АГВЫМКВА ЛЗЫРАЗПI

Красна Восток кыт йацрита йпхьадзу, гвла аргваныта йаму акъарча кыт чкIвын Къзылпагвын абзазагIвчви ауаъа йтагылу амбулатория афельдшер ХВБИ Ирини мшигIадза йашIашвалитI. Жвыхв сквша райхIа цIуата араъа йынхауа абаза пхIвыс йлыбызшвам ауагIаква лцрихатI, мара нурта йтгвыргъьгIауа лылаква, лгвапари лпшкари унагIвипхьадза йыгIвнапI. – Сара апычIв классква сцауата агIвычIвгIвыс йыхъазла адуней байарата йыкву щардала сазхъвыцуан, швабыжта схъырхуан халат шкIвокIва зшвыта ачымазагIвква, асаби пшкаква йырзыгвжважвуз апхIвысква, – лхIвитI Хвби (КIьыча) Ирина Фуъад йпхIа лчкIвынхъа сквшква гIалгвалашвахуата. – АгIвычIвгIвыс йыхъазла рыцIа йбайара дуу азгIвадара сахчагIвхарныс мурадта йскIытI. Йыгьсхъаштылхуам Кълыч Рауф йыхьыз нкъвызгауа акыт аквтанай апхьарта сапхьауата урышв бызшвали литературали сарыпхьагIв КIьыча Льильа Джьатсан йпхIа «АчIвыйа йшвъачIвагIазлуш?»-хIва йхIлыргIвыз алацIара апны спхыцIа амедицина йапсщылырныс шсмураду сшгIаквчважваз. Апхьарта сангIалга Архангельск йбзазуз санща Ворошил ауаъа йтагылу амединститут сыцIайжьырныс сйырцатI. Архъвыхраква гIальаматта сырхъыстI, ауаса урышв бызшвала йгьи химияла сбаллква гьнамхъатI, сгьзыцIамылтI. УацIыхъван йара ауаъа йаъаз медучилища афельдшер хъвшара рхъвыхрадъа снарахвтI. Красна Восток кыт йтыцIыз абаза пхIвыспа адырраква тшрылттI, луагIа ззыбжу аъачIвагIа цIолата йыллырдырырныс мурадта йылчпатI. Ауи алекцияква, апхьагаква йырхъазымкIва, тшыбжьара дъадырцуз ачымазагIвтараква рпны лбзазара йахъвхъадахуш аъачIвагIа бзита тшахалыргIвазун, айъазагIвчва йылдырбуз гвнылкIылуан. Асквш 1980 июль агIан Ирина бзидздзата медучилища дгIалгатI. Ауи лыгIвзи лари Архангельск область йаныргIалу акосмодром нхара йырщтиуашын. Ауаса лапхьара амщтахьла йгIалыртыз атшпсщара мзы агIан йгIалхътасыз лкыт дангIай лаба дгьйымщтихтI. УацIыхъван Ессентуки йтагылу асанэпидемстанция нхара далагатI, унагIва днашылтI. ГIвысквша рахIа днымхауата акыт дгIахъынхIвыхын, Учкекен йтагылу асанэпидемстанция апны лынхара джвыквылцIатI. Ауи амщтахьла акыт асабигIзарта медахщата, уацIыхъван акыт чымазагIвтара медахща ахIбата 12 сквша дынхатI. Зынхаща швапхаз, зуыс йнардзата йзырхъйуз, агвып йракъыльагIвыз, КъарчачкIвын районла рыцIа йагъьыз амедахщаква йрылапхьадзаз Хвби Ирина акъарча кыт дтанагатI. – Асквш 2004 агIан Къзылпагвын кыт гIаныршара йахъадата йынхуз Батдыев Мурат «Бара акыт чымазагIвтара ахъада Тамби Анзор, апыцайъазагIв Батдыев Абучук йгьи бызцынхауа агвып швабыжта бдыртшхъвитI, хIкыт амбулатория йынхуш фельдшер бзи дыгьхIауам, нхара бхIызнай»-хIва запыт дгIайуа, йгIадйырхIвауамцара схъикъьалтI, акыт сгвы рызрыцхIахан нхара сцатI, – йгIалгвалашвахитI Ирина. – Абар жвыхв сквша райхIа цIитIта дара рцриква рапшта сырпхьадзитI, ажва пха гIасархIвра акIвмызтын, заджвы йажва гвауакIгьи гьсымгIастI. Заджвы йыхъазлагьи йыгькъачIвахым, агIвычIвгIвыс ныкъвадыкъва, ачымазагIв, асаби пшка агьиква уырхьпшырныс, йатахъу медицина цхърагIара рзыгIануыршарныс хвду шаму, гIапсара ду шапщылу. Ауаса Къзылпагвын абзазагIвчва Хвби Ирина йапхъахауа азшIытрала щапIылазтынгьи ласыта дшнадзуш рдыритI. – Ирина лнашх лашара, йтгвыргъьгIауа лшIахъа, йтIатIу, йпшку лнапIква, лайгвыгIвра хъвшвыдъа ачымазагIв йщапIы дгIахвынгылхырныс лшарата йачпитI, – рхIвитI акыт абзазагIвчва. ЦIабыргыпI, уагIа 1048-гIвы зтабзауа (ауат йрыуата 146-гIвы сабипI, аныкъвадыкъваквагьи 80-гIв йнадзитI) акыт апны лынхара ага баргвыра апщылазтынгьи, анашх лашара, агвапара йанакIвызлакIгьи лшIахъа йгIаныпщитI. Хвби Ирина медахщата йлыцу Урусова Келиматгьи ларгьи зыгIвнанхауа, акыт администрация зыгIвну атдзы амарагIацIцIыртала йаныргIалпI, апещква тыбгIапI, лашарапI, йатахъу ъамапсымала, ахъвшвквала йадгалапI. Хвби Ирина йшылхIвауала, ачымазагIвква хвыдъа йатахъу зымгIва рыдыргалитI. Ауаса апещква псабара газ гьашIарышвым, агъныла электрокъарула йынхауа абатарея чкIвынква гIадрысабапитI. Ауат «ЦхърагIара ласы» гьрымам. Аргванква щапIыла йцитI, рыцIа йъахъаругьи машинала йыргитIта йгIаргхитI. ЧымазагIв хIатла дангIаншара арайон хабар дыргитI, «ЦхърагIара ласы» гIайитIта днарахвитI. Гъынгьи пхынгьи, ква гIакварыгьи, сылгIва нкъвнагарыгьи абзазагIвчва зайгвыгъауа афельдшер Хвби Ирина луыс дгьахьшвум, йаназаману дадгылитI. Афелдшер ъаза йлыбызшвам дъарайъазауа ахъазла баргвыра дгьанйум, атажв-лыгажвквагьи дгIаргвынгIвитI. – АчымазагIви айъазагIви рылаква ананйара абагвынгIвыра гIарбжьалитI. Сара ачымазагIв данызбара, йаъаща ансырхъвыхра зынла дгIасгвынгIвитI, йатахъу йыдызгалитI. МшигIадза акыт утыцIта Къзылпагвын ацарагьи замангьи къаругьи атахъыпI, ауагIа сшыртахъу сыласхIвитI, ауи гвыгъара ду гIасыланацIитI, саргвышхвитI, ауагIа бзиракI шырзысхуш сызшIнатитI. Хвби Ирини лхъапщыла ХIасани пщгIвысабичва гIадзындыргылтI, йхIаракIу дырра рырттI. АхIбачва ФатIима, Галина, Азамат унагIвапI. АйцIбадза Рустам Ростов йтагылу амединститут «инженер медицинского оборудования» факультет дгIалгатI, йара ауаъа дынхитI, кандидат диссертация йгIвитI, ужвыгьи дгьунагIвам. – Сара сныбыжьла тшпсщара сызлацаз ашвъаква апенсия фонд йрысттI, ауаса «АлахI йхIатырла бакъвымцIхын»-хIва абзазагIвчва гIасыхIвитI, сгвы гьауам сыркъвыцIхырныс, ага йгIапсаразтынгьи, скъару йъадзакIуа сынхарныс сгвыгъапI. – Щта, азгIвадари агвнагьри бымазтI, Ирина!