Аламат саугъала

Декабрны 29-да Черкесскени ара майданында 25 школгъа автобусла, 15 медицина учреждениеге да «Терк болушлукъну» машиналары берилгендиле. Джангы джыл байрамны аллы бла эсде къаллыкъ ашхы ишлени бири эди ол.

КъЧР-ни Башчысы Темрезланы Рашид, шахар, эл тамадаланы къолларына джангы машиналаны ачхычларын къууанч халда тутдургъан кюн джыйылгъанланы алларында джылы сёлеше, окъууну, медицинаны тыйыншлы транспорт бла баджарыу Президент Владимир Путинни ол санагъатланы автопаркларын джангыртыу программасыны энтда бир атламы болгъанын чертгенди.
- Бизни республикада акъыллы, фахмулу сабийле джашайдыла. Биз алагъа окъууда, спортда, башха ишледе кеслерин кёргюзюрча болум къураргъа керекбиз, - дегенди республиканы Башчысы.
- Мен район башчы болуб ишлеген 15 джылны ичинде республикагъа бир джолгъа быллай бир техника биринчи кере бериледи. Къобан районубузгъа, сёз ючюн, 4 школ автобус бла «Терк болушлукъну» бир машинасы берилди. Ол аламат саугъады. Республиканы Башчысы Темрезланы Рашидни къайгъырыуу бла, тыйыншлы структуралагъа сёзюн ётдюре билиую бла баджарылгъан джумушду ол, - деб сёлешгенди къууанч джыйылыуда Къобан районну башчысы Къазийланы Хусейн.