Июнь а 15 Къвбина
кыт йтыцIыз чкIвыныргIа
щапIыла акъарапагваква
сасра йрызцатI. «Алашара» жвлара адкIылара
апны МАМБАТ Белла
унашва зхъылцIауа «ЧкIвыныргIа» хъвшара йалу
йлырхыз «ХIапхъанчIвиква рыщтала» проект
апкъ йтата йапхъахауата ари йапшу мгIвайсра
адыргалтI.
– АпхьагIвчви астуденткви йанакIвызлакIгьи атурист гIамдараква йхъырхитI: апсабара
гвщтIыхра гIарыланацIитI,
атобаква йанырхъысуа,
абнаква йанрылсуа, архъа гIайыра зигIваква
анырбауа ршIыпIа апшдзари абайари рхчара
магIныта йаму рыцIа цIолата йгIаргвынгIвитI. ЙъадзамгIвайсуагьи шIыцра
щарда рдыритI, лахIвара
пшдзала йырчвхитI, тшпсщарата йырзалитI, рынбжьагIвыгIара арыбагъьитI, –
лхIвитI Мамбат Белла,
апроект ахачIвква дрыквгIашIасуата.
ЧкIвыныргIа щъагIвта
йапхъахауа рымгIвайсра
адгалра уысква йрылан
Къвбина апхьарти акультура Тдзи рынхагIвчва,
ажвлара адкIылараква
рсоветква, ахIбачва. Акыт
акультура Тдзы апшцIа
тшгIазызкIкIыз абзазагIвчва мгIва йыквылуашыз
ачкIвынчви ахIвсси абжьагажваква рзынадырхатI,
ауат акъарапагваква йрызцауата ахIвахIвра ажваква знырцIаз асальамшвъа рнапIыцIарцIатI.
Ауат рнадасра дрыпшдзатI «Амара» гIахIвыгIвчва гвып йалу ахIвссагьи.
– АгIвычIвгIвыс дъайыз,
дъагIадзынгылыз ашIыпIа зынгьи йгвы йыгьтыцIуам. Зцри шта йбзазауа ауагIаква, ауи
гIакIвзыршауа апсабара
йща йалапI, йынцIра йахъвыкIпI. АуыжвгIанчIви
технологияква тшанауацIырхуа азаман агIан
чкIвыныргIа азаргванта
гьузыхIвушым. Ари ацымгIвайсра ауат шаднакIылуаш, нбжьагIвыгIара багъьа шгIарбжьанацIуш
кьангьаш гьалам, – йхIватI
КЧР абаза ахIбачва р-Совет аунашвачпагIв АУБАКЬ МухIадин.
АгIамдагIвчва джвыквылра апхъала Абаза
районла туризмла абжьагIвы Джьджьу Амир ашварагIварадара хабзаква
гIадйыргвалашвахтI.
Амш бзидздзан. Атуристква Къвбина утыцIта
Къарапагвадза 16 километркI йнаднацалуата
йымгIвайстI, ауи пщсахIаткI рыквнахызтIхIва,
азаман шцазгьи рымдыруата йагIвстI. Йаннадза
ашваквали агIахIвраквали йгIарпшIалыз акъарапагваква ауат рнашх
рыцIагьи йщтIырхтI, рмамырса, рчашв, рбахсыма
хIазырта асасчва драйгватI. Къарапагва кыт гIаныршара ахъада КЪВАПСЫРГЬАН Руслан йгьи
абзазагIвчва акъвбинаква
йырзыгІаргІвыз асальамшвъа йану ажва пхаква
ргвы йшнадзаз рхIватI.
Анйара апны агIвкыткI
ртурыхгьи йаквгIашIамсуата йгьагІврымщттI. Йшбергьльу апшта, Къарапагва кыт гIанзыршаз
асквш 1920-ква рагIан ауи
ашIыпIала йквачыз акъвбинаква ракIвпI. АхIагIарта йхъалта ащацIа гIащтIызхыз атгIачваква ракIвпI
ауи бзазартата йызчпаз.
Зщаквгылра жвасквшапхьадзара руацIа йакIвшаз Къарапагва уахьчIвала атшауацIыхра мгIва
йтагылапI, йынхагIву, згвы
хътIу, зрызкъы аущту уагIа бзи бзазитI. Ауат асас
йрайгварала хIуагIахъа
цIасква йшрызцIабыргу
анйара йалаз зымгIва
абгата йрылархIватI.
АмгIвайсра акъвбинаква йырхъазымкIва ЙынджьыгьчкIвын, АлбыргIан,
йара Къарапагва йауу
апхьагIвчви астуденткви,
«Алашара» АНО аволонтерквагьи алан, 65-гIвы
абаза баракъ къапщква
рымата гIвагвана бзи гIамырдатI, ахIбачва йынкъвыргуз ащтаныкъвара
цIасква шдымрыдзуа гIадырбатI.
Апроект унашва ахъызцІауа Мамбат Белла йшылрыбагъьауала, арат йрапшу атурист гIамдараква
ужвыгьи йадыргалуаштI,
ауат йрылалра зтахъу
зымгIва драйгвитI. Ауи
ргIаджвыквцIара йацызкIыз КЧР абаза ахIбачва
йгьи агIвкыткI рахIбачва
рсоветкви абзазагIвчви,
асасчва рырчарала цхърагIара гIадызрадзаз ахIаракьатчпагIв ХАРАТОКЪВА Рамазан дшырзыразу гIалылкIгIатI
Получайте свежие новости на электронную почту
Комментарии