АПСАХРА БЗИКВА ГЬМАЧIЫМ

ХIреспублика агород округкви амуниципальна районкви радминистрацияква рхъадаква ансисквша унашва зхъырцIауа аштаква рпны йгIаныршу ахабзалыхра органква рдепутатква, КЧР а-Правительства анхагIвчва, абзазагIвчва рпахь йагIвсыз асквш рынхара агIарбараквала йгIачважвитI. МартI а 22 ЙынджьыгьчкIвын апны йакIвшаз Абаза муниципальна районла аотчет айззара йалан наукала, арыпхьарала, культурала, спортла, чкIвыныргIа руысквала йгьи туризмла КЧР АуагIа Айззара (а-Парламент) акомитет апредседатель БЫДЖЬ Исмель, культурала КЧР аминистр БАРОКЪВА Рамазан, КЧР-ла абаза ахIбачва р-Совет апредседатель АУБАКЬ МухIадин, Россия УагIахъа фронт (ОНФ) КЧР-ла ахъвшара асопредседатель ЖДАНОВ Геннадий, ХIабаз йгьи Абаза районквала ахабзахчара органква ргIащтийыгIвчва. Айззара йгIадрайгватI арыпхьара, азгIвадарахчара, акультура, аспорт нхартаква рынхагIвчва, акыт гIаныршараква рхъадаква, ажвлара адкIылараква ргIащтийыгIвчва, абзазагIвчва. Айззара гIахъитIытI Абаза муниципальна район ахъада Архагъ Къвырман. Ауи ансисквша апшта, ари азынгьи йагIвсыз асквш арайон администрация шынхаз йалапшырныс йгIадгылыз ауагIа дшырзыразу гIаликIгIатI. Абаза муниципальна район администрация ахъада НЫР МухIаджьыр асквш 2018 агIан йшынхаз, дахIврата йыззынадзаз дрыквгIашIасуата йшгIайхIвазла, арайон абюджет ахъахIара сом зыкь 413137,5 йнадзатI, акврыдзраква – сом зыкь 416047,7. ЙагIвсыз асквш ауацIа абзазагIвчва рсоциальна хчарала акъральыгIва хъвдаквцIараква абгата йдырхъйара акIвымкIвагьи, абзазагIвчва йырзалху ацхърагIараква драдзарала амаль шIыцква абзазара йаларжьырныс рылшатI. Арайонла льгот зму акъральгIвчва (3766-гIвы йнадзитI) йырзалху акоммунальна цхърагIараквала ахчаква зымгIва йаназаманыз йырнапIыцIашватI, асквш ауацIала абзазагIвчва йшалу сом мильуан 25 айхIа рырттI. Россия Федерацияла анхара йаветеранта 542-джь йагIвсыз асквш сом гIвмильуанкI айхIа радзатI, атыл йанхагIвчвата гIвыджь сом 10740 рнапIыцIадыршватI, реабилитация йырчпахыз йгьи аполитика репрессияква рызарар зквшваз а 61-джв асквш 2018 агIан сом 228 789 ддрадзатI. Арайон администрация ахъада арыпхьара, акультура, азгIвадарахчара, аспорт нхартаква ртшауацIыхрала, акыт млыкврхIара уысквала, амуниципальна мгIваква руыхварали рырчIаджьрали акъральыгIва хачIвква шдырхъйаз гIайхIватI. Ауи абзазагIвчва ртшазынархараква йшрыдынхалуа, ауат рыщтала ахъвдаквцIараква шдырхъйаз, акъральгIвчва нхарала йадгалрала уыста йакIвдыршаз йахайыргIвазатI йгьи арайон атшауацIыхра йацхърагIауа, ргIаджвыквцIараква зымгIва йрыцызкIуа КЧР а-Хъада Темрезов Рашид, КЧР а-Правительства йгьи АуагIа Айззара (а-Парламент) йрылу, ареспублика нхартаква рунашвачпагIвчва аразыра ажваква рзынайырхатI. Наукала, арыпхьарала, культурала, спортла, чкIвыныргIа руысквала йгьи туризмла КЧР АуагIа Айззара (а-Парламент) акомитет апредседатель Быджь Исмель арайон аунашвачпагIвчви ареспублика ахабзалыхыгIвчви аргваныта йшацынхауа гIайхIватI, Абаза район аунашвачпагIвчва асквш 2018 апны йрыхъвдаквыз ахачIвква шдырхъйаз уарыразуата йпхьадза шауаш гIаликIгIатI. – Ныр МухIаджьыр йгIайхIваз апхьадзараква йшудырдыруала, араъа ауагIа рбзазара агъьырчIвуата йрылшуз зымгIва рчпатI. СынчIва архъйачIвквагьи гьмачIым, ауат гIардахIвра ахъазла арайон, акыт советква рдепутатква, администрацияква рынхагIвчва ркъару абаргвыраква ррыдзра йазынадырхара атахъыпI, – йхIватI Быджь Исмель. Барокъва Рамазан йапшым анкъвакъвраква рагIан Абаза районла акультура анхагIвчвагьи, апхьагIвчвагьи, арыпхьагIвчвагьи, аспортсменквагьи йызнымкIва бзита штшгIадырбаз гIаликIгIауата, арайон атшауацIыхра къару алазцIауа зымгIвагьи дшырзыразу йхIватI. ЙынджьыгьчкIвын кыт аквтанай апхьарта адиректор ХIаткъва ФатIима арыпхьагIвчва йгьи апхьагIвчва рыхьызла автобус шIыц рзалхра йацхърагIаз Абаза район администрация ахъада аразыра ажваква йзыналырхатI. Псыжв кыт йаныргIалу «Звездочка» сабигIзарта аунашвачпагIв МалхIваз Маргарита ан-абачвагьи агIзагIвчвагьи зайгвыргъьауа асабигIзарта ауацIа гIаршIыцхрала арчIаджьра нхараква анадыргалуа Ныр МухIаджьыр цхърагIара ду шдирадзауа лхIватI. Акыт гIаныршараква рхъадаква рыхьызла йгIачважваз Къвбина кыт администрация ахъада Апса Расул шIыцта йыруыхвахыз ркыт акультура Тдзы, апхьарта апшцIа йандыргIалыз аспорт объект ауагIа ргвышхвага дута йшырзалуа гIайхIватI йгьи асквш 2018 агIан Абаза район администрация анхара уарыразуата йырпхьадзарныс ажванахъа гIайгтI. – Абаза районла адгьылрхарджьыгIвчва архъаква тшыгIвра бажв шгIарыквыргуш йащтата амальква шгIадрысабапуа, рымлыкврхIартаква ртшауацIыхра йшазхъвыцуа гIбитI. ХIфермерква абаргвыраква йырчвымшвауата адгьылква йрыдынхалитI. Ауат йатахъу техникала йадгалазарквын, руысква рыцIагьи йагъьхушын, арахьарат арайонква хIгIархьымшвауата акыт млыкврхIара тшауацIнахуашын, – йгвгIанаграква рыцагIвишатI КЧР-ла абаза ахIбачва р-Совет апредседатель Аубакь МухIадин. – Абаза район администрация анхагIвчви а-Совет адепутаткви акытква рбзазагIвчва зрашшуа абаргвыраква йрылдзгIара ахъазла йхIылшауа зымгIва хIчпитI. Администрация ахъада Ныр МухIаджьыр дгIахIымрайгвауата айззаракIгьи гьакIвхIыршум. ХIара йырхъйамкIва йгIанхаз ауысквагьи хIацыта ацIыхъва йнахIырдзуштI, – йрыбагъьатI арайон а-Совет ахъада йзаместитель ХIаратокъва Рамед. Арайон администрация ахъада акытква рбзазагIвчва разцIгIараква джьауап ритуата йцIыхъвахауа асквшква руацIа АлбыргIан кыт апны культура нхарта йгьи сабигIзарта руыхвара йшащтаныкъвауа, ЙынджьыгьчкIвын апынгьи культура Тдзы абзазара йаларжьра ахъазла амальква шнарахвуа йхIватI. Ныр МухIаджьыр асквш ауацIа нхарала гвымчIвара гIазырбаз аъачIвагIагIвчва артшхъвагаква риттI. Ауатла йгIалыркIгIаз йрыуапI Псыжв кыт йапхъахауа Гимназия апычIв классква рарыпхьагIв Адзын Зурида СагIид йпхIа, ЙынджьыгьчкIвын кыт йаныргIалу «Амра» сабигIзарта анхагIвы Ажьи ФатIима Айуб йпхIа, Къвбина апхьарта арыпхьагIв Апса Зурида МухIарби йпхIа, ЙынджьыгьчкIвын амбулатория амедахща Апса Светлана Валентин йпхIа, Чква Михаил йыхьыз зхъу «Юность» саби спорт апхьарта абжьагIвы Багов Анзор Мусса йпа, Абаза муниципальна район администрация афинанс-млыкврхIара учетла ахъвшара аъачIвагIагIв Бавижева Щаща Рамазан йпхIа, ЙынджьыгьчкIвын апхьарта апычIв классква рарыпхьагIв КыкI Тамара Юрий йпхIа, Къарапагва кыт Ардзынба Владислав йыхьыз зхъу арыпхьара Квта арыпхьагIв-адгалагIв КIьыщмахва Дина Дольат йпхIа, АлбыргIан апхьарта апычIв классква рарыпхьагIв Къвач ФатIима Александр йпхIа, Псыжв азъазара апхьарта арыпхьара уысквала адиректор лзаместитель Лачвыш ФатIима Владислав йпхIа, Абаза муниципальна район администрация нхарали социальна тшауацIыхрали а-УнашвахъцIарта йапхъахауа разряд зму аъачIвагIагIв МалхIваз Расита Амырби йпхIа, Псыжв кыт йгIвбахауа квтанай апхьарта абиблиотека аунашвачпагIв Меремыкъва Зарема АхIмад йпхIа, АлбыргIан кыт амбулатория амедахща Меремкъвыль Сима Сальымгьари йпхIа, Абаза муниципальна район архъвыхра-счетна палата аудитор Меремкъвыль Елена Али йпхIа, Абаза муниципальна район администрация афинанс унашвахъцIарта бухгалтер учетла ахъвшара аунашвачпагIв йзаместитель Напщ Ася Амин йпхIа, АлбыргIан кыт йаныргIалу «Аленушка» сабигIзарта агIзагIвы лцхърагIагIв Напщ Саратина АхIмад йпхIа, Псыжв кыт аполиклиника астационар амедахща Ныр Светлана Юрий йпхIа, Абаза муниципальна район апны МФЦ аъачIвагIагIв хъада Огвыз МахIфируз Пакъа йпхIа, Псыжв кыт йаныргIалу «Звездочка» сабигIзарта музыкала арыпхьагIв ТхIакIвахв Айщат Мусса йпхIа, «Алашара» сабигIзарта (Псыжв) аметодист Хамшаова ФатIимат Джьама йпхIа, арайон а-Квта поликлиника амедахща ХIачвыкъва Светлана Мудар йпхIа, Абаза муниципальна район администрация амашинанкъвцагIв Черкес Зауыр ТIутIа йпа, Псыжв кыт йапхъахауа Гимназия абаза бызшвали литературали арыпхьагIв ШвхIагващ Зарема ИсмагIиль йпхIа, Абаза муниципальна район администрация архив хъвшара аунашвачпагIв Чква Зули Рамазан йпхIа. Арайон администрация ахъада «Эхо Чернобыля», «Абазинский район – 10 лет созидания», «Афганистан – наша память и боль» книгаква агIацIщтра йъазылрыхIазырыз йгьи Абаза район абзазара джьгарта дъалу рыхъазла «Абазашта» газет аредактор хъада Къвыл Фардауыс Кьазибан йпхIа ЧIахIра грамота лквнайыргатI.Абаза район ахъада Архагъ Къвырман арайон а-Совет артшхъвагаква ЙынджьыгьчкIвын апхьарта, Къарапагва кыт арыпхьара Квта, Псыжв йтагылу «Звездочка» сабигIзарта, «Центр культуры и досуга» район нхарта, Псыжв асаби азъазара апхьарта, Къвбина кыт амбулатория, администрация, Псыжв акультура Тдзы, АлбыргIан апхьарта, «Абазашта» газет аредакция, Абаза район а-МФЦ, Абаза район арахв згIваква рабакIрала аветеринар станция, Россия МЧС КЧР-ла а-УнашвахъцIарта Хъада ХIабаз йгьи Абаза районквала ахъвшара, «Центр гигиены и эпидемиологии в Хабезском районе» федеральна згIвадарахчара нхарта ахъвшара рынхагIвчва гвыпква йриттI. Абаза муниципальна район ажвлара-политика бзазара джьгарта йъалу ахъазла «Единая Россия» политика партия КЧР-ла ахъвшара а-Исполком артшхъвагаква зыртыз йрыуапI Псыжв, Къарапагва кытква рпны «Единая Россия» политика партия апычIв хъвшараква рсекретарьква Ачбокъва Зурида СултIан йпхIа, Джьанымбей Алик Щорс йпа, Къанкъващ Элла Анатолий йпхIа, Ламхъва Альбина Арсен йпхIа, Уша Дина Олег йпхIа, ХIачвыкъва Альдона Юрий йпхIа. Барокъва Рамазан Абаза район акультура атшауацIыхра къару ъалалцIауа ахъазла Къвбина кыт акультура Тдзы гIахIврала йызбжьауа Хвына Мадина Виталий йпхIа ЧIахIра грамота литтI. Айззара апны арайон а-Совет адепутатква рнапIщтIыхрала асквш 2018 Абаза муниципальна район администрация шынхаз уарыразуата йщаквдыргылтI. Аотчет алачIвара апны сынчIва йыздынхалуаш йалыргата йгIадырбатI. РыцIа йхъаду уыста йгIалыркIгIатI арайон абюджет ахъахIара йалазырхIуш, ахIаракьатчпара хвыци аквтанайи йрыцкIрала амальква гIарысабапра, акытква рпны асоциальна инфраструктура объектква раъаща агъьчIвра датшагьи