АХЪВМАРРАКВА ЙРАПХЪАГЫЛАГIВХАЗ АРТШХЪВАГАКВА РЫРТТI

ХIреспубликала йакIвшаз «Президент спорт хъвмарраква», «Президент анкъвакъвраква» йрапхъагылагIвхаз апхьагIвчва йрайхIвахIвырныс, артшхъвагаква рквнадыргарныс Черкесск город йаныргIалу «Купол» спорт комплекс йдрайгватI. Ауаъа ауат йгIарынйатI арыпхьарали наукали КЧР аминистр лзаместитель Бекижева ФатIима, физкультурали спортли КЧР аминистр йапхъахауа йзаместитель ТХIАГЪАПСА АхIмад. Россия апхьагIвчва руацIала а-Президент спорт хъвмарракви анкъвакъвракви асквш 2011 йгIашIарышвта йакIвдыршитI. Ауи уагIа щарда здкIылу афизкультури аспорти ртшауацIыхра йазынарху амальква йрыуапI, анкъвакъвраква йрылалуа ансисквшагьи йрылахIитI. Асквш 2017 хIреспубликала йакIвшаз апрезидент анкъвакъвраква КЧР апхьагIвчва рпроцент 96,7 алалтI. – Асабиква рызгIвадара рыбагъьара, афизкультури аспорти йхънарыхра йырзынарху апрезидент хъвмарракви анкъвакъвракви ракIвыршара цIасхатI. ХIреспубликала йадыгIгаллауа анкъвакъвраква йрылалуа йъарылахIауа хIайгвыргъьитI. ХIсабиква афизкультури аспорти йрыквзыргвышхвауа, йрыдынхалуа абжьагIвчва, апхьагIвчва хIреспубликала асаби спорт атшауацIыхра гвыхътIыла швъазынхауа ахъазла сшвзыразпI, – лхIватI Бекижева ФатIима. ТхIагъапса АхIмад физкультурали спортли КЧР аминистр Узденов Рашид йыхьызла асабиква драйхIвахIвтI. – ХIреспубликала апрезидент хъвмарракви анкъвакъвракви шакIвшазла хIразыпI, ауат йрылаз асабиква бзита тшгIашвырбатI. Афизкультури аспорти йрыдкIылу зымгIвагьи адахIвракви агIатгаракви швзыстахъпI. СынчIва сентябрь Туапсе город йакIвшуш апрезидент хъвмарраква рфинал йалазлуш хIсабиква апхъагылара швыма швгIахъынхIвыхырквын хIгвыргъьуштI, – йхIватI ТхIагъапса АхIмад. Бекижева ФатIима йгьи ТхIагъапса АхIмад «Президент спорт хъвмарраква», «Президент анкъвакъвраква» рпны бзита тшгIазырбаз агвыпкви абжьагIвчви акубокква, амедальква, аграмотаква рырттI. Акомандаква руацIала Черкесск город й-5-хауа Гимназия апхьагIвчва йапхъахауа агыларта ркIытI. Асабиква анкъвакъвра йазылрыхIазыртI абжьагIвы Хорольская Ольга Василий йпхIа. Й-9-хауа акласс асабиква руацIала Черкесск й-5-хауа Гимназия апхьагIвчва араъагьи зымгIва йшрагъьу гIадырбатI. Й-5-хауа Гимназия ахьызла агIвкомандакIгьи сынчIва Туапсе город йакIвшуш апрезидент хъвмарракви анкъвакъвракви рфинал апны тшгIадырбуштI. Ауат анкъвакъвраква йрылазлара йахъазымкIва, «Орленок», «Смена» саби тшпсщартаква рпны рыла дырпшуаштI, рызгIвадара дрыбагъьуштI. АгIарбараквала йгIвбахауа йгьи йхпахауа агылартаква зкIыз йрыуапI Къарча город й-3-хауа апхьарта, Устьджьгваты город й-2-хауа апхьарта. АршIыйара анкъвакъвра йшгIанарбазла, ХIабаз кыт йаныргIалу алицей-интернат апхьагIвчва зымгIва рацкIыс бзита тшгIадырбатI. Сторожевая станица аквтанай апхьарта йгIвбахауа агыларта аквнадыргатI. ЙынджьыгьчкIвын аквтанай апхьарта – йхпахауа