АМАМЫР ХЧАРА – ХЪАЦIА УЫСПI

Февраль а 22 Черкесск город акультура Дворец апны Абашта ахчагIвы йы-Мш йазынархата айззара акIвшатI. Ауи йалан КЧР а-Хъада ТЕМРЕЗОВ Рашид, КЧР АуагIа Айззара (а-Парламент) а-Председатель ИВАНОВ Александр, адепутатква, КЧР а-Правительства анхагIвчва, КЧР а-Верховна суд апредседатель СЕМЕНОВ Руслан, КЧР айсра комиссар ТЕМЫР Арсен, хIреспублика ахабзахчара органква рунашвачпагIвчва, айсра комиссариатква, акъральыгIва йгьи амуниципальна власть органква рынхагIвчва, ажвлара организацияква ргIащтийыгIвчва, адиннкъвгагIвчва, чкIвыныргIа. Айззара Россия Федерация йгьи Къарча-Черкес ргимнквала йгIахъыртIытI. УадыргIвана хIкъраль, хIреспублика йгьи хъахчарала РФ а-Министерства рбаракъква асцена йхъаргылтI. Айззара акIвзыршуз Россия Федерация а-Президент Путин Владимир хIреспублика абзазагIвчва йгьи КЧР а-Хъада йырзыгIанайырхаз ахIвахIвра йгIапхьатI. «Йапшым асквшква рагIан хIкъраль ахъахвитра йазгылыз хIабадучва йгIадырбаз афырра хIхъа аладута хIаквчважвитI. Ауат ршвапхала йгIадзынгылыз, Россия ар апатриот хабзаква дымрыдзуата, зборч йазцIабыргта з-Псадгьыл къвырльыкъв азызхаз щардагIвыпI. Ауат уахьчIва йырчIахIхIитI, хIрызхIвахIвитI» – йаныпI хIкъраль а-Хъада йхIвахIвра. Темрезов Рашид хIкъраль атынчра, ауагIаква ршварагIварадара йрызгылу ахабзахчагIвчва, ар акъвырльыкъвхара аветеранква агвыргъьахъвла драйхIвахIвтI. – Россия ар акъвырльыкъвхара хабзаква йрызцIабыргта з-Абашта зхчауа аофицерква, ар йалахым айсра къвырльыкъвхагIвчва февраль а 23 агвыргъьахъвла хIрайхIвахIвитI. ХIкъраль ар ангIанша йгIашIарышвта къвырльыкъв зхуз абанпараква хI-Псадгьыл ахъахвитра, ауагIа ртынчра рхчауата хъацIара ду гIадырбатI. Ауат рфырра атурых йгIалахатI. УыжвгIанчIви Россия апны айсра ъачIвагIа гIалызхта гвыцкьала зборч зырхъйауа акъвырльыкъвхагIвчвагьи Россия агIальаматраква йрызгылата чIахIрала рборч дырхъйитI, – йхIватI Темрезов Рашид. Ауи хIреспублика йаныргIалу Россия архъвква хIкъраль ашварагIварадара ахъазла магIныта йрыму гIаликIгIатI. – Къарча-Черкес йаныргIалу архъвква рпны зборч гвхътIыла йзырхъйауа акъвырльыкъвхагIвчвагьи уахьчIва агвыргъьахъвла пхата хIрайхIвахIвитI. Ауат хъацIара, чхIара рылата тынчта хIъабзазауа ашта рхчитI, – йгIаликIгIатI Темрезов Рашид. Ауи айсыгIвчва-интернационалистква, йапшым айсраква йрылаз аветеранква хIкъраль агIальаматраква йрызгылата рборч абгата йшдырхъйаз йхIватI, ауат аразыра ажваква рзынайырхатI. – УахьчIва йбзазауа йгьи йхIыщтагIайуаш абанпараква рыхъазла Абашта айсра Ду асквшква рагIан хъамайгьдзара йгьи фырра гIазырбаз хIабачва йанакIвызлакIгьи йшвапхазлуштI. Ауат рхъацIара анцIрала хI-Псадгьыл атурых йалазлуштI. ХIреспублика йауата «Совет Союз а-Фыр» хьзы гIазквнадыргаз хIхъа рыладута рхъацIара хIаквчважвитI. Афырква йгIвбахауа адуней айсра анакIвшуз хIкъраль ахъахвитра йазгылата хъамайгьдзара гIадырбатI. Ауат ршвапхала йгIадзынгылтI Афганистан апны хъацIара гIазырбаз айсыгIвчваинтернационалистквагьи. Хвду ззызбауа Абашта ахчагIвчва! ЗгIвадара багъьа, нцIра ауыра, насып швымазтI, йанакIвызлакIгьи ймамыру ажвгIванд швхъадзгылазтI, – йгIаликIгIатI КЧР а-Хъада. Темрезов Рашид акъральгIвчва ршварагIварадара адызгалуа, чкIвыныргIа акъвырльыкъвхара йазрыхIазырра сквшщарда йазынхауа ачIахIра хьызква рквнайыргатI. Аполковник Хапаев Руслан «Къарча-Черкес Республикала гIатгара зму ашварагIварадара органква рынхагIвы» ЧIахIра хьзы данкъвгагIвхатI. Къарча город йгьи Къарча район райсра комиссар Алакаев Джанбулат, ар йалахым акапитан, Афганистан айсра йалаз Джьмакъвыл Владимир, КЧР айсра комиссариат ахъвшараква рунашвачпагIвчва Щыбзыхва Асланбакь, Лутов Евгений, КъарчачкIвын район айсра комиссар Узденов Азнауыр «Къарча-Черкес Республикала гIатгара зму акъральыгIва къвырльыкъвхара анхагIвы» ЧIахIра хьызква рквнайыргатI. Афганистан айсра аныкъвадыкъваква рыжвлара организация – «Айсра аныкъвадыкъваква» социальна проектквала ахъвшара аунашвачпагIв Дюрменов Юсуф «КъарчаЧеркес Республикала гIатгара зму ауагIа рсоциальна хчара анхагIвы» ЧIахIра хьзы данкъвгагIвхатI. – «Айсра аныкъвадыкъваква» КЧР-ла ахъвшара апредседатель ахвитнагIа уысквала йцхърагIагIв Гурин Федор «Къарча-Черкес Республикала гIатгара зму ауацIа уысквала аорганква рынхагIвы» ЧIахIра хьзы йквнайыргатI. Темрезов Рашид зхачIвква гвхътIыла йзырхъйауа ахабзахчара органква рынхагIвчва, ар акъвырльыкъвхагIвчва, КЧР айсра комиссариат анхагIвчва аразыра швъаква риттI. Ари артшхъвагала йгIаликIгIаз дрыуапI КЧР айсра комиссариат анхагIвы Ажьи Руслан. Адепутатква рыхьызла Иванов Александр агвыргъьахъв ззынарху зымгIва драйхIвахIвтI, хIреспублика йаныргIалу й-20096- хауа йгьи й-01485-хауа айсра рхъвква ркъвырльыкъвхагIвчва, КЧР айсра комиссариат анхагIвчва АуагIа Айззара (а-Парламент) а-Президиум а-ЧIахIра грамотаква риттI. – Айсра ъачIвагIа гIалызхта хI-Абашта ахчара йазгылу сшырзыразу гIалскIгIауата агвыргъьахъвла пхата сшвайхIвахIвитI. Хвду ззыгIбауа аветеранква квырмыш рзыхIчпитI, згIвадара, тгIачвала тынчра рзыстахъта срайхIвахIвитI. УахьчIва Россия Абджьар Къаруква йрылата хI-Псадгьыл зхчауа чкIвыныргIагьи хъацIарала рборч дырхъйарныс, «Абашта ахчагIвы» хьзы рхъа щтIыхта йынкъвыргарныс рзыстахъпI, – йхIватI Иванов Александр. КЧР айсра комиссар Темыр Арсен йгIайззаз Абашта ахчагIвы йыМшла драйхIвахIвтI, КЧР айсра комиссариат йагъьу анхагIвчва хъахчарала РФ а-Министерства артшхъвагаква йгьи айсра чынква шгIарквнадыргазла ашвъаква риттI. Ауат дрыуапI лейтенант ахIба чын зыртыз КЧР айсра комиссариат ахъвшара аунашвачпагIв Казаков Давид. Ари атшын Абашта ахчагIвчва рыхъазла йгIадырбаз аконцерт зымгIвагьи йыргвапхатI. Черкесск город йаныргIалу чкIвыныргIа райсра-патриот бжьарала а-Квта агIащтийыгIвчва айсра фашаква ршвыта ауатыкв йгIаталтI. АшвахIвагIв Батчаев Таулан, «КIавкIаз акъральгIвынахчагIв» гвып ахъацIара, апатриотра йырзынарху ашваквала агвыргъьахъв йалаз рнашх гIащтIырхтI.