Промышленностьла йгьи хвгIахвтрала КЧР аминистр АРГВЫН Мурат ареспублика гIархарджьыртаква тшрыхайыргIвазауата рахIа йпхатшу анхартаква дгIарыкIвшитI. ДукI мцIуата ауи Черкесск йаныргIалу арыхьшвашвага пкъыгIваква ъагIацIырщтуа «Холодмаш» ОАО даъан. Азавод аунашвачпагIв АЙБАЗОВ Магомед асас «Холодмаш» ацехква шынхауа йгьи йгIацIырщтуа апкъыгIваква ййырбатI.
Ари агIархарджьырта асквш 1961 йгIашIарышвта йынхитI, атехника
гIаршIыцхра ду йазыбжапI. Азавод апны фреонла йгьи аммиакла йынхауа арыхьшвашвагаква гIацIырщтуан. Аэкономика псахраква ангIаджвыквыл агIархарджьырта гIархчара ахIатырла акомпрессорква йырхъазымкIва датша адгалчIвква йгьи Россия ахъахчара промышленность ахъазла аргIапсгаква гIацIырщтуа йалагатI.
«Холодмаш» аунашвачпагIвчва йызланхауа атехника гIадыршIыцхта йпшцIырщтуа арыхьшвашвагаква дрыщардарныс рмурадпI.
Аминистр азавод аргIапсща данапшы йгьи анхагIвчва ражванахъаква данрыздзыргIвы амщтахь апромышленна гIархарджьра йалархIарала йгьи йгIацIырщтуа апкъыгIва Россияла йпшцIыщтрала йшацынхуш йрыбагъьатI.
Комментарии