АДУНЕЙЛА ЙБЕРГЬЛЬУ АПХЬАРТАХАТI

Къарча-Черкесла йапхъахауата йгIахъыртIыз йхIаракIу апхьарта сквш 80 ахъыцIтI. ГIвысквшала ауаъа афилология йгьи афизика-математика факультетква дахIврала рынхара джвыквырцIатI. Аинститут ймайрамыз мгIва амнадатI, гIван йхъыргIвахра атахъхатI, уадыргIванагьи ауаъа дырра зауырныс зылшаз аъачIвагIагIвчва йанапхьуз асквшква ргвы пхата йгIатахатI. УахьчIвала ауи нархара щардала арыпхьагIвчва ъадрыхIазыруа университетпI йгьи Россия йахъазымкIва йаргвану агIвымакъральква йгIартыцIыз астудентквагьи щардагIвыта йапхьитI. Къарча-Черкес къральыгIва университет Лагъь КIавкIазла йгьи акъральла зыхьыз бергьльу йхIаракIу аъачIвагIа гIацIгартаква йрыуапI. Ауи гIвинституткI, 10 факультеткI аланакIитI, ауат рпны йапхьауа астудентква 6-н зкьыгIв йнадзитI, арыпхьагIвчви анхагIвчви 800-гIвы йрайхIапI. Ауниверситет асквш 80 йазынархаз агвыргъьахъв швабыж пшдзата йгьи гвлахIарата йакIвшатI. Асасчва гвапата йгIарпылтI КЧГУ аректор УЗДЕНОВ Таусолтан, Къарча город амэр ДИНАЕВ Алик, уагIахъа фаша зшвыз арыпхьагIвчва рахIба БОСТАНОВ Магомет, «Алибек» ансамбль агIахIвыгIвчва. Ауниверситет апахь ауагIахъа пшцIаква, акультури-азъазари ринститут астудентква йдрыхIазырыз анапIлачпаракви амакет джьащахъвакви аныргIалын. Актова зал апны йакIвшаз агвыргъьахъв йалан Къарча-Черкес Республика а-Правительства а-Председатель йхъвдаквцIараква зырхъйауа БАЙЧОРОВ Эльдар, наукали йхIаракIу арыпхьарали РФ аминистр йзаместитель СТЕПАНОВ Александр, Къарча-Черкес Республика АуагIа Айззара адепутатква, а-Правительства анхагIвчва, Лагъь-КIавкIаз йгьи ГIвадахь Федеральна округквала йаныргIалу йхIаракIу аъачIвагIа гIацIгартаква рделегацияква, йапшым асквшква рагIан ауниверситет йгIалгаз арыпхьагIвчва, астудентква, абзазагIвчва. АъачIвагIа гIацIгарта йгIаквчважвуз авидеоролик ангIадырба амщтахь агвыргъьахъв йгIадгылыз пхата драйхIвахIвтI наукали йхIаракIу арыпхьарали РФ аминистр йзаместитель Степанов Александр. – УахьчIва хIара зымгIвагьи хIадызкIылуа мурадкIпI – зуыс йазъазу ъачIвагIагIвчва ррыхIазырра. Ауат акъральла йгIадзынгылуа абанпараква дырра цIола рыртырквын, хIмурад гIахIдахIвта йхIпхьадза ауаштI. Сара швабыжта йсгвапапI сквш 80 йнадзаз аъачIвагIа гIацIгарта алшараква тшъауацIырхыз. Араъа Россия йгьи 13 къралькI йгIартыцIыз астудентква дахIврала йапхьитI. Арыпхьарала йазалху ауысква абзазара йалалра ахъазла къаруи чхIари гIазырбауа ауниверситет арыпхьагIвчви аъачIвагIагIвчви разыра ажва щарда швквнагапI. Сара кьангьаш гьазгIазгуам хIапхъахьылагьи адахIвраква шшвщардазлуш, швымгIва йанакIвызлакIгьи йхътIызтI, йлашаразтI, – йгIаликIгIатI Степанов Александр. Къарча-Черкес Республика а-Хъада Темрезов Рашид йыхьызла агвыргъьахъв йалаз драйхIвахIвтI а-Правительства а-Председетель йхъвдаквцIараква зырхъйауа БАЙЧОРОВ Эльдар. Ауи йцIыхъвахауа асквшква руацIала ауниверситет апны псахра бзи щарда шакIвшаз йхIватI. – Йцаз асквш 80 руацIала йхъйаз ауысква гIаупхьадзахырквын, йхIаракIу аъачIвагIа гIацIгарта гIамта шIыцкI йшазычIвырхъауа хIаквшахIатхитI. Арыпхьарала ахIбачва йдырхIаз ашвапха йрыщтагIайуа апедагогква йаладырхIарныс рылшауа йазгIашыкъта йынхитI. Арыпхьарала институтта йджвыквызцIаз, уахьчIвала зыхьыз бергьльу ауниверситет апны нархара щардала аъачIвагIагIвчва гвымчIваква дрыхIазыритI. Ауи араъа йынхауа арыпхьагIвчва-апхьахьаква ркъару ймачIымкIва йалапI. КIьыдата саквгIашIасра стахъыпI ауниверситет арыпхьагIвчва ауагIахъа бызшваква рхчарала уыста йдырхъйарныс рылшаз. ХIара зымгIвагьи йхIзацапшу хI-Псадгьыл хвыц – Къарча-Черкес Республика атшауацIыхра хIазынхитI. ХIапхъахьылагьи ауниверситет аунашвачпагIвчви арыпхьагIвчви адахIвраква рымата йырзынарху ауысква дырхъйарныс рзыстахъпI, – йхIватI Байчоров Эльдар. Ауи а-Правительства ачIахIра грамотаква зквнайыргаз дрыуапI культурали азъазарали ауниверситет йаланакIуа аинститут адекан, ЧIахIра зму йхIаракIу арыпхьара анхагIвы, адоцент ОГВЫЗ Виталий. Ауниверситет арыпхьагIвчви астуденткви ажва пхаква рзынадырхатI РФ а-Федерация а-Совет йалу САЛПАГАРОВ Ахмат, Къарча-Черкес Республика АуагIа Айззара (а-Парламент) а-Председатель йзаместитель ХАБОВ Руслан, ЛагъьКIавкIаз Федеральна округла йаныргIалу йхIаракIу аъачIвагIа гIацIгартаква рыхьызла КОЧКАРОВ Руслан, Къарча город округ амэр ДИНАЕВ Алик, арыпхьарали наукали КЧР аминистр КРАВЧЕНКО Инна, згIвадарахчарала КЧР аминистр ШАМАНОВ Казим. Байчоров Эльдар йгьи Хабов Руслан КъарчаЧеркес къральыгIва университет аректори арыпхьагIвчви а-Правительстви АуагIа Айззара а-Президиуми рчIахIра грамотаква рквнадыргатI. Агвыргъьахъв апны йгIачважваз зымгIвагьи ауниверситет Къарча-Черкес Республикала къральыгIва бызшвата йырпхьадзауа урышв, къарча, черкес, абаза, нагIвай бызшваква рхчарала уыс ду шакIвнаршауа гIалыркIгIатI. Къарча-балкъар, черкес, абаза, нагIвай бызшваква рквтаква гIахъыртIищтара заманта йагIвсхьаз мачIызтынгьи йрылшахьаз уамыргвыргъьакIва амаль гьамам. Йара ауи атшын йгIахъыртIыз урышв бызшвала аквтагьи йара ауаса дахIврала йшынхуш кьангьашра гьалам. Ауниверситет йахъыцIыз асквш 80 андыртлапIуз атшын ауи асасчва датшагьи гIаншара джьащахъвакI йаквшахIатхатI. ЙхIаракIу аъачIвагIа гIацIгарта апны Къарча-Черкес Республикала йапхъахауата археологическа музей гIахъыртIытI. Ауаъа хIреспублика йапшым ашIыпIаквала йгIарауыз, турых магIын ду зму аэкспонат 500 андыргIалхьатI. ХIапхъахьылагьи ауат рпхьадзара йалархIарала анхараква гьашIасуашым. Амузей квадрат метрта 70 гIацIанакIитI, аэкспонатква рызджьакI рныбыжь 2,5 сквшызкь йнадзитI. ХIапхъахьыла амузей анхара апны ауниверситет аистория факультет астудентква ркъаругьи гIадрысабапуаштI. Амузей даунашвачпагIвпI АЙБАЗОВ Ахмат. Ауи йшгIаликIгIазла, амузей апны зыхьыз бергьльу археолог АБРАМОВА Майа й-1983–1985-хуз асквшква рагIан ХIвмара аргванква рпны йгIалауыз атурых чвахъабагаква ракIвпI рыцIа йщардата йаныргIалу. Ауниверситет аректор Узденов Таусолтан йшихIвазла, Къарча-Черкес Республика археология пшгIараква гьашIасуам. Ауаъа йгIадрыбергьыльуа апкъыгIваква ужвы амузей апны йандыргIалуаштI. Аюбилей йгIадгылыз асасчва рыла дырпшытI. «Къарча» гIахIвыгIвчва гвып, «Шохлукъ» уагIахъа ансамбль, ашвахIвагIвчва БАТЧАЕВ Таулан, ГАГУА Лейла, «Казачка» ашвахIвагIвчва гвып, «Каракум» зхьзу атуркмен студентква ргIахIвыгIвчва ансамбль, ХIабаз ауагIахъа ъамапсымаквала йалу аоркестр. КIьыдата йгIалхIкIгIапI агвыргъьахъв швабыжта йызрыпшдзаз й-34- хауа ахысыгIвчва бригада рпсып оркестр. Ауат рунашвачпагIв айсра дирижер ПРОХОРОВ Артем йшихIвазла, аюбилей йъагIадрайгваз швабыжта йыргвапахатI. Къарча-Черкес къральыгIва университет аректор Узденов Таусолтан агвыргъьахъв йгIадгылыз асасчва зымгIвагьи разыра ажва рзынайырхатI. АъачIвагIа гIацIгарта ащапIы багъьата йыквзыргылыз, уахьчIвала зынхара швапха гIадрысабапуа ахIбачвагьи пхата йгIайгвалашвахтI.