АМГIВАКВА РАЪАЩИ РШВАРАГIВАРАДАРИ КЪРАЛЬЫГIВА УЫСПI

Москва апны РФ а-Президент Путин Владимир а-КъральыгIва Совет алачIвара акIвйыршатI. Ауи амгIваква ртшауацIыхра йгьи ауат рпны ашварагIварадара адгалра йазынархан. АлачIвара далан Къарча-Черкес Республика а-Хъада ТЕМРЕЗОВ Рашид. РФ а-КъральыгIва Совет йалу амгIваква руыхварала, рырчIаджьрала ауагIахъа проект шдырхъйауа йалапштI. Путин Владимир апсахраква гIаншара ахIатырла Россия ашIыпIаква рпны хвысквша руацIа йдырхъйуш ауысква ъагIарбу йазалху апрограммаква лырхра шатахъу даквгIашIастI. – Ари амаль амгIва уыхвагIвчва сквшквакI йыртахъхуш ауыхвага пкъыгIваква, атехника рхвгIарныс, атехнология шIыцквала йынхуш аъачIвагIагIвчва дрыхIазырырныс рылнаршуштI, – йгIаликIгIатI хIкъраль а-Президент. Ауи аштаква рпны ацхIаква раъаща йгьи мза ъаным амгIваква йанлащцару йшшварагIваругьи даквгIашIастI. – Акъалаква уанрылсра амщтахь уыла йгIакIыласуа гьубум. Ари аъаща амгIва аурала мза ъакIныхIам йгьахъазым йгIазлыцIуа, аэлектроэнергия ахв тлапIапI. Ауи ахча ъаквдымрыдзуа ашIыпIаква рпны апхастакви арыцхIагIакви рыцIа йщардазлитI, – йхIватI Путин Владимир. – Апхастаква райхIара аруль йадзхъачIву ркъванчагIала йыншитI. ЙалкIгIу хъпшылра ахъцIара атахъыпI ауагIа атызрыпауа рынхаща шадгалу. Къарча-Черкес амгIваква ргIаршIыцхри ашварагIварадара адгалри йрыщатахатI «Безопасные и качественные автомобильные дороги» уагIахъа проект. Ауи апны йгIарбу ауысква апхастаква йрыладзуа рпхьадзара ахъарысра йазынхитI. АмгIваква рпны мыгIвхъгара нзыршауа гIазрыбергьыльуа авидеокамераква йрылахIитI, пхаста йалашваз йапхъахауа цхърагIара ъаддрадзуш йайтыпауа апунктква Зеленчук йгьи Къарча районквала йгIаныршапI. ХIышта абзазагIвчва йгьи тшпсщара йгIайуа ршварагIварадара адгалрала ари амаль бзипI. ХIкъраль а-Президент асабиква рыцхIагIакI йаламшвара ахIатырла амгIва хабзаква рыладыркIра магIын ду шаму гIаликIгIатI, апхьагIвчва йгьи чкIвыныргIа злу аинспектор шIаква ргвыпква йрылажьрала, асабиква апхастаква йырчвыхчарала квта гIаныршарала ауысква ашIыпIа власть органква йрыхъвдаквицIатI.