СКФО В Северной Осетии в 2024 году появятся прямые авиарейсы в Нижний Новгород СКФО Сельхозкооперативы в КБР набирают популярность Актуально Региональный этап Всероссийской олимпиады по истории российского предпринимательства прошел в КЧР на базе КЧГУ Актуально Глава КЧР Рашид Темрезов в Приэльбрусье встретился с активистами Общероссийского движения детей и молодежи «Движение Первых» Актуально Глава КЧР Рашид Темрезов в Тырныаузе КБР принял участие в открытии Дворца культуры им. Кайсына Кулиева

АКЪРАЛЬЫГIВА ЦХЪРАГIАРАКВАЛА АБАРГВЫРАКВА ЙРЫЛДЗГIИТI

19.07.2019 212
АКЪРАЛЬЫГIВА ЦХЪРАГIАРАКВАЛА АБАРГВЫРАКВА ЙРЫЛДЗГIИТI
Июль а 4 КЧР Ажвлара палата апны хIреспублика абзазагIвчва хъвшвыла йадгалрала апрограмма абзазара йшаларжьуа йъалачважваз айззара акIвшатI. Ауи йалан социальна политикала, ауагIа рызгIвадарахчарала йгьи экологияла КЧР АуагIа Айззара (а-Парламент) акомитет апредседатель ЧЕРВОНОВА Елена, згIвадарахчарала КЧР аминистр йзаместитель КИПКЕЕВА Тамара, нхарали социальна тшауацIыхрали КЧР аминистр йзаместитель ПРЫГУНОВА Ольга, КЧР Ажвлара палата апредседатель МОЛДОВАНОВА Вера, ауи лзаместитель ГВАНА Игорь, азгIвадарахчара хъпшылра ахъцIарала «Росздравнадзор» Федеральна къвырльыкъвхарта КЧР-ла ашIыпIа нхарта аунашвачпагIв ХАПЧАЕВ Башир, Черкесск амедицина колледж адиректор ЭРТУЕВ Рашид, хIреспублика амедицина нхартаква ргIащтийыгIвчва, ажвлара организацияква йрылу. Айззара акIвзыршуз Эртуев Рашид ласыта йуызмырбзихауа азгIваква зхьуа ачымазагIвква (аныкъвадыкъваквагьи рылата) хъвшвыла йадыргалуата абаргвыраква йшрынйауа гIайхIватI. – ЙцIыхъвахауа асквшква хIреспублика акъральгIвчва хвыдъа йырзалхчIву ахъвшвква йнахъауата йшырзынамдзауа зымгIвагьи йыгIдыритI. Йара хъвшвы йапымшвтуата йыздызгалра атахъу ачымазагIвква ансисквшагьи йрылахIитI. АчымазагIвква ззыбжу ахъвшвква хвыдъа йанырзынамдзара дара рахчала йырхвгIара атахъхитI. АщардагIв ахъвшвква рхвгIарныс гьыртлакIьуам. Ари ауыс зрыласуаш амальква хIрылачважвара ахъазла уахьчIва хIайззатI, – йхIватI Эртуев Рашид. Хапчаев Башир йшихIвазла, асквш 2018 агIан хвыдъа хъвшвы шрадзауа йазыразым йыртшазынархарата 281 йрылапштI. СынчIва июль а 1 агIарбараквала атшазынархараква 150 йнадзитI. «Росздравнадзор» КЧР-ла ашIыпIа хъвшара аъачIвагIагIвчва ауагIа зрашшуа абаргвыраква алдыргауата архъвыхраква акIвдыршитI. АкъральгIвчва хвыдъа хъвшвы рзалхрала йгIаншауа амыгIвхъгараква йырпшIагылуа амальква ангIадрысабапуа згIвадарахчарала КЧР а-Министерства ацхърагIарагьи гIарадзитI. – АуагIа ртшазынархараквала йакIвхIыршаз архъвыхраква йшгIадырбазла, альгот рецептквала аптекаква йшатахъу апшта хъвшвы гьпшцIырщтуам. Йауа ухIварыквын, ауатгьи йанакIвызлакIгьи ахъвшвква зымгIва гьрымам, ауаса амаль амамкIва ачымазагIвква хъвшвыла йадыргалырныс рборчпI. Ауи рзымчпапхьадза ауагIаква рашшраквагьи щардахитI. Амедицина нхагIвчва ачымазагIвква йрыдыргалра атахъу ахъвшвква тамамта йанырзыщаквмыргылуа агIаншараквагьи гьмачIым. Ауи апш аквымшвара ангIаншара абюджет ахчаквагьи файдакIгьи гIарымгуата йгIарысабапхитI, – йгIаликIгIатI Хапчаев Башир. Ауи датшагьи фачыгIв диабет зхьуа ачымазагIвква хвыдъа йырзалырхра атахъу ахъвшвква анпшцIырщтуа абаргвыраква шгIаншауа гIаликIгIатI. – ФачыгIв диабет зхьуа ачымазагIвква хвыдъа хъвшвы гIадрысабапра ахъазла Черкесск город йаныргIалу эндокринология диспансер тшазынадырхара атахъхитI. ХIреспублика апны ауи амедицина нхартазаджвыкI акIвпI ауи апш хъвшвыла ачымазагIвква адызгалуа. Черкесск город йачвыхъару акъральгIвчва ззыбжу ахъвшвква раура ахъазла гIвагвана ауыра гIамырдара атахъхитI. Ауыгьи ачымазагIвква рхвитнагIаква мыгIвхъызгауа баргвырапI, – йхIватI Хапчаев Башир. Айззара апны йшгIалыркIгIазла, асквш 2019, январь а 1 агIарбараквала хIреспубликала 57568-гIвы хвыдъа хъвшвы рзалырхра атахъыта ашвъа йаныпI. АкъральгIвчва ахъвшвква рцынхъвы ахча (заджвы сом 800) пшцIыргарныс ахабза йархвититI. Ауаса ари ацхърагIара гIазрысабапуа рщардагIв ахъвшвква ртарала ахча ъапшцIыргауа йгIалцIла абаргвыраква гIаншитI. АкъральгIвчва хъвшвыла йадгалра йазалху апрограмма апкъ йтата цхърагIара здрадзауа йрыуата 49624-гIв (асквш 2019, январь а 1 агIарбарала процент 80 йрайхIапI) хвыдъа йырзалырхра атахъу ахъвшвква ртарала ахча пшцIыргарныс шыртахъу гIадырбатI. ЙтлапIам хъвшвы здызгалуа рыхъазла ахъвшвква рхвгIара гьбаргвым. Ауаса сом хвынзыкь йайхIата йахву хъвшвы ззымхвгIауа щардагIвыпI. Ахъвшвква ртарала ахча ъапшцIыргауа йгIалцIла, сом зыкьпхьадзара йахву хъвшвы йаназыбжахара йызларцхърагIуш ахча гьрызхъахуам. Хвыдъа хъвшвы ззалырхуа рщардагIв ныкъвадыкъвапI. Ари ацхърагIара гIазрысабапуа акъральгIвчва хвыдъа хъвшвы пшцIыргуши йа ахчата йгIадрысабапуаши ансисквша октябрь а 1 намдзаскIва йщаквдыргылра атахъыпI. Асквш 2019, июль а 1 агIарбараквала хвыдъа хъвшвы ззалырхра атахъу акъральгIвчва 723-гIв гIарылахIахьатI. СынчIва асквшбжа ауацIа ужвыгьи 938-гIв хвыдъа хъвшвы пшцIыргарныс шыртахъым гIадырбахьатI, – йхIватI Хапчаев Башир. ЗгIвадарахчарала КЧР а-Министерства, КЧР АуагIа Айззара (а-Парламент) ргIащтийыгIвчвагьи Хапчаев Башир дызквгIашIасыз ауысквала баргвыра шаъу дрыбагъьатI. Кипкеева Тамара хъвшвы здзымгалкIва йамуа ачымазагIвква йырзынарху асоциальна-медицина цхърагIараква шадыргалуа йауацIыхта дгIаквчважватI, ахъвшвква рхвгIара апны абюджет ахчаква шгIадрысабапуа гIалхIватI. Червонова Елена йшылпхьадзауала, чымазагIвкI ахъвшвква ртарала йзалырхуа асом 800 йаладмырхIакIва апрограмма алшараква гьагъьхушым. Молдованова Вера хIреспублика акытква рпны афельдшер-акушер пунктква, амбулаторияква ачымазагIв хIатлаква рыхъазла рецептла ахъвшвква ъапшцIырымщтуа абаргвыраква шгIаннаршауа гIалылкIгIатI. Ари ауысла йгIачважваз Кипкеева Тамара араса йылхIватI: «Акытква рпны йынхауа амедицина нхартаква йуызмырбзихауа азгIваква зхьуа ачымазагIвква рыхъазла наркотик злу хъвшвы пшцIырщт йъахвитым швхIаусыгIва амапI. А-ФАПква, амбулаторияква ауи апш хъвшвы ъархчуш щтIацIартала йадгалазтынгьи, ауат йырхъпшылуаш, уахъынла йызчIапщуш датахъыпI. Наркотик злу ахъвшвква ргъычырныс шварагIварапI». Айззара йалаз хвыдъа хъвшвы ззалырхра атахъу акъральгIвчва зрашшуа абаргвыраква йрылзырдзгIуш амальква нарахвырныс йагвынгIвытI. Ари ауыс адызгалуа аъачIвагIагIвчва ачымазагIвква ахъвшвква ртара йырзалырхуа ахча йшаладырхIушла афедеральна квта тшазынадырхарныс пычIв уыста йгIалыркIгIатI. 
212 просмотров

Читайте также



Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный