СКФО В Северной Осетии в 2024 году появятся прямые авиарейсы в Нижний Новгород СКФО Сельхозкооперативы в КБР набирают популярность Актуально Региональный этап Всероссийской олимпиады по истории российского предпринимательства прошел в КЧР на базе КЧГУ Актуально Глава КЧР Рашид Темрезов в Приэльбрусье встретился с активистами Общероссийского движения детей и молодежи «Движение Первых» Актуально Глава КЧР Рашид Темрезов в Тырныаузе КБР принял участие в открытии Дворца культуры им. Кайсына Кулиева

АШIАРА – ЙДЖЬАЩАХЪВУ ГIАМТАПI

16.08.2019 241
АШIАРА – ЙДЖЬАЩАХЪВУ ГIАМТАПI
АшIара – рыцIа йгвлахIару йгьи йджьащахъву гIамтата йырпхьадзитI. Ауи агвыгъара пшдзаквали амурад дуквали йырчвыпI. АгIвычIвгIвыс ауи аныбыжь дантагылу щарда йылшитI. ХIуыжвгIанчIвиква швабыжта йгврыхвата, хIбзазара йгIалалуа ашIыцраква йрыхагIвазата йгIадзынгылитI. Ахщчва-агIвазаква Зари Заири Йынджьыгьышхва кыт йгIадзынгылтI, ПшеунетловргIа рткъвым йауапI. Ауат Лагъь-КIавкIаз къральыгIва академия (СКГА) йаланакIуа аматематика-информатика институт апны йапхьитI, «прикладная математика в экономике» ръачIвагIахуштI. АгIвыхIвсса апычIв классква йанапхьуз йгIашIарышвта швабыжта йгврыхвапI, гIащара зырхIвауа гьырдырам. Аинститут апны Зари Заири бзита йапхьара йахъазымкIва ажвлара уысквагьи жвыгъата йрылапI, «Молодежка ОНФ» йалапI. Заира ауи аорганизация акуратор дизаместительпI, аволонтер уысква швабыжта йлымаджьащахъвапI. – «Молодежка ОНФ» лшара щарда гIаунатитI. Швабыжта йгвлахIарапI уажванахъаква йанрылапшуа, йанрыцыркIуа. Сара йшспхьадзауала, уволонтерызларныс джьащахъвапI, магIын дугьи амапI. Ага йгвасразтынгьи, хIызту азаман ауацIала ауагIаква райхIарагIв рхъагIваца акIвымкIва датша закIгьи йазымхъвыцуата йбзазитI. ЙаъапI ажвлара рпны ахчадъа йуырхъйа ауаш ауысква. Заджвы уаницхърагIауа уаргьи угвы йалахIитI, ухъахв щтIнахитI, – лхIвит Заира. Ауи лажванахъала Асквш шIыц ангIаталуашыз «Молодежка ОНФ» йалу чкIвыныргIа ачымазагIвтара йщтIу асабиква рыхъазла гвыргъьахъв адыргалтI. АшIаква Хьта Дадата йгьи ХьырчIвачIвата тшыргIвычан, ахвыцква рнашх щтIырхтI, асогIаква рыларшатI. Ахщчва СКГА апны йакIвшауа ауысква йрыцыркIитI, КВН команда йрылата йгIахъвмаритI, йакIвшаз «Дружба народов» фестиваль швабыжта йрымаджьащахъвахатI, анцIрала ргвы йгIатахатI. АхIвсса йшырхIвауала, рнапIква акврышвта дакъикъакIгьи йчIвазларныс йгьахадзум. Ауат рхъатачIв уыс гIахъыртIра ргвыгъапI. Ауи рмурад гIардахIвра ахъазла анахьанат йдырхIаз ашвапхаква тшрыхадыргIвазитI, амастер-классква йрылазлитI, ауагIахъа культураква цIолата йддырдыритI. УахьчIвала ахIвсса «Машук-19» форум йалалырныс тшдрыхIазыритI. Ауаъа ауат йгIахъыртIра ртахъу акафе апроект рхчара рмурадпI. Ауи йалачпазлуштI ацыгвква йъархьпшуа ахъвшарагьи. – Дгылырта змам, йымлащиуа аурам йбжьу ацыгвква швабыжта хIгвы рызрыцхIапI. Асабиква рпынква ацыгвква ркIырныс ран-рабачва йанадымрыхвитуа айхIарапI. Ауат йрапшу ахвыцква хIкафе йгIайырквын ацыгвква йрыцхъвмарырныс лшара рымазлуштI, – рхIвитI ахщчва. Заири Зари зылшараква ахъарысу асабикви ауат ранчви тшъапсырщуш шIыпIа гIаныршарала апроектгьи йадынхалитI. Анчва тIакIв тшъадзапсырщауа аволонтерква асабиква дрыхъвмаруаштI. ЙгIашIыхIпхьадзаз ауысква йырхъазымкIва Заира адзахрагьи бзи йылбитI, ауи анархарала акурсквагьи дгIарылгахьатI. УахьчIвала азаман йаццауа ачгIвычаква лахщи лани йырзылдзахуа йджвыквылцIахьатI. Зара сурат хъылхырныс рыцIа дазычпапI, авидеороликква раныргIалрагьи дхънахитI. Ахщчва злазлауа афестивалькви афорумкви рынхаща ахъылхитIта пшдзата йанлыргIалхитI. ПшеунетловргIа Зари Заири рмурадква пшдзапI, хачIв щарда рпахь йдыргылитI, ауат дырхъйара ахъазлагьи йрылшауа закIгьи гьгIаныржьуам.
241 просмотров

Читайте также



Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный