Алтотур (март) айны 8-де - Тиширыуланы халкъла арасы кюнюнде - КъЧР-ни Башчысы Темрезланы Рашид 93 джыл болгъан Уллу Ата джурт къазауатны ветераны Шайдакова Валентинаны юйюне барыб, джарыкъ байрамы бла алгъышлаб, амманы кёлюн кёлтюрюб, ёмюрлюкге эсинде къалырлай саугъа да бериб кетгенди.
Айхай да, тюненеги фронтовик къыз, Башчыгъа кесини джашау джолундан къысха хапар айтханды. Ол Уллу Ата джурт къазауатда Липецк шахардан Берлиннге дери урушха къошула баргъан эмда Рейхстагда атын джазыб кетген хапарларын айтханды. Туздамы бла къонакъбайлыкъ этиб, быллай кюнде аны унутмай сый бергенине бек къууана, Темрезланы Рашидге джюрек разылыгъын билдиргенди.
Шайдакова Валентина Егоровна эки ёмюрню башындан къарагъан амма болса да, бюгюнлюкде къартлыкъгъа кесин хорлатмазгъа кюрешеди. Ол фронтха тюшер ючюн 1942-чи джыл инженер-техника аскер бёлекде къуллукъ этерге джарашханды. Андан сора Уллу Хорламгъа дери Биринчи белорус фронтда къуллукъ этгенди. Ата джурт къазауат бошалгъандан сора кесини туугъан джеринде – Волгоград областны Михайловск шахарында - джашагъанды. Алай болса да буйрукъ бла 1977-чи джыл Валентина Егоровнаны Къарачай-Черкесиягъа - Джёгетей Аягъы шахаргъа - ишлерге джиберген эдиле. Тау джуртланы хауасын, аны джашагъан адамларын асыры бек джаратхандан артда ызына кетерге хазна излемей къойгъанды. Алай бла Шайдакова Валентина эки джыйырма джылдан аслам заманны уруннганды. Джашлыгъында къарыуун-кючюн уруш тюзледе аямагъан тири тиширыу къазауатдан сора да арымай-талмай, урунууда да атын айтдыра, сыйгъа, махтаугъа тыйыншлы болуб тургъанды.
Бюгюнлюкде Валентина Егоровна эм насыблы тиширыугъа санайды кесин. Ол бир джаш бла бир къызны анасыды, аладан туугъанла бла туудукъланы да огъурлу аммаларыды.
Темрезланы Рашид ветеранны алгъышлагъандан сора, аны саулугъун багъаргъа эмда солургъа къалайда излегенин соргъанды. Шайдакова Валентина Черкесскеде «Солнечный» пансионатха барыргъа кёзю къарагъанын билдиргенди. Аны бла байламлы джумушланы айыбсыз тындырыргъа Джёгетей Аягъы муниципал районну тамадасы Лайпанланы Муратха къаты аманат салгъанды. Ол ишге Темрезланы Рашид кеси контроль этеригин да билдиргенди аммагъа.
Комментарии