсси рпныдза йгIабгъалтI. Арат амшква Черкесск йаныргIалу й-17-хауа а-Гимназия апны «Спорт – против вредных привычек» тема йазынархата айззара акIвшатI. Ауи йалан збальыгъ йнамдзас руысквала аинспектор, аполиция акапитан КОЛЕСНИКОВА Зарема, наркология диспансер апсихолог ДМИТРИЕВА Инна, дзюдола Россия йгьи Европа ачемпион МАХМАДОВ Зафар, КЧР-ла МВД аоперуполномоченна, Россияла ММА самбола ачемпион, адунейла аспорт амастер ШИДАКОВ Руслан, апхьагIвчва, арыпхьагIвчва. Адунейла анаркоманква рпхьадзара мильуан 200-гIв йнадзитI, ауат Абашта айсра Ду ныкъвадыкъвата йгIахъшвалыз йрайхIапI. Анаркомания апшIагылра дунейла йырхъйачIву уыспI. – СквшигIадза асабиква ртшпсщара мшква йрыламгаскIва ари атема йазынарху айззараква адыгIгаллитI, – лхIватI а-Гимназия асоциальна педагог Махва Зулифа. – УахьчIва а-Гимназия адиректор Эбзеев Мурат йгIаджвыквцIарала йакIвхIыршауа айззара апны йгIащтIыхIхуаш ауысква асабиква ртшпсщара мшква рагIан мыгIвхъгаракIгьи шрымчпуш, анаркомании атутынчвари йшачвыхчахуш йазынархапI. Анаркотики атутыни агIвычIвгIвыс йызгIвадара йазарару акIвымкIвагьи ауат гIазрысабапуа йгьи тшауацIназрыхуа уголовна джьауап ркIитI. – Заджвгьи дъамбзазауа атдзыжвква рпны чкIвыныргIа тшазыркIкIитIта тутын рчвитI, анаркотикква рыдыргалитI. Ауи йапшу атдзыжвква хIара йхIырхъвыхитI. Збальыгъ йнамдзас чкIвыныргIа рпны йакIвым рыдыргалуа йгIахIрыбергьльырквын ранчви рабачви рборч шдмырхъйауала швъа гIгIвитI. ЙгIванхауата йгIаркIрыквын збальыгъ йнамдзас руысквала ахъвшара апны ашвъа йанхIцIитI. ШвынбжьагIвчва анаркотиккви атутыни швызгIадрауазтын зынгьи ауи тшхънашвымрыхын. Аркъа швыжвта ачымазагIвтара швыцIашвазтын, наркология апны зынла ашвъа шванырцIуштI. Швапхъахьыла апхьара шваныцIалуагьи нхара шваналагауагьи ашвъа швшану бергьыльхарыквын швуысква гьаквшвушым, – лхIватI Колесникова Зарема. Анаркотиккви атутыни агIвычIвгIвыс ймахъащахъакви йхъаквынцIи йрызарархауагьи йауацIыхта йаквгIашIастI. – ЙцIыхъвахауа асквшква анаркотикква ртира ахъазла Интернет гIадрысабапитI, йухвгIара ахъазла ухъыркъьалуата мыц щарда гIауархIвитI. Ауаса ацIабырг датшапI. Зны ахIа йуыдуымгалыргьи ауи уызгIвадара йазарарпI. АгIвычIвгIвыс анаркотик уызрыхвгIауа уара уызгIвадара йачпуш дгьазхъвыцуам, ауи хачIв хъадата йпахь йгылу ахча щардата йгIайхъахIара акIвпI. ХIшIыпIа апны рахIа хIызшIашвауа синтетика наркотикква ракIвпI. Ауи йапхъахауата йшуыдугалуа зынла щцалра гIаунатитI. АгIвычIвгIвыс йхъаквынцI апсахраква адзитI, йынцIра ахъанарыситI. Ауи йгIалцIла, швтшпсщара мшква сабап алата йакIвшвырша, йакIвым тшхънашвымрыхын, – лхIватI Дмитриева Инна. Аспорт азгIвадара йащатапI. Агимназия йгIалгата аспорт апны агIатгараква йырзынадзаз ачкIвынчвагьи асабиква йрайбжьатI. Аспорт агIвычIвгIвыс йылшараква шауацIнахуа, сабапта йалу рархIвтI. – Ари йапшу айззараква асабиква рыхъазла швабыжта сабап ду рылапI. ЧкIвыныргIа йанакIвызлакIгьи урачважвара, дзачIвызлакIгьи анаркотик йамагIну, йызгIвадара йшазарару рдырра атахъыпI, – йхIватI Шидаков Руслан. – ДзачIвызлакIгьи йапхъала мурад пшдзакI йыргылырквын, йынцIра ауи йазынайырхарквын, закIгьи дыгьмыгIвхънагушым. Сара йалкIгIата спорт тшазынашвырхарныс шваквгIазшIыститI. АгIвычIвгIвыс йызгIвадара зымгIва йрапхъапI. Ажвларагьи аспортсменква рыцIа хвы рыквырцIауазшва йызбитI. НбжьагIвчвата йшвкIуа таразта йгIалшвх, наркотик зыдызгалуа пчагIвта йшвымкIын. АпхьагIвчва анаркотикква зарарта йрылу гIахъызтIуа аргылчIвква гIадырбатI, Бандурка Дарья уарад лхIватI. Асабиква апхын мшква рагIан заман щарда анрыму анаркотики атутынчвари йазыхчара магIын ду амапI. Айззара йалаз дасузлакIгьи сабапракI гIаликIгIатI