АПХЬАРА СКВШ ШIЫЦ ТШАЗДРЫХIАЗЫРИТI

Апхьартаква рпны арчIаджьра нхараква йыршымтапI. Абаза муниципальна район йаланакIуа акытква рапхьартаквагьи уыста йызлу гIахIалхIвтI арайон арыпхьара хъвшара аунашвачпагIв лзаместитель МЫХЦ Ирина Назир йпхIа. – УахьчIвала апхьартакви асабигIзартакви рпны арчIаджьра уысква ацIыхъва йнадырдзитI. Август ахъаква ауат апхьара сквш шIыц йшазыхIазыру хIырхъвыхуаштI. СынчIва Псыжв йгIвбахауа аквтанай апхьарти АлбыргIан апхьарти рпны капитальна рчIаджьра акIвшитI. Ауат агIвапхьартакI рпны «Современная школа» федеральна программа апкъ йтата «Точка роста» квтаква гIахъхIтIуаштI. Ауат ъагIвнанхуш апещква хIырчIаджьитI. Арахьарат апхьартаквагьи йшхIылшауала цхърагIара дхIрадзитI, – лхIватI Мыхц Ирина. ЙынджьыгьчкIвын квтанай апхьарта адиректор ХIАТКЪВА ФатIима Еруслан йпхIа йшылхIвазла, сынчIва йдучвам рчIаджьрапI йакIвдыршауа. Амцарычвра хабарргагаква рпсахтI, ужвыгьи хъышвквакI рпсахра ргвыгъапI. Ауысква щардапI, ауаса ауат зларчпуш гIалцIырта ъарымам ахъазла асквш ауацIала Абаза муниципальна район йырзалырхуа ахчаква гIадрысабапуамцара мачI-мачIымца анхараква акIвдыршитI. Апхьарта аклассква дрыхIазырхьатI, ауаъа алыргагIвыта йынхауа НакIвахв Лиза, Къвапсыргьан Айщат, Тхагалегова Даханагъва, ХIаткъва Тая, Джео Аминат йгьи ХIаткъва Рая абидольква гIаквырчвитI, ахъалыртаква ршвитI. – ХIара апхьарта цкьата асабиква шгIаржьылхуаш хIащтапI. ХIъагIвнанхауа анцкьу хIаргьи хIгвы йалахIитI, хIхъвдаквцIараква абгата йхIырхъйитI, – лхIватI Тхагалегова Даханагъва. АлбыргIан апхьарта апны сынчIва йгIахъыртIуаш «Точка роста» Квта Къарча-Черкес Республика апхьартаква зымгIва рыхъазлагьи шIыцрапI. Ауи анхара шакIвшуш рыцIа йауацIыхта даквгIашIастI апхьарта адиректор ШАЙ ФатIима Къартуль йпхIа. – «Точка роста» Центр цифрового и гуманитарного профиля» ахьызта сынчIва зынхара джвыквхIцIуш а-Квта шIыцра щарда алапI. Ауи анхара адгылща уыжвгIанчIви заман йаквыргIапспI, гIвпещкI азалхIхтI, ауат йапшым агъыцIараквала йагIвшазлуштI, дасузлакIгьи йазалху ачвала абльынква швызлуштI, йаквыргIапсула йадгалазлуштI. Технология, ОБЖ, физкультура апхьара сахIатква апещкI апны йакIвшуштI, йгIвбахауа апещ апны йапшым апроектква йрыдынхалуаштI, асабиква шахмат йасуа йырбжьуштI. Щыбжьан амщтахь ауат анархараква рыцIа цIолата асабиква йыддырдырырныс рылшуштI, – лхIватI Шай ФатIима. Адиректор йшылхIвазла, апещква йазалху аъачIвагIагIвчва йдрыхIазыруаштI, арчIаджьраквагьи дара йакIвдыршуштI, йандыргIалуаш аъамапсымаква зымгIва шIыцызлуштI. «Точка роста» Квта апны ъачIвагIагIвчвата йынхуш АлбыргIан апхьарта арыпхьагIвчва ракIвпI. Технология апхьара сахIатква акIвзыршуш Байрамкъвыл Шамаил Срафил йпа август йдырраква йрылайырхIауата Владикавказ апны акурсква дырхъысуаштI. Хъиблахь ФатIима Джьабраъиль йпхIа а-Квта даунашвачпагIвызлуштI. МзигIадза дара рапхьагIвчва ракIвымкIвагьи арахьарат апхьартаква йапхьауа сабита 100-гIвы гIадрайгвалуштI. Апхьарта аклассква апхьара сквшы йазыхIазырпI. «Точка роста» Квта йазалырхыз апещква йхпахауа аэтаж йаныргIалпI, ауи йгIалцIла ауат рырчIаджьра йаналгара амщтахь акIвпI апхьарта абидольквагьи ангIаквырчвахуаш. – СынчIва хIапхьарта сквш 50 ахъыцIуаштI. Йыруыхвищтара ауи аъара цIызтынгьи йшхIылшауала йхIырчIаджьитI. Ан-абачва АлахI дырзыразхатI, рсабиква ъапхьауа апещква рышвква рпсахитI. Швабыжта йгIахIцхърагIитI апхьарта йгIалгаз апхьагIвчва. СквшигIадза йцIыхъвахауа ауадгьына ангIахIвачвауа агIан сквш 30 зхъыцIуа хIкытлагIвчва гIахIрайгвалитI. Ауи хIапхьарта апны цIас пшдзата йщаквгылтI. Ауат йрылшауала хIапхьарта йацхърагIитI. Наша Артур, Пщмахва Альберт, Лий Иналь гIарылскIгIара стахъыпI. СквшквакIла утхъахырквын, апхьарта зымгIва злахIырчIаджьыз Наша Артур йхIызгIайгтI. Ауи акIвымкIвагьи апхьарта йгIацIалуаз асабиква ъагIвназлуш пещкI йатахъыз зымгIвала йхIзадигалтI, апхьарта ауацIала йакIвхIыршуз «Умники и умницы» анкъвакъвра апхъагылагIвчва рсогIаква гIадирыгтI. Пщмахва Альберт апхьарта апахь йгьи анашылырта хIызйырчIаджьтI, ахъышвква хIзипсахтI. Лий Иналь стол, рымдза датшагьи щарда хIзихвгIатI. Апхьарта йгIалгищтара сквшщарда цIызтынгьи, ауат ачкIвынчва рцри апхьарта гьырхъаштылуам, – дгвыргъьауа йылхIвитI Шай ФатIима. СквшигIадза апхьартаква рынхара шIыцра щарда гIалалитI, псахра щарда ншитI. Азаман йацчIвырхъауа апхьартаква рпны адырраква йрызгIашыкъу ачкIвынчви ахIвсси хIщардазтI.