Общество Карачаево-Черкесия наращивает объемы производства тепличных овощей Актуально Представители молочной отрасли КЧР могут принять участие  в Национальном Молочном Конгрессе    Актуально Глава КЧР Рашид Темрезов поздравил с 98-летием ветерана Великой Отечественной войны Ивана Прокопова СКФО Преимущества покупки пластиковой сетки у OPT Relation СКФО 1. Технические характеристики, сертификация продукции и регистрация технических характеристик

АПХЬАГIВЧВА ЗХЪАПШЫЛУАШ ХIЫМАПI

24.05.2019 230
АПХЬАГIВЧВА ЗХЪАПШЫЛУАШ ХIЫМАПI
СквшквакI рапхъала хIкъраль а-Президент Путин Владимир й-Унашвала йгIадзынгылуа асабиква радкIылра, йтамаму мгIва йтаргылра йазынархата асквш 2015, октябрь а 29 агIан «Российское движение школьников» (РДШ) организация гIандыршатI. Ауат асквшква руацIала ари амгIвайсра ахъвшараква Россия аштаква рпны дахIврала рынхара ачкIвынчви ахIвсси рбжьарала амаль бзита йалтI. Къарча-Черкес Республика апынгьи апхьагIвчва радкIылара джьащахъвата йынхитI, уыс бзи щарда йыргIаджвыквцIагIвпI. Ауи йахъазымкIва, асквш 2019 Россияла атеатр йа-Сквшта йщаквдыргылтI, ауи йапщылата хIкъраль атеатркви ауат рынхагIвчви йырзынарху ауысква йызнымкIва хIалачважвуштI. «Российское движение школьников» йалу йгьи йацызкIуа апхьагIвчва йгьырхъазым. Сабапра щарда злу ари адкIылара йацхърагIитI, ашIаква ргвбайара атшауацIыхра йадынхалитI арыпхьагIвчва, апхьахьаква, артистква, ажвлара уыснкъвгагIвчва. ЧкIвыныргIа рбжьара йазынархан апрель а 19 Ерыжв Зули лыхьыз зхъу Псыжв кыт акультура Тдзы апны классные встречи ахьызта РДШ саби жвлара адкIылара джьгарта йалу Абаза район апхьартаква рапхьагIвчви Абаза къральыгIва театр арежиссер-ргылагIв Агача Эльдари ранйара. Эльдар театр азъазарала йхIаракIу Россия институт дастудентпI, Краснодар йтагылу акультури азъазари р-КъральыгIва университет дгIалгатI, хIреспублика апны рахIа йчкIвыну арежиссерква дрыуапI. Ауи атеатрква ртшауацIыхрала щарда зылшушта йзайгвыгъауа дактерпI. АчкIвын асквш 2017агIан культурала Ингвыщ Республика аминистр йызшIытрала Ингвыщ къральыгIва театр дшынхушла ангIалра мачвы ацIайцIан, ауаъа заманкI дынхатI. АнгIалра апкъ йтата, ауаъа анхара йгвапхузтын, ареспублика гIвнабзазартагьи йзалырхуашын. Эльдар ауаъа сквшыкI адахIвраквагьи йымата дынхатI, ауаса ачкIвын дъайыз, йцриква, йынбжьагIвчва ъану акытла йгвы гIайыхъуан, ауи щарда дзаъамызлауата дгIахъынхIвыхтI. АпхьагIвчви арежиссери ранйара джьащахъва адызгалта йгьи йакIвзыршаз Псыжв кыт акультура Тдзы аунашвачпагIв ХIашвцIа Аслан Дольат йпи Хъабльахь Асльамбакь йыхьыз зхъу Псыжв йапхъахауа Гимназия абжьара уысквала адиректор лзаместитель Нурли Альбина Ауес йпхIи ракIвпI. Ауат анйара йалаз апхьагIвчви асасчви РДШ йалу нхарата йакIвдыршауа йгьи «Классные встречи» ззырхIвауа йахадыргIвазатI. ЙащтагIайуата ХIашвцIа Аслан ари анйараква хачIвыта йгIарыцIаркIуа, йдырхъйара атахъу, мурадта йынкъвыргауа даквгIашIастI, Агача Эльдар йбзазари йыршIыйари дгIаквчважватI. Йара Эльдаргьи йчкIвынхъа шакIвшаз, атеатри амакъымкви дрылата дшгIадзынгылыз апхьагIвчва йрайхIвтI. АчкIвын йаба МухIарбии йан Рити «Йынджьыгь» уагIа театр йалата жвасквшапхьадзара асцена йгIаквылтI, ужвы йъагIадзазгьи актертагьи ашвахIвагIвчва гвып йрылатагьи асцена дрыпшдзитI, йгIадзынгылуа актер шIаква швапхата йырзалитI. Ауат асцена апны йгIадырбуз абзазара джьащахъва далата дгIадзынгылтI рпагьи. ДшхвыцыркIваз уалагата йща йалалтI абаза уагIахъа рмакъымква, ашва йхIвауа, барабан дасуа далагатI. АшвахIвари азъазари дшпахърымкъьалрыз ауи дгIакIвзыршуз Йынджьыгь апсыхIва апсабара пшдза йгьи аршIыйагIвчва ртгIачва дрылата?! Ари анйара апны апхьагIвчва Эльдар йапшым азцIгIараква йзынадырхатI, дзачIвызлакIгьи джьауап йаутI. «УарадхIварума момкIва режиссер-ргылагIвума рахIа йугвапхауа?»-хIва Агача Эльдар йанйазцIгIа, ашваква йпсы йшазаргвану, атеатр нхара шиъачIвагIахаз йхIватI. АпхьагIвчва ауи йбзазара апны гвтарата йыму, апхьарта дъадзапхьуз рыцIа бзи йбуз йарыпхьагIв, нхара дъазшIыртыз Ингвыщ Республика дгIанымхауата дызгIайхыз датшагьи азцIгIара щарда йырттI. Асабиква ари йапшу анйараква рымщтахь рдунейпшыщагьи рхъвыцщагьи тшырпсахитI, абзазарагьи апхъала йыззымхъвыцуаз датша хъатакIла йапшитI. Ауи йгIалцIла, ачкIвынчви ахIвсси швапха гIазхъырхуаш аъачIвагIагIвчви ари йапшу ранйараква атахъдзапI. Ага йгвасразтынгьи, йцIыхъвахауа асквшква щардагIвы рбзазара йащатахуш ъачIвагIа ангIалырхуа рахIа хъадата йдыргылуа аъачIвагIа дара йрыквшвара гьакIвым, ахча щарда ъагIапшцIыргауа акIвпI тшыздыркIылуа. АршIыйара йгьи азъазара мгIва йыквылта зынгьи ауи йамайгIваджьхуа арежиссер Агача Эльдар ашIаква штамамым гIаргвынйыргIвытI, йгIалухыз аъачIвагIала уынхарта угвы гвыргъьауа уцара шнасыпру райхIвтI. АпхьагIвчва ауи йджьауапква йрымаджьщахъвадзата йрыздзыргIвытI. Ари атшын йанйаз зымгIвагьи йджьащахъву анйара ргвы йгIатахара ртахъыта Агача Эльдар дрыцта сурат рхъырхтI. Абзазара апны йанакIвызлакIгьи пIатIу зквырцIауа мгIва тамам йтагылта згвтараква йырзынадзаз, зуыс йазъазу йгьи йамайжьауа, ажвлара йасабапу ракIвпI. Ауат йрапшкву ракIвпI йгIадзынгылуа асабиква швапха гIазхъырхуа.
230 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный