Актуально В ФСБ России по КЧР рассказали как распознать телефонных злоумышленников  СКФО Новый логотип курорта Эльбрус в КБР представили в студии Артемия Лебедева СКФО В Северной Осетии прошла донорская акция Актуально В КЧР родители старшеклассников сдали ЕГЭ Общество Карачаево-Черкесия наращивает объемы производства тепличных овощей

АГВЧІАГІВРА АФЫРРА

30.10.2018 653
АГВЧІАГІВРА АФЫРРА
Байрамыкъва Халимат лыхьыз зхъу ареспублика къральыгІва библиотека апны «Подвиг милосердия: спасение детей блокадного Ленинграда в черкесском ауле Бесленей» книга апрезентация акІвшатІ. Ауи йалан Къарча-Черкес Республика Ажвлара палата апредседатель МОЛДОВАНОВА Вера, ауи лзаместитель, «Деловая Россия» жвлара организация КЧР-ла ахъвшара аунашвачпагIв ГВАНА Игорь, Къарча-Черкес Республика а-Хъади а-Правительстви р-Администрация а-Председатель йзаместитель АСТЕЖЕВА ФранческIа, ауагІахъа уысквала, ажвлара коммуникацияквала йгьи печатьла КЧР аминистр ХАПИШТОВ Мурат, культурала КЧР аминистр йзаместитель КАБАРДОВА Ирина, арыпхьарали наукали КЧР аминистр лзаместитель БЕКИЖЕВА ФатІима, ажвлара уыснкъвгагІв, «Черкесия», «Адыгэ псальэ» газетква рредактор ХІАФЫЦІА МухІамад, афилология наукаква рдоктор БАКОВ Хангьари, акъабард гІвгІвы НАФЕДЗЕВ МухІамад, КъабардБалкъар ауагІа руысагІв АЦКАНОВ Руслан, Бесленей кыт йгІатыцІыз агвып, акнига гІазквчважвауа ауагІа зымгІва бзита йыгІдыруа, Къарча-Черкес Республикала гІатгара зму арыпхьагIв ПАТІ Римма, акнига зкъальам йгІахъыцIыз адгьаква руагІахъакультура автономия аунашвачпагІв ОХВТА Александр. Анйара йалаз тшырзынайырхауата дгІачважватІ ареспублика къральыгІва библиотека адиректор ХАПЧАЕВ СальыхІ. Ауи йгІадзынгылуа абанпара рыгІзарабжьара уыс апны атурых шахІатква магІныта йрыму гІаликІгІатІ, акнига гІазквчважвауа шцІолу, бызшвала йапшым ауагІахъаква радкIылрала уыста йырхъйауа даквгІашІастІ. – ЙагІвсыз асквшква рагІан хІабашталагІвчва йрыщтагІайуа абанпараква рыхъазла хъацІарата йгІадырбаз йаквшахІатхауа агІвыраква хвы рыквцІауачвапІ. УахьчIва хІмамыр бзазара хІабадучва хвыта йазыртийыз хІхъаштылырныс хІгьахвитым. Ленинград аблокада асабиква зунагІваква рпны йкъазчІвахуаз апхІвысква афашистква ртгІачваквагьи даргьи йшгІармайгьдзушыз йахагІвазан. УадыргІванагьи агвчІагІври агІвычІвгІвысагІи хъахьхатІ. Акнига йадынхалыз атурых гІащаквыргылхрала уыс ду дырхъйатІ, ауат ргІапсара щтадъа йшымдзуаш йазхъасцIитІ, – йгІаликІгІатІ аминистр. Апрезентация апны йгІачважваз зымгІва асквш 1942 агІан Ленинград аблокада йгІалыргаз 32-гІв йнадзуз асабиква здызкІылыз Бесленей кыт абзазагІвчва хъацІарата йгІадырбаз йгІаквчважвауа акнига магІныта йаму гІалыркІгІатІ. Ауи зкъальам йгІахъыцІыз Охвта Александр йшихІвазла, Бесленей кыт абзазагІвчва Ленинград асабиква шырхчаз йапщылу агІаншараква гІащаквйыргылхуа далагищтара сквшщарда цІитІ. – ХІхаквлагІвчва Абашта айсра Ду агІан йрыдыркІылыз асабиква рылахь шцаз асквш 2005 йгІашІарышвта цІолата йссырдыритІ. Ауат агІаншараква йырзынархата ашвъаквала йалу афильмква гІандыршатІ, гІвыра щардагьи гІацІцІитІ. Сара ауат агІаншараква чІыдахъвы сшзыргвалымсым гвынгІвырапІ, Бесленей кыт съагІадзынгылыз акІвпІ. ЙагІвсыз хвы аквзымцІауа йапхъахьыла йзыщтІу гьбергьльызлум. Сара швабыжта йстахъыпІ йгІадзынгылуа абанпараква айсра агІан рабадучва рынцІраква йырмайгьдзауата р-Псадгьыл йшазгылыз, атыл йгІанхазгьи гІвычІвгІвысагІарата йынкъвыргаз бзита йахагІвазата йаъазларныс. ХІхаквлагІвчва Ленинград асабиква анамыцаква йшырчвырхчаз ахабар Израиль апхьахьаква йанырдыр апрофессор Аурон Яир ауыс рыцІа йауацІыхта тшахайыргІвазарныс Къарча-Черкес дгІайтІ. Ауи Бесленей кыт бзидздзара дтанхатІ, ауагІа йгІайархІвыз, йдырбаз ашвъаква швабыжта йджьайщатІ. Израиль данхъынхІвых йыбызшвала асквш 2018 агІан «Банальность милосердия» книга гІацІищттІ. Апхъапхъа Бесленей кыт апны афашистква йырчвыкъарчІвахыз асабиква рхабар гІайазхІвыз Израиль йбзазауа ачеркесква ракІвпІ. Аурон Яир ауыс зквыз рыцІа йауацІыхта ййырдырырныс дангІай аргваныта йари сари хІабадыртІ. Ленинград асабиква здызкІылыз атгІачваква, уахьчІвала абгата йгІанхаз аблокада йачвырхчаз зымгІвагьи хІрынйатІ, хІрачважватІ, – йгІаликІгІатІ Охвта Александр йгІачважвара апны. Афилософ Аурон Яир Израиль апны «Банальность милосердия» книга ангІацІищт амщтахь Къарча-Черкес датагІайхтІ йгьи Охвта Александри йари урышв бызшвала Бесленей кыт абзазагІвчва ргвчІагІвра йгІаквчважвауа книга ацыгІгІвырныс шитахъу гІайайхІвтІ, ауи Адгьа уагІахъа академия Израильла йхътІу ауниверситет рцхърагІарала йгІацІцІтІ. Охвта Александри Аурон Яири здынхалыз акнига 10 хъвыкІ йнадзитІ, ашвъаквали асуратквали йырбайапІ. Акнига апрезентация йалаз зымгІвагьи абиблиотека анхагІвчва йадыргалыз «Премьера книги», «Ленинград. Блокада. Подвиг», «Дети блокадного Ленинграда в Бесленее: история в фотографиях» гІарбараква йгьи «Аул Воинской Славы» фильм швабыжта йыргвапхатІ. «Подвиг милосердия» книга йадынхалызгьи йгІазквчважвауа афырквагьи бызшвала йгьапшым. Ауи йапшу аъаща хІкъраль абзазагІвчва шинтернационалисту, анцІралагьи нбжьагІвыгІи мамыри шрызбжьу, ауат рыхвгьи абгата йшгІаргвынгІвуа йаквшахІатхитІ.
653 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный