АКЪРАЛЬГIВЧВА АЦIАБЫРГ РЗЫНАДЫРДЗИТI

Декабрь а 5–6 рагIан Грозна город апны йцIасхаз СКФО ахабарргагаква й-VI-хауа райззара акIвшатI. СынчIва дуней магIны змата йщаквдыргылыз айззара журналистта зкьгIвы аднакIылтI. Ажурналистква йырхъазымкIва ауи йалан СКФО асубъектква рунашвачпагIвчва, ахабарргагаква рынхара йазынарху апроект пхатшаква абзазара йалазжьуа аъачIвагIагIвчва. СКФО ахабарргагаква й-VI-хауа райззара агIахътIра йазынархаз алачIвара йалан СКФО-ла РФ а-Президент йгIащтийыгIв йзаместитель СТАРИКОВ Сергей, Чачан Республика а-Правительства а-Председатель ХУЧИЕВ Муслим, ауагIахъа политикала, связьла, печатьла йгьи ахабарквала Чачан Республика аминистр УМАРОВ Джамбулат, Лагъь КIавкIаз ахабарргагаква р-Ассоциация апредседатель БАКАНОВ Вадим, «Экспертный центр электронного государства» АНО агенеральна директор ФИЛАТОВ Леонид, СКФО аштаква ргазетква, ртелеканалква рынхагIвчва. Айззара йалаз уыжвгIанчIви заман апны авластьи ахабарргагакви рацынхара йаквчважватI. – Адунейла хабарргагата йаъу щарда йнадзитI, ауат ансимшгьи йгIарылахIитI. ЙакIвым згIвуа, ахабарква ацазкIуагьи гьмачIгIвым. Ауат йацаркIуа агIаншараква алзыргата ацIабырг ззыгIащаквыргылхуа зуыс йазъазу ажурналистква ракIвпI. Ауаса йанаъазара, ажва йахвитта СКФО-ла, хIкъральла псахрата йыншауа тамамта йызгIвуа, йгIазырбауа, йгIазхIвауа, нхарала йкъаймату йгIарыквчважвауа ажурналистква рынхара магIын ду амапI, – йхIватI Стариков Сергей. Хучиев Муслим Чачан Республика а-Хъада Кадыров Рамзан йыхьызла асасчва тшырзынайырхатI. – Авластьи ажурналисткви ркъарула йадыргалуа айззара цIас пшдза нкъвнагитI, ауи СКФО-ла йакIвшауа айззара хъадаква йрыуата йхIпхьадзитI. Ажурналистква зынйауа абаргвыраква, агазетква, ажурналква, ателеканалква рынхара йъаквчважвауа джьащахъвата йакIвшалитI. УыжвгIанчIви заман апны авластьи ахабарргагакви рацынхара магIын ду амапI. Ажвлара баргвырата йзынйауа, СКФО апны псахра бзита йыншауа, хIуагIа йгIарыквчважвауа ажурналистква йанакIвызлакIгьи рынхара йацхIкIуаштI, – йхIватI Хучиев Муслим. Ауи йшгIаликIгIазла, йцIыхъвахауа асквшква Лагъь КIавкIаз асоциальна-экономика нархараквала бзита тшауацIнахитI, аинвесторква гIахъызкъьалуа апсахраква щардапI. Ари ауыс апны ажурналистква рынхарагьи магIын ду амапI. – Швара СКФО штшапсахуа, араъа бзита штшузыпщуш, уызгIвадара шурыбагъьуш шваквчважвалитI, КIавкIаз зыргвымхарныс йащту швырпшIагылуата швкъаругьи швдырраквагьи азынашвырхитI. Ауи ахъазла зымгIвагьи сшвзыразпI, – йхIватI Хучиев Муслим. Айззара акIвзыршуз РФ Ажвлара палата апны йгIаныршу ахабарргагаква йгьи ажвлара коммуникацияква ртшауацIыхрала акомиссия апредседатель йзаместитель Малькевич Александр йшихIвазла, сынчIва айззара апны ажурналистква йабадырра йахъазымкIва, рынхара швапха амырдарныс рылшуштI. – Ажурналистква зынйауа абаргвыраква араъа йгIадрайгваз авласть йалу йддырдыруаштI, йапшым анархараквала айчважвараква акIвдыршуштI. Ари йапшу айззараква рбзирала КIавкIаз йгьи Россия ртшауацIыхра йацхърагIауа апсахраква ншитI, – йгIаликIгIатI Малькевич Александр. Айззара апны датшагьи хIкъральла йахъазымкIва адунейла зыхьыз бергьльу ажурналистква, ажвлара уыснкъвгагIвчва гIачважватI. Афорум ангIахъыртIы амщтахь ажурналистква рыхъазла йадыргалыз айчважвараква хъвлапныдза йакIвшатI. Малькевич Александр йакIвйыршаз алачIвара апны ахабарргагаква рынхара апны ауыжвгIанчIви технологияква, йалкIгIата, Интернет апны ацхърагIараква ргIарысабапра йаквчважватI. «Постскриптум» хабар-аналитика программа акорреспондент Перевезенцев Роман дъагIачважвуз анйара абзазара ъатынчым, йшварагIвару аштаква рпны ажурналистква рынхара шадыргалуа гIархIватI. СКФО ахабарргагаква райззара апкъ йтата Чачан къральыгIва университет йакIвшаз анйара апны ажурналист, «Матч ТВ» федеральна спорт телеканал агенеральна продюсер Канделаки Тина ауыжвгIанчIви хабарргагаква ртшауацIыхра йазарархауа абаргвыраква ауатыкв йгIаталгатI, ауагIахъаква ращтаныкъвара рыбагъьара апны ажурналистква рынхара магIныта йаму даквчважватI. АХАБАРРГАГАКВА РГIАРБАРА СКФО йаланакIуа аштаква йадыргалыз ахабарргагаква ргIарбарагьи джьащахъван. Лагъь-КIавкIаз Федеральна округла РФ а-Президент йгIащтийыгIв МАТОВНИКОВ Александр, Лагъь КIавкIаз ауысквала РФ аминистр ЧЕБОТАРЕВ Сергей, Чачан Республика а-Хъада КАДЫРОВ Рамзан, Къарча-Черкес Республика а-Хъада ТЕМРЕЗОВ Рашид, Дагъстан Республика а-Хъада ВАСИЛЬЕВ Владимир, Лагъь Осетия (Алания) Республика а-Хъада БИТАРОВ Вячеслав, Ингвыщ Республика а-Хъада ЕВКУРОВ Юнус-Бек, КъабардБалкъар Республика а-Хъада йхъвдаквцIараква зырхъйауа КIВАКIВА КIазбек, Ставрополь край а-Губернатор ВЛАДИМИРОВ Владимир, афедеральна власть органква рынхагIвчва аэлектронна хабарргагаква, апечать гIацIщтраква йрыхадыргIвазатI, ажурналистква йгIадрысабапуа ауыжвгIанчIви техника ддырбатI. Акъвнакъра йазынархаз КЧР агIарбара йгIадгылыз зымгIва йрымаджьащахъвахатI. ХIреспубликала йгIацIцIуа «День республики», «Абазашта», «Къарачай», «Черкес хэку», «Ногай давысы» уагIахъа газетква абзазара йаларжьуа «Къвнакъра» проект ауагIахъаква ращтаныкъвара рыбагъьара ахъазла магIныта йаму йгIаквчважватI. МызкIы апны зны ахвгазеткI йырзацалу анапа агIацIщтра хIышта апны айгвари акъыльаквшвари шщаквгылу йшагIарбагу гIалыркIгIатI. АгIарбара адгалагIвчва акъвнакъра йазынархата йдрыхIазырыз адзыхъагIаква, ахIальыуа хъылпа щардагIвы йыршIашватI. СКФО асубъектква рунашвачпагIвчва рыхъазла йдрыхIазырыз асогIаква ргвапхатI. АгIарбара апны мшIыла йчпу хIачIащ андыргIалтI. Ауи «ахъышвква» рпны хIреспублика апсабара апшдзараква гIатанарышвуан. Атдзы чкIвын адзхъа йгылаз апхъанчIви «хIакв» атшгIва пхан, ачуан хъвын. «АхIакв» ахъахь йыквыз аэкран апны «Къвнакъра» проект йгIаквчважвуз ахабарква гIатанарышвуан. АуыжвгIанчIви технологияквала йадыргалыз КЧР агIарбара йгIадгылыз зымгIва йрымаджьащахъвахатI. – Хабза пшдза нкъвызгуз хIапхъанчIвиква рабабари ращтаныкъвари йгIахъшахъыцIыз акъвнакъра ъашвымрыдзуа ахъазла сшвзыразпI. Апхъахьылагьи ари анархарала швацынхара рыцIагьи йшврыбагъьа, – йхIватI КЧР агIарбара адгалагIвчва аразыра ажваква рзынайырхауата Темрезов Рашид. Ставрополь ажурналистква йадыргалыз агIарбарагьи джьащахъван. Ауи адгалагIвчва СКФО асубъектква рунашвачпагIвчва ахабарргагаква райззара ахъазла ргвгIанаграква абльын йанырцIарныс йрыхIватI. КЧР а-Хъада Темрезов Рашидгьи арахьарат ареспубликаква рунашвачпагIвчвагьи абльын йанырцIаз «Ахабарргагаква ацIабырг швазгылазтI, абзираква швщардазтI» ажваква СКФО ахабарргагаква райззара атурых гIаншара пшдзата йгIалахуштI. «ХIАЦЫНХАРА АГЪЬЫЗЧIВУА ЩАРДАЗТI» СКФО ахабарргагаква ргIарбара амщтахь йакIвшаз алачIвара апны йгIачважватI Лагъь-КIавкIаз Федеральна округла РФ а-Президент йгIащтийыгIв Матовников Александр, Лагъь КIавкIаз ауысквала РФ аминистр Чеботарев Сергей, Чачан Республика а-Хъада Кадыров Рамзан, Къарча-Черкес Республика а-Хъада Темрезов Рашид, Дагъстан Республика а-Хъада Васильев Владимир, Лагъь Осетия (Алания) Республика а-Хъада Битаров Вячеслав, Ингвыщ Республика а-Хъада Евкуров ЮнусБек, Къабард-Балкъар Республика а-Хъада йхъвдаквцIараква зырхъйауа КIвакIва КIазбек, Ставрополь край а-Губернатор Владимиров Владимир. Матовников Александр ажурналистква тшырзынайырхауата йшихIвазла, Лагъь КIавкIаз апны дута уызквчважвуш, йгIауырбуш псахра бзита йыншауа гьмачIым. Ауаса ажурналистква агвымхараква руысла хабарта йдыргауа рыцIа йщардапI. – КIавкIаз апны абзазара штынчу гIазгвнымгIвуа щардагIвыпI, ауи хIышта атшауацIыхра йазарархитI. Швари хIари хIацзакIыта СКФО ашIыпIаква рпшдзара, араъа тынчта йацбзазауа ауагIахъаква рхабзаква, ркультура, хIадгьыл апны уынхарныс, тшпсущарныс, уыла уырпшырныс шшварагIварам ауагIа йшрылагIгуш хIазшвырхъвыц. ХIацынхара агъьызчIвуа ауысква щардазтI, – хIва ажурналистква тшырзынайырхатI Матовников Александр. Ауи йшгIаликIгIазла, РФ а-Президент й-Администрация анхагIвчва Кавказские Минеральные Воды апны экономика форум ансисквша йшакIвдыршуш йащтата адгалра уысква йрыквчважвитI. – СКФО апны апсахра бзиква, азгIвадара йахъвауа пкъыгIва цкьа щарда араъа йшгIадырхарджьуа хIрыквчважваларквын, цхърагIара дута йхIзалуаштI. Ари ауыс апны ажурналистквагьи рынхара магIын ду амапI, – йгIаликIгIатI Матовников Александр. Чеботарев Сергей йцIасхаз афорум акIвыршара йшацикIуа гIайырбауата, авластьи ажурналисткви рацынхара агIвхъатакIгьи ргIальаматраква шалу гIаликIгIатI. – Авласть шынхауа ауагIа йырдырра ахъазла ачыннкъвгагIвчви ажурналисткви аргваныта йацынхара атахъыпI. ХIацынхара агъьхIчIвра ахъазла ауагIа йрылажвгауа ахабар бзиква шщардазлуш хIазынхуштI, – йхIватI Чеботарев Сергей. Кадыров Рамзан йапшым агIаншараква рхабар андыргауа апсахра бзиква злазхIвауа абзазагIвчва ргвгIанаграквагьи ддырхIварныс йаквгIазшIиттI. – Авласть шынхауа ауагIа йырбитI, абзазара штшапсахуа ауат ракIвпI тамамта йгIауазхIвуаш. Ажурналистква йапшым агIаншараква рхабар швыргара апхъала, абзазагIвчва ргвгIанаграква шврыздзыргIврыквын рыцIа йтамамхуштI, – йхIватI Кадыров Рамзан. Евкуров Юнус-Бек ажурналистква йырхIвауа, йыргIвуа ажва ахъазла джьауап шыркIуа гIаликIгIатI йгьи хабар бзи щарда ауагIа йрыларгарныс йаквгIазшIиттI. Ауи йхIваз йацикIуата йгIачважваз КIвакIва КIазбекгьи ахабарргагаква штшауацIырхуа апшта, ажурналистква рынхара апынгьи апсахраква шгIалалуа, ажвлара йцIабыргу хабар рдырырныс шыртахъу гIаликIгIатI. Темрезов Рашид йшихIвазла, йцIыхъвахауа асквшква ажурналистква СКФО апны апсахра бзиква рхабар рыцIа щардата йдыргитI, апхъахьылагьи ари анархарала ауысква рыцIагьи йшбзихуш йазхъайцIитI. – Матовников Александр йхIваз тамампI. Ажурналистква КIавкIаз йанаквчважвауа ацIабырг йазгылата апсахра бзиква рхабар дыргара атахъыпI. ХIара хIызквчважвуш, ауагIа йдхIырбуш хIщардапI. УахьчIва КIавкIаз атшауацIыхра мгIва йтагылата апхъала йшчIвырхъауа, араъа абзазара штынчу, апсабара швабыжта йшпшдзу ауагIа йрылагара магIын ду амапI, – йгIаликIгIатI Темрезов Рашид. Владимиров Владимир йшихIвазла, ажурналистква ачыннкъвгагIвчагьи абзазагIвчвагьи йрымзарархауата йынхара атахъыпI. – Авласть, ажвлара йгьи ахабарргагаква йапшым ауагIахъаква тынчта йъабзазауа Лагъь КIавкIаз акъагIари атшауацIыхри йырзынхарныс рборчпI, – йгIаликIгIатI Ставрополь край а-Губернатор. Айззара апны датшагьи йгIачважватI «Матч ТВ» федеральна спорт телеканал агенеральна продюсер Канделаки Тина, «Российская ассоциация по связям с общественностью» апрезидент Наумов Станислав, «Ruptly» видеоагентства адиректор Кешишев Дмитрий, аинтернет сайтква, афедеральна хабарргагаква рунашвачпагIвчва, агазетква рредакторква. Айззара апкъ йтата ажурналист нхараква ранкъвакъврагьи адыргалтI. АдгалагIвчва нхарата, проектта 400 райхIа йрылапштI, ажурналистква, ахабарргагаква асогIаква рырттI. «Апечать гIацIщтра апны йагъьу проект» номинация апны «День республики», «Абазашта», «Къарачай», «Черкес хэку», «Ногай давысы» уагIахъа газетква абзазара йаларжьуа «Къвнакъра» проект апхъагылара акIытI. Анкъвакъвра адгалагIвчва агазетква рредакторква йгIарайхIвахIвтI, диплом гIарквнадыргатI. «Кавказ гостеприимный», «Сохраним Кавказ», «Лучшая телекомпания» номинацияква рпны йагъьта йгIалыркIгIатI «Архыз–24» телеканал ажурналистква Лайпанова Мадина, Чква Эрнест, Мамаева Асйат. СКФО ахабарргагаква ржурналистква йырзацалу ахачIвква, йзынйауа абаргвыраква йрылачважварныс, ршвапха амырдарныс рылзыршауа айззара ари азынгьи джьащахъвата йакIвшатI. Афорум адгалагIвчва хабар шдыргазла, хIапхъа СКФО ажурналистква райззара Дагъстан, Махачкала город йакIвшуштI.