Хьэбэз районым хыхьэ ПсэукIэ-Дахэ къуажэм щыпсэу КIэдэкIуейхэ я быунагъуэшхуэм лъагъуныгъэм, унагъуэм, зэхуэпэжыныгъэм я Махуэм ехъулIэу, анэ гъэтIылъыгъэм и сертификатыр хуагъэфэщащ. Апхуэдэ IуэхуфIыр ягъэзэщIэну КIэдэкIуейхэ къахуеблэгъащ КъЧР-м и ЦIыхубэ ЗэIущIэм (Парламентым) и депутатхэр, УФ-м и Пенс фондым КъЧР-м щиIэ и Управленэм, республикэм гуащIэдэкIымрэ социальнэ зыужьыныгъэмрэкIэ и Министерствэм къабгъэдэкIа лIыкIуэхэр. Гупым хъуэхъу псалъэ гуапэхэр хужаIащ еплIанэ сабий къызыхуэхъуа зэщхьэгъусэхэм, икIи анэ гъэтIылъыгъэм и сертификатыр тыгъэ хуащIащ. Къапщтэмэ, Къэрэшей-Черкесым деж анэ гъэтIылъыгъэм и сертификатыр зыхуагъэфэща унагъуэ мин 24-м ящыщщ КIэдэкIуейхи. КъЧР-м и Пенс фондым и унафэщI Суюнчев Мурат сертификатыр зэщхьэгъусэхэм яхуигъэфащэкIэрэ къыхигъэщащ зэныбжьэгъугъэ зэрылъ унагъуэ быдэр, узыншэр — къэралым и лъабжьэ лъэщу зэрыщытыр. Сертификатым къыдэкIуэу, быным къахуеблэгъа хьэщIэхэм къабгъэдэкIащ нэгъуэщI тыгъэхэри: унагъуэм къыщагъэсэбэпыну бытовой техникэ, сабийхэр зэрыджэгу хьэпшыпхэр, удз гъэгъахэр. — Нобэ лъагъуныгъэм, унагъуэм, зэхуэпэжыныгъэм я махуэщI дахэщ. Сывохъуэхъу фи унагъуэм мы махуэщIымкIэ, насыпрэ зэIузэпэщыныгъэрэ фыщимыгъащIэкIэ! Фи унагъуэм сабий зэрыщIэсыр насыпышхуэщ. Ахэр нэхъри нэхъыбэ ирехъу, абыхэм я нэгу цIыкIухэр гуфIэгъуэ щимыгъащIэкIэ! — жиIащ КъЧР-м и Парламентым и депутат Червоновэ Еленэ. КIэдэкIуейхэ я унагъуэм къабгъэдэкIыу фIыщIэ псалъэ куэд къыхужаIащ гулъытэ къахуэзыщIахэм. ИкIи, ди лъэпкъ хабзэм зэрытету, хьэщIэ къахуеблэгъахэр адыгэ шхыныгъуэхэмкIэ гъэнщIа Iэнэм ирагъэблэгъащ. Источник: riakchr.ru Предыдущая новость 1011 просмотров Следующая новость Читайте также Дызыхуэныкъуэмрэ дызыхуэкIуэмрэ 04.02.2015 353 Граждан зауэм и теплъэгъуитI 22.01.2016 489 Получайте свежие новости на электронную почту Подписаться Комментарии Написать
Комментарии