АНЫШВКЪВАРАТГАРА АХВ ЙГЬАЗЫРАЗЫМ

«Чистая страна» «Единая Россия» политика партия апроект хIреспубликала абзазара йшаларжьуаш йъалачважваз айззара йалан КЧР АуагIа Айззара (а-Парламент) адепутатква ШЕВХУЖЕВ Анатолий, ВЛАСЕНКО Наталья, ГАНШИН Алексей, апартия КЧР-ла ахъвшара а-Исполком аунашвачпагIв йхъвдаквцIараква зырхъйауа ДЖАМБАЕВ Руслан, уыхварали ЖКХ-ли КЧР аминистр йзаместитель БАТЧАЕВА Зульфира, «Росприроднадзор» КЧР-ла аунашвахъцIарта знапIыцIу НАХУШЕВ Назир, ауи йзаместитель ЭБЗЕЕВ Манаф, атарифквали ахвквали КЧР а-УнашвахъцIарта хъада аунашвачпагIв йхъвдаквцIараква зырхъйауа АЖЬИ МухIадин, ЖКХ анхартаква рунашвачпагIвчва, Черкесск город амэрия агIащтийыгIвчва. Айззара йалаз хIреспублика апны анышвкъваракIапсартаква йырзынарху абаргвыраква йрылзырдзгIуш амальква ауатыкв йгIатаргатI. – ХIреспублика абзазагIвчва рунагIва йгIагварыргауа анышвкъвара тызгауа «Глобус» нхарта аунашвачпагIвчва йщаквдыргылыз атарифква гIванла йхъаргылтI, ауагIа ауи гьырзышвум. Ари ауыс анхIмыргIалуазтын, апартия апроект абзазара йалажьра апны абаргвыраква хIрынйуштI, – йгIаликIгIатI Джамбаев Руслан. Аграрна политикала йгьи апсабара гIарысабапрала КЧР АуагIа Айззара (а-Парламент) акомитет апредседатель Власенко Наталья йшылхIвазла, саби щарда зму, зхъахIара накъву атгIачваква ари ауыс апны уырцымхърагIакIва йгьауашым. – Атарифква шщаквдыргылызла, атгIачва апны заджвипхьадза анышвкъвара ъатыргауа ахъазла ахча йшвитI. ХгIвы йацIыхъвамкIва саби зму атгIачваква ауи ршварныс гьрылшум. Схъатала акытква рпны атгIачва дуква сгIархъыкIвшатI, ари ауысла ргвгIанаграква срыздзыргIвытI. ЙшгIасгвынгIвызла, хгIвысабичва зму ан-абачва анышвкъвара йазыршвауа ахча, январь йгIашIарышвта йызлалахIазгьи гIаупхьадзарыквын, щардачвахитI, ркъару йыгьгIанагуам. Ари ауыс апны атгIачваква хIрыцIамгылырквын, ацкьара ауысла абаргвыраква йыгьрылдзгIушым, – лхIватI Власенко Наталья. Айззара йалаз аъачIвагIагIвчва йшгIалыркIгIазла, ауагIа рыпшцIа йгIагварыргауа анышвкъвара атгара йаквшвауа ахча рымшварыквын, акоммунальна нхартаква техника злархвгIуш, йызладырчIаджьуаш ахча гьырзазкIкIуашым, анхаша ауыслагьи абаргвыраква гIаншуштI. ХIреспубликала анышвкъваратгара йазынхауа «Глобус» нхарта агIащтийыгIвчва йшгIалыркIгIазла, йагIвсыз амыз апны ауагIа анышвкъваратгара йаквшвауа абыжьпроценткI акIвпI йазыркIкIыз. «Единая Россия» политика партия йалу ачыннкъвгагIвчва йшгIалыркIгIазла, анышвкъвара штыргауа йахъазымкIва, ауи ъакIарпсауагьи, йшадынхалуагьи йахъпшылуаштI, ари ауыс апны акъральгIвчва рхвитнагIаква шмыгIвхърымгушла амальква гIадрысабапуаштI. Саби щарда зму, зхъахIара накъву атгIачваква, аныкъвадыкъваква рыхъазла альготква руысгьи алдыргуштI. Джамбаев Руслан йшгIаликIгIазла, «Чистая страна» проект абзазара йалажьра йазынхауа зымгIва ацацхърагIарала ахачIвква дмырхъйарыквын, уыста йырзахъвдаквыщтуаш мачIызлуштI.