АДЕПУТАТКВА АЖВЛАРА АТЫНЧРА ЙАЗГЫЛАПI

Июль а 11 КЧР АуагIа Айззара (а-Парламент) йызкьазуу й-57-хауа алачIвара апны адепутатква уыс 20 йрылапштI. ЗымгIва йрапхъата зынхара пIатла тыцIыз КЧР Архъвыхра-счетна палата апредседатель йзаместитель Дудник Наталья луыс ауатыкв йгIатаргатI. Аэкономика политикала, бюджетла, афинансквала, аналогквала йгьи ахIаракьатчпара уысквала а-Парламент акомитет апредседатель Гочияев Адам йшихIвазла, Дудник Наталья зхъвдаквцIараква джьауапкIрала йзырхъйауа, дырра цIола зму дъачIвагIагIвпI, апхъахьылагьи ауи КЧР Архъвыхрасчетна палата апредседатель йзаместитель йъанатIа шылквнадыргауа йацыркIырнысла адепутатква тшырзынайырхатI. АхабзалыхыгIвчва йацшIакIта Дудник Наталья лыхъазла напIы щтIырхтI. Адепутатква зынхара пIатла тыцIыз КЧР Архъвыхра-счетна палата аудитор Кидралиев Хайырлы ХIасана йпа йъанатIа шатайызхъарцIахуа напIщтIыхрала йщаквдыргылтI. Асессия апны «Асквш 2018 агIан Къарча-Черкес Республика абюджет шырхъйахаз ауысла» КЧР ахабзапроектгьи нарахвтI. Адепутатква «Асквш 2019 агIан Къарча-Черкес Республика абюджет йгьи асквшква 2020–2021 рагIан ахачIвква руысла» КЧР а-Хабзагьи апсахраква аларцIатI. Афинансквала КЧР аминистр Суюнчев Мурат йшихIвазла, сынчIва йхъындмырхIвыхуата абюджет йгIалалыз ахчаква щаквдыргылуата афинанс швъа йадынхалхтI. – Асквш 2019 апны КЧР абюджет йхъындмырхIвыхуа ахчата сом зыкь 38451,6 аъара ъагIалалыз йгIалцIла ареспублика бюджет ахъахIара сом зыкь 25369507,3, акврыдзраква сом 25496233,3 йнадзатI. Нхарали социальна тшауацIыхрали КЧР а-Министерства акврыдзраква йызларылахIырхIаз ахчала хIреспублика апны йапхъахауа саби дзауыз ансимзы цхърагIара драдзарала ахачIвква дырхъйуштI, – йхIватI Суюнчев Мурат. Адепутатква «КъарчаЧеркес Республика апны амамыр судьяква руысла» КЧР а-Хабзагьи афедеральна хабзалыхра йаквшвара ахъазла апсахраква аларцIатI. Ауи амамыр судьяква рхачIвква йшрылахIаз щаквнаргылитI. КЧР апны ахIаракьатчпагIвчва рхвитнагIаква хчарала а-Уполномоченна Рощенко Сергей асквш 2018 нхарата йакIвдыршазла адепутатква рпахь дгIачважватI. Ауи хIреспублика апны ахIаракьатчпара уысквала адахIвраквагьи абизнес йалу зынйауа абаргвыраквагьи гIайхIватI. Ари асессия апны политика амакIыракI алдыргара атахъхатI. Асуд ащаквыргылрала КПРФ КЧР-ла ахъвшара ахьызла акандидатква сынчIва сентябрь йакIвшуш КЧР АуагIа Айззара (а-Парламент) й-VI-хауа азддара адепутатква ралхра йгьаларжьуам. Асессия апны КПРФ йалу адепутатква ари ауыс ауатыкв йгIатаргатI. Адепутат Хапчаев СальыхI йшихIвазла, апартия йалу рамакIыраква ршвхIаусыгIвала КПРФ агIвшахатI. Апартия йазцIабыргу гIвынакIла йгIанхатI. – Аконференция апны КПРФ ашвъала акандидатква рыхъазла напIы анщтIыхIхуаз хIпартия йалам, ауаса ауи ахьызла алхраква йрылалырныс зтахъхаз уагIа кIьыдаквакI рльажьала амакIыра гIаншатI. Алхраква йрылалуаш ршвъа анщаквгылуаз хIпартия амурадква, ахIбачва хIажва йазымдзыргIвуата ахабза шмыгIвхъыргаз айззара апынгьи йгIасхIватI, – йгIаликIгIатI Хапчаев СальыхI. КЧР Алхра Комиссия апны КПРФ ашвъаква йрылапштI, ари апартия алхраква йрылалырныс йадрыхвиттI. Ауаса «Патриоты России» партия ахьызла асуд йщтIарцIаз ахIвара швъа йаналапш амщтахь КЧР а-Верховна суд КПРФ сентябрь а 8 йакIвшуш алхраква йшрыламызлушла, ашвъаква анагвындыргIвуаз мыгIвхъгара щарда шаъазла щаквыргылра нанауахвтI. – Аполитика съадзалу ари апш йгвасру уыс сгьанымйастI. Алхраква гIадзахьата хIпартия зташваз аъаща гьмайрам, ауи гIазлыцIызгьи акоммунистква хIуацIала йгIаншаз амакIыраква ракIвпI. Датшата йухIвушызтын, аконференция акIвзыршуз апартия йалу ахIбачва йхIзымдзыргIвуата йыртахъыз ъарчпаз йгIалцIла абари апш аъаща хIташватI, – йгIалылкIгIатI КПРФ афракция йалу адепутат Михайлович Муратхан. Асквш 2019, июль а 9 РФ а-КъральыгIва Дума алачIвара апны адепутат Ющенко Александр КЧР а-Верховна суд ащаквыргылрала КПРФ КЧР-ла ахъвшара анапIщтIыхраква йъарыларымжьуа дазыразымкIва дгIачважватI. Асессия апны КЧР а-Парламент адепутат Бородкин Виктор ауи йгIачважвара йшазыразымла а-Парламент адепутатква РФ а-КъральыгIва Дума тшазынадырхарныс ажванахъа гIайгтI. АхабзалыхыгIвчва зымгIва ауи йыцыркIтI. АуагIа Айззара (а-Парламент) адепутатква РФ а-КъральыгIва Дума а-Председатель Володин Вячеслав йызцауа тшазынархара нарахвтI. «... ХIреспублика зынгьи йгIамис Ющенко Александр акоммунистква алхраква йызрыларымжьуа атамам гIайймырдыруата КъарчаЧеркес аунашвачпагIвчва йыркъванчитI. Ауи йгIачважварала хIреспублика атшауацIыхра къару алазцIауа, нхарала йкъаймату, дырра цIола зму акоммунистквагьи апартиягьи рыхв найыркъвытI. КЧР АуагIа Айззара (а-Парламент) атахъырала гьакIвым КПРФ алхраква йрылазымжьуа. КЧР а-Верховна суд ащаквыргылра хабзала атамамра Ющенко йапшкву гьракIвым йалзыргара атахъу...» – йаныпI атшазынархара. Социальна политикала КЧР АуагIа Айззара (а-Парламент) акомитет йалу акоммунист Чотчаева Роза йшылхIвазла, сентабрь йакIвшуш алхраква йырзынархаз КПРФ КЧР-ла ахъвшара аконференция апны акIвпI амыгIвхъгараква ъагIаджвыквлыз. – ХIынбжьагIвчва апартия а-Устав мыгIвхърымгауата аконференция акIвдыршазарквын, ауи апш гвасра гьгIанымшушызтI, – йгIалылкIгIатI адепутат Чотчаева Роза. Ареспублика а-Парламент адепутатква, сквшщарда ахабзалыхра уысква йырзынхауа КПРФ йалу ахIбачва ргвасра гвынгIвырапI. ХIреспублика абзазагIвчва рпны рыцIа хвы зму адепутат-коммунистква КПРФ ахьызла акандидатква ршвъа йгьанымшвалтI, ауи йаланакIтI КПРФ закIылагьи йапщылам, апхъала алхраква рагIан «Коммунисты России» партия ашвъа йаныз политикквакI.