«Айсра апны зымгIва рацкIыс
йхIатлу йара айсра акIвпI»
ГРОМОВ Борис,
Афганистан апны совет рхъвква унашва
рхъызцIуз агенерал-лейтенант.
Абанпарипхьадза рхъвыхракI йгIалситI. ХIабадучва Абашта айсра Ду ахьшвашвара рылархIватI, хIабачва айсра йаланарыхъвашаз акъраль гIащаквдыргылхра атахъхатI. Ауаса амамыр анщаквгылу
атлахан агIангьи рхъвыхраквакI гIацIшвтитI.
Асквш 1978 агIан СССР йачвыхъару Афганистан
апны революция ншатI, ауи йащтагIайтI агIвымакъраль апны амакIыраква, айсра. Афганистан аунашвачпагIвчва цхърагIара шыртахъула СССР знапIыцIаз
йызнымкIва тшгIарзынадырхатI, ауаса хIкъраль ахъадаква гьымгвжважвузтI.
Ауи агIвымакъраль аунашвачпагIв данырщы, Америка Афганистан апны абджьар андрыщарда Совет
Союз ашварагIварадара йазхъвыцуата хIайсыгIвчва
ауи акъраль йтадарала щаквыргылра нарахвтI.
Асквш 1979, декабрь а 15 агIан йапхъахуз совет
айсыгIвчва Афганистан йтардатI. АчкIвынчва акъральыгIва азшIытрала ауи айсра йпшцIалуан. Ауи агIан
заджвгьи йыгьйымдыруазтI айсра жвсквши мызкIи
19 мшкIли йшауыразлуш, совет айсыгIвчва йрыуата
ауи йгIвыму акъраль апны 13836-гIв рынцIра шалгушыз…
ХIкъраль аштаква зымгIва рапшта, Къарча-Черкес
йтыцIуаз ачкIвынчвагьи акъраль ахъвдаквцIара дырхъйауата Афганистан айсра жьыхьыда йалан…
ХIышта йауата 1200-гIв рылахь ауи архъвыхра йгIалалтI, ауат йрыуата 42-джь рынцIраква р-Псадгьыл
йачвыхъару акъраль апны йалгатI.
Жвасквша йнаднацалуата совет айсыгIвчва Афганистан апны амамыр йазабакIтI, ауаса ужвы йъагIадзазгьи ауи ашта гьтынчым, ужвы йъагIадзазгьи
амакIыраква, агIвщраква, агIвжвараква ншитI.
Адуней жвлара азшIытрала Совет Союз аунашвачпагIвчва айсыгIвчва Афганистан йгIатдахра йазадырцалтI. ХIкъраль апынгьи ауи йацызкIуаз ауагIа
рыцIа-рыцIа йщардагIвхун. Асквш 1988 апрель агIан
Швейцария апны Организация Объединенных Наций (ООН) ащтийыгIвчва рхъпшылра йацIата Пакистан йгьи Афганистан йгIартыцIыз агIвымакъраль
уысквала аминистрква ангIалра мачвы ацIарцIатI.
«Женевские соглашения» зхьызхаз ашвъа апкъ йтата
жвмызкIы руацIала совет айсыгIвчва Афганистан
йгIатырдахра атахъын.
Сквш 30-ла утхъахта асквш 1989, февраль а 15
агIан хIайсыгIвчва зымгIва Афганистан йгIатырдахтI.
Офицерта, солдатта ауи айсра йпшцIаз ргIагвалашвахра нашхыйаква йрыквчважварныс бзи йгьырбум, ауаъа рыла йыцIсыз уахьчIва йъагIадзазгьи
рпхызква йыгьрылцIуам.
Россия ауыжвгIанчIви турых апны февраль а 15
айсыгIвчва-интернационалистква рхъмаштылра
йа-Мшта йщаквдыргылтI. Ансисквша ауи атшын
хIкъральла ймачIым айсыгIвчва-интернационалистква рчвахъабагаква йгIарылахIитI. Совет Союз йалаз
анахьанат акъральква рпынгьи ауи амш апIатIу дупI.
Получайте свежие новости на электронную почту
Комментарии