«АШВОКЬ ХЫ ТАМЫЗТЫНГЬИ, АГIВЫЧIВГIВЫС ЙГЬИЗЫНАДЫРХУМ…»

Асквш 2019 январь–июль руацIа уагIата хвынзкьыгIв райхIа абджьар нкъвыргарныс, йщтIадрызларныс йзырхвитуа швъа гIапшцIыргара ахъазла «Росгвардия» КЧР-ла а-УнашвахъцIарта тшазынадырхатI. «Росгвардия» КЧР-ла а-УнашвахъцIарта алицензиярхвитра Квта знапIыцIу ЧОМАЕВ Эдуард Ансар йпа йшихIвазла, уахьчIвала хIреспублика апны 21 647-гIв абджьар шрымула ашвъа йаныпI. – ХIара абджьар гIарысабапра йазынарху афедеральна хабза йщаквнаргылуа атахъыраква шдырхъйауа хIылапш йыцIата акъральыгIва рхъвыхраква акIвхIыршитI. Апхьадзараква йшгIадырбауала, хIреспублика апны абджьарта 29 785 рымапI. Абджьар хвгIара, ауи нкъвгара, йщтIарызлара йырзынархата ахабза йгIанахIвауа хIашIамсуата хIаквчважвитI, – йгIаликIгIатI Чомаев Эдуард. Ауи йшихIвазла, хIреспублика абзазагIвчва абджьар шынкъвыргауа, рпынква йшщтIадрызлауа дырхъвыхуата 1204-гIвы мыгIвхъгара ндыршата йщаквдыргылтI йгьи ауат административна джьауап ддыркIытI. – МыгIвхъгара нзыршаз абджьарта 1018 гIарыквырхтI, абджьар нкъвыргарныс, йщтIадрызларныс йазрыхвитуа швъата 43 рынхара гIашIахIрыстI. АкъральгIвчва абджьар рымазларныс йазрыхвитуа ашвъаква йщаквгылу апIатла йахъымсуата йгIадыршIыцхлара атахъыпI. Ауи зымчпауа къвады ддыршвитI, – йгIаликIгIатI Чомаев Эдуард. Ауи хабзала абджьар зму йазсакъра шатахъу даквчважватI. Чомаев Эдуард йшихIвазла, акытква рпны агIвна псауышвхIаква – квтIу, квчIара зкIуа алаква йанрайхсуа агIаншараква гьмачIым. Ауи хабзамыгIвхъгарапI, акыт ауацIа абджьар гIадрысабапырныс ахабза йгьархвитуам. – Акыт апны абджьар гIаурысабапырныс шварагIварапI. Ала квтIу афыргьи, ауагIа йырзычвгьазтынгьи уайхсырныс угьахвитым. Ала агIвычIвгIвыс йыцхIарныс йыжвлырквын, ажвгIванд ухъахсылуамца йкъвуца уахвитпI. Ауи ахъазла джьауап гьудыркIуашым. Ала уща азыгIашта уайхсырныс утахъхазтын, абджьар гIаурысабапра апхъала йыншуш уазхъвыцра атахъыпI. Ахы ахьъапссгIуш гьудырам, гIвычIвгIвыскI йыквшварныс закIы гьазхIвам. Абджьар нкъвызгарныс йахвиту дзачIвызлакIгьи швокьызтI, датша хысгазтI, ауагIа ъабзазауа апны йгIадрысабапырныс йгьахвитым, – йхIватI Чомаев Эдуард. Ауи йхIваз шцIабыргу йаквшахIатпI щарда мцIуата хIреспублика районквакI рпны йыншаз амыгIвхъгара. АбджьаркIыгIвчва лаквакI йшрайхсуаз ауагIа хы рыквшватI, ахвыртаква задзаз сабигьи рылан. Ауат ласыта медицина цхърагIара ддрадзатI. МыгIвхъгара нзыршаз йырзынархата ащтанкъвцараква акIвшитI, йкъванчу джьауап ддыркIуаштI. Ауаса йгIанымшара ахъазла уагIа ъабзазауа апны абджьар гIаурысабапра гьатахъым. Ашвокь хы тамызтынгьи, агIвычIвгIвыс йгьизынадырхум. Чомаев Эдуард анйара йалаз ажурналистква разцIгIараква джьауап гIариттI, «Госуслуги» портал ацхърагIара квпшыраква шынхауа йахайыргIвазатI.