АХIБА ГВАТРА ЛЗАЛЫРХТI

Черкесск йаныргIалу «Мамаду» нхарта апны жьы, кIартIоф, ашвы ртата йырмацIауа ахчынква ргьама ауагIа йыргвапхадзитI, йызтахъу рахIварала йшпхаркIву рынхартаква йрыдыргалитI, рунагIваква йырзыргитI. Ауат зрыхIазыруа амацIаугIвчва йырзыразта йхIвахIвуа атгIачваква щардапI. ЙхIвара атахъыпI «Мамаду» агвчIагIвра уысквагьи джьгарта йшрылу. ЙагIвсыз амчыбыжь анхарта аунашвачпагIв Каргинова (Тльыс) Светлана лгIаджвыквцIарала йгьи «Абазашта» газет анхагIвчва рцхърагIарала Абашта айсра Ду аветеран ЧквтIу Урысби ХIамид йпа йыхьыз зхъырхIвалгIаз акция акIвшатI. Айсра апны фырра гIазырбаз ЧквтIу Урысби адуней дыквхмызтынгьи, ауагIа дшырхъмаштылуа йагIарбагата «Мамаду» нхарта йгьи «Абазашта» газет аредакция рщтийыгIвчва ЧквтIу Урысби йхъапщыла Аскьархан йлызцатI, асогIаква лырттI. Агвып ахIбата йрыцыз «Абазашта» газет асуратхъыхыгIв Швотыкъ Адльби агвчIагIвра адгалагIвчва рыхьызла ЧквтIу Аскьархан длайхIвахIвтI, согIа литтI. – Афронт йпшцIаз хIабадучва хI-Псадгьыл рхчауата йгIадырбаз ахъацIара зынгьи йыгьхIхъаштылуашым, адуней йыквхмызтынгьи, ауат хIыгвква йъадзарту йбзазлуштI. Айсра йгьи анхара рветеран ЧквтIу Урысби ХIамид йпа йтахъырала айсра дпшцIалта агъачва дырпшIагыла дшайсыз хIхъа аладута хIаквчважвитI. Урысби айсра амщтахь аколхоз гIащаквзыргылхуаз дрыцта нхарала йыхьыз шйыргаз йаквшахIатпI йгIайквнадыргаз артшхъвагаква. «Мамаду» нхарта йгьи «Абазашта» газет рунашвачпагIвчва йацгIаджвыквырцIаз агвчIагIвра уысгьи ауи йыхьыз ахъырхIвалгIатI. БызгIвадара йалымдзгIауата Урысбии бари йгIашвыцIагылыз асабиква бдыргвыргъьауа, аткъвым брыпшдзауа ужвыгьи сквшщарда бырбзаза, – йхIватI Швотыкъ Адльби аунагIва апшвыма тшылзынайырхауата. «Мамаду» анхагIвы Къвныжв Рэмгьи сынчIва май а 28 сквш 89 зхъыцIуаш ЧквтIу Аскьархан длайхIвахIвтI. Абашта ахчагIвы йы-Мш йазынархаз агвчIагIвра уыс зыхьыз ахъырхIвалгIаз аветеран ЧквтIу Урысби асквш 1925, февраль а 10 Псыжв кыт апны дйытI. Жвицсквша дыртата Абашта айсра Ду гIалагатI. Урысби асквш 1943 январь агIан йтахъырала афронт дпшцIалтI. Старая Церковь ангIадырхвитхуаз хIатлата дхвхатI. Урысби Уфа агоспиталь хымызкI дщтIан. ЙщапIы дгIахвындыргылхызтIхIва, йызгIвадара аъащала йпны дгIарщтихра атахъхатI. Асквш 1944 ацIыхъва Урысби айсра дгIапшцIыцIхтI. Ауи агъачва дырпшIагылата хъацIарата йгIайырбаз ахъазла «Орден Отечественной войны» йапхъахауа астепень, «За отвагу» медаль гIайквнадыргатI. ЧквтIу Урысби ныкъвадыкъвата айсра дгIахъынхIвыхызтынгьи, днымхауата мшкIы дгьымчIватI. Ауи йцри кыт Псыжв амлыкврхIарта агIащаквыргылхра къару ду алайцIатI. Адуней йхIваджьындзыкIьа аколхоз дынхатI, йхачIвква гвхътIыла йъайырхъйуз ахъазла йызнымкIва ртшхъвагала дгIалыркIгIатI. ЧвквтIу Урысбии йхъапщыла Аскьархани хвгIвысабичва гIадзындыргылтI. Рпачвагьи рыпхIчвагьи гIвычIвгIвысагIара рылата, гвыбзыгъата рщапIы йгIахвындыргылтI. Ахъартшхъвара зхIальмыз ЧквтIу Урысби йкытлагIвчва, йыгIвзачва йсабиква рдахIвраква йанрылачважвуз гвщтIыхра гIайылалуан. – ХIсабиква апхьаралазтынгьи, нхаралазтынгьи зны хIгьгIадымрыпхащатI. ХIпхIа Аминат Къарча пединститут дапхьауата Ленин йстипендия ангIалквнадырга агIвгIвы Цекъва Пасарби хIара йгIахIхъицахуата дшгвыргъьаз сгвы йтаркIвапI. Пасарби йыгIвзачви йари архъа йыквыз асабиква раба йызцата йпхIа йхIаракIу стипендия ъагIалквнадыргазла йшйайхIвахIвыз гьсхъаштылхуам, – йгIалгвалашвахитI Аскьархан. Ленин йстипендия гIазыртуаз ЧквтIу Аминат уахьчIва йъагIадзазгьи арыпхьагIвта дынхитI. Ауи ХапаевргIа рткъвымхьыз налахвтI йгIашIарышвта Кичи-Балыкъ кыт дбзазитI, сквш 40 айхIа цIитIта ауаъа асабиква урышв бызшвали литературали йалрыпхьитI. Аминат лайщчвагьи лахщчвагьи, ауат йгIадрихыз асабиквагьи апхьаралагьи нхаралагьи йгIардахIвыз щардапI. РыцIа йайцIбадзу ахвыцквагьи рахIбачва йрапшта рхIаль пшдзата, йгврыхвата йгIадзынгылитI. Ари атшын ЧквтIу Аскьархан йлызцаз агвып дшгIарайгвыргъьаз, анйара адгалагIвчва дшрызхIвахIвыз ажвала йгьузыхIвушым. Ауи АйгIайра гIатызгаз афырква ртгIачваква гватра рзалызхуа, бзира рзызхауа зымгIва дшырзыразу лхIватI. «Мамаду» нхарта йгьи «Абазашта» газет рунашвачпагIвчва аветеран ЧквтIу Урысби дшырхъмаштылуа йагIарбагата йхъапщыла Аскьархан уагIа ъалзырщтийыз, согIа ъалзырчпаз ларгьи лгIариквагьи швабыжа йыргвапахатI.