АМГIВА НЫКЪВАРА ХАБЗАКВА ЙЫРЗЫРБЖЬИТI

АнцIралагьи хIуасаражвква йырхIвауата йгIамгIвайситI «Асакъра загъьым гьаъам» ажважв. ПхастакI гIанымшара ахъазла амгIва апны амашина нкъвызцауагьи ащапIламгIвайсыгIвчвагьи рхъвдаквцIараква джьауапкIра хIагIа рымата йдырхъйара атахъыпI. ЙцIыхъвахауа азаман авелосипед квпшыраква щардахатI, ауат йрыквчIвауа рысквшпхьадзаралагьи йгьапшым: рахIа йхвыцу асабиква рпны угIалагата ахъацIа квтаква рпны йыцIшвтхуата. СынчIва хIреспублика арайонква рпны йакIвшатI «ЙшварагIварадару ачарх–2019» («Безопасное колесо–2019») зхьзу апхьартаква рвелосипеднкъвцагIвчва ранкъвакъвра. Къарча Черкес Республикала йагъьу дгIалыркIгIахра ахъазла районипхьадза йапхъагылагIвхаз жвыгIв командакI апрель а 29 Черкесск къала апны йанйахтI. Абаза район ахьыз йазабакIуата йанкъвакъвтI «Светофор» АлбыргIан апхьарта акоманда йалакву ЙУАН Малик, ШАЙ Алим, ХЪИБЛАХЬ Айда, ТОБЫЛЬ Олеся. Агвып лрыхIазыртI апхьарта апны йгIаныршу аинспектор шIаква («ЮИД») ркружок знапIыцIу ХЪСАЛ Римма Мусса йпхIа. Агвып йалазлара атахъыз йхвбахауа акласс йапхьаквауа йрыуата гIвычкIвынчви гIвыхIвсси велосипед бзита йыззынкъвцауа ракIвын. Ауат амгIва апны рдырраква, йыззычпу, бзита велосипед шырзынкъвцауа цгIашIасыртакI апны йдырхъвыхуамца йгIарыкIвшатI.  Черкесск й-11-хауа арыпхьара Квта йакIвшахыз «Безопасное колесо» республика анкъвакъвра йалаз арайонква ргIащтийыгIвчва шIаква гвыпипхьадзагьи йацапшу фаша йгьи эмблема рымазлара атахъын. Анкъвакъвра хъвы-хъвы йшан: агвып йрабазырдыруаш йгьи ауат рызшIытга йахазыргIвазауа, амгIва ныкъвараквала ахабзаква шырдыруа йгьи медицинала рдырраква гIазырбауа. Апхьарта йгIадгылтI арыпхьарали наукали КЧР аминистр лзаместитель Бекижева ФатIима Бакьмырза йпхIа, МВД КЧР-ла а-УГИБДД акъральгIв инспектор ахIба Токов Ибрахим Руслан йпа, арайонква ргIащтийыгIвчва, аинспекторква датшагьи. – УахьчIва «Безопасное колесо» анкъвакъвра апны тшгIазырбуш чкIвыныргIа шврайонква рпны швапхъагылагIвхатI, – лхIватI Бекижева ФатIима. – Апхъагылара гIатызгаз арайонква рапхьагIвчва шврыдынхалуашта хIшвайгвгъитI. АмгIва ныкъвараква ршварагIварадара апхьагIвчва аквгIазшIыхIтырныс хIмурадпI. Ари анкъвакъвра рахIа бзита тшазадызгалыз гIахIнарбуштI, апхъагылара гIатызгауа КъарчаЧеркес Республика йащтийыгIвчвата Россия анкъвакъвра йалашвуштI. Абаза муниципальна район апны йапхъагылагIвхаз АлбыргIан квтанай апхьарта йхвбахауа акласс апхьагIвчва ареспублика анкъвакъвра йалашватI. Ауат рарыпхьагIв Хъсал Римма Мусса йпхIа йылрыхIазырыз агвып йалаз Хъибльахь Айда, Тобыль Олеся, Шай Алим, Йуан Малик «Светофор» рыхьзын. Римма Мусса йпхIа АлбыргIан апхьарта апны «Юные инспектора движения» ахьызта кружок лырцитI. – Апхьара сахIатква рпны амгIва ныкъвара ахабзаквала, йапхъахауа медицина цхърагIара шддрадзушла срыдынхалитI, – лхIвитI арыпхьагIв. – Асабиква амгIва ныкъвара, ащъагIв амгIва дшхъысуаш ахабзаква бзита йырдыритI. ПхастакI ншарыквын аща шашIадрысуаш, быгIвшIчIвара зму дшатдрыпуш агьиква йырзызбжьитI. Йрымаджьащахъвадзата атшыбжьараква йгIайитI. Ауат адырраква рынцIра апны йгIарыхъвуштI, дара ахвыцквагьи ауи бзита йрылархIвитI. Черкесск пропагандала аинспектор Хъабльахь Руслан Анатолий йпа йшгIаликIгIазла, ари анархарала асабиква уызларыдынхалуаш йазалху ъамапсыма гьрызхъум. – СквшигIадза «Безопасное колесо» анкъвакъвра акIвшитI. Ауи асабиква амгIва ныкъвара хабзаквала рдырраква рыбагъьара мурадта йамапI, – йхIвитI Хъабльахь Руслан. – ЧкIвыныргIа йапшым ахабзаквала дыррата йрауа рахIа йайцIбачву апхьагIвчва йрыларгахитI. Ауаса, гвасразтынгьи, Россия ауацIала йакIвшалауа ахъвы йалашвауа Къарча-Черкес Республика ащтийыгIвчва апхъагылара зынгьи йгьырзыгIатгум, апхъагылара сакъвыцIхитIта йагъьу ажвагвыпкI йыгьрылашвум, йауа ухIварыквын, хIреспублика апны бзита тшъадрыхIазыруаш, атшыбжьараква ъакIвдыршуш велогородок гьхIымам. Аиспекторква асабиква хIъарыдынхалуаш, йазалху аъамапсымаквала йадгалу уыхваракIгьи гьаъам. Анкъвакъвраква рпны йгIахIрысабапуа пщвелосипедкI хIымапI. Арахьарат аъамапсымаква зымгIва хIара хIкъарула йхIырчIаджьхитI. Ауи аъара намхъара ъахIыму йгIалцIла хIгIарбараквагьи гьауам. Ауи акIвызтIхIва, анкъвакъвраква хIрыламылуата йгьагIвхIщтуам, ага апхъагылара гIагIымгыргьи ауи йапшу анкъвакъвраква асабиква швапха бзита йырзалитI, рлахIвараква бзита хIгIайхлитI. Анкъвакъвра йалаз ашIаква бзита тшгIадырбатI, велосипед ныкъварала ахабзаква рыцIагьи бзита йддырдыртI, медицинала рдырраква рнадзарагьи гIадрыбергьыльтI. Апхъагылара гIатызгаз Черкесск город агвып Россия анкъвакъвраква ъакIвшуш Казань йцуштI. Абаза район ргIащтийыгIвчва шIаква гIвхъвшаракI рпны йгIвбахауа агыларта гIатыргатI, ЙУАН Малик йара йхъатачIв гIарбараквала йгIвбахауа агыларта йкIытI. Аинспектор шIаква амедальквали аграмотаквали йгIалыркIгIатI, глобус, амгIва ныкъвараква рхабзаква гIазырбауа хъвмарга, топ йгьи гIвторткI согIата йрырттI. АмгIва мгIвайсра ахабзаква бзита йыздыруа йгьи ауат зырхъйауа апхаста дачвыхчапI. Асабиква амгIва таразта йахъысра шатахъу, асветофор йгIанарбауа амашинанкъвцагIвчва йшдырхъйуш, амгIваква рнадзара шбзийызлуш атемаквала здырраква зрыбагъьаз апхьагIвчва йрайцIбачву рыхъазла швапхата йалуаштI.