АБЫЗШВА АХЧАРА ЪАГIАДЖВЫКВЫЛУА

Черкесск город йбзазауа, щарда цIуата сзабадыруа Къванча Умар «Сан лхабарква мачIкI урызсрыдзыргIвуаштI» йхIван, йунагIва сйырцатI. Ауи йан КЪВАНЧА ЕЛИЗАВЕТА Усыф йпхIа Къвбина дауапI, БажвргIа дыртпхIапI.АпхIвыс лквпшыра лашара, йтгвыргъьгIуз лылаква анызба, хIыбызшва цкьала ахабарква гIасалхIвуа даналага спсы ауи аъара дазаргванхан, «АлахI дыбзыразхатI зыбызшва зымрыдзуа, аунагIва йыгIвну хвыцгьи дугьи йырзызхчауа»-хIва ажва пхаква лзынасырхатI. Амлагьи, агвакъвпрагьи, агIапсарагьи йгIарылсыз апхIвыс наскIьахьа лбзазара атурых кIьыда бзагIвра аквнагапI. УахьчIва Елизавета дгIазлыцIыз ауагIахъа рыбызшва бзи йшылбауа, гвбайарата йшылпхьадзауа мачIкI сгIаквчважвара стахъыпI. – Сара Къвбина ашкIолду сазрыпхьаз Апса Кьаримби, Къвапсыргьан СахIатгьари, санща Бажв МхIаматгьари йгьи йбыжьбахауа акласс сгIалгауата абаза бызшвали литературали сазрыпхьаз ЛагIвычв Джьамльадин хIуагIахъа рыбызшва, рцIасква, рхабзаква бзи йсдырбатI, сща йалата уахьчIва йъагIадзазгьи сгIабзазитI, – лхIвитI Къванча Елизавета лчкIвынхъа сквшква гIалгвалашвахуата. – Апхьарта амщтахьла йапшым аъачIвагIаква ссырдыртI, йхIаракIу дырра гIацIызгатI, сышта сачвыхъарата сбзазатI. Ауаса съанызлакIгьи, уыста йсчпалакIгьи сыбызшва сазаргванын, зымгIва рапхъа йсыргылуан. Сышта цри сгIахъынхIвыхта Черкесск сбзазауищтара апхъала йгIацIцIуаз «Коммунизм алашара», ужвы «Абазашта» газет сунагIва мышзаджвыкI йагхата йыгьсыздырам, ансисквша мачвы ацIасцIитI. – АзджьакI абаза бызшвала йгIацIцIуа агазет йапхьарныс рчвыбаргвта рхIвитI. Бара баргвыра кIара башIашвума, бымгIапсауата бапхьума?-хIва Елизавета санылцIгIа, амацIауырта хIъачIваз йыгIвнагылу ашкIаф ашв гIалтIын, щардата йаквыз агазетква слырбатI. – Арат зымгIва «Абазашта» газетпI, сара схъатала номерипхьадза сымгвжважвауа, цIкIыцкI йалысхуа срыпхьитI, рыцIа джьащахъвата йспхьадзауа агIвыраква сычкIвын Умар йпачва йдсырбитI, срызгIапхьитI, – лджьауапхатI Елизавета. – ХIыбызшва ссабиква ргIариква бзи йдсырбара йахъазымкIва, сунагIва йыгIвну ачеркес тацагьи укьынскьынта далачважвитI, хIуагIахъа дгIарылцIызшва дцатI. Елизавета схъвыцраква лрыбагъьара ахъазла «Абазашта» газеткI гIалахвын, дгIапхьауа далагатI. Ауи абызшва йаргвану уысагIвгьи, арыпхьагIвгьи рапхъа дуыргылуашта, зджьарагьи дгIашIанамкIуа, лбжьы пшдза уараргвануата дгIапхьатI. – СквшыкI Псыжв йауу КIьыщмахваргIа ртпхIа Любагьи дсыцта тшпсщара хIъаныз спа Умар «Абазашта» газет къомкI аннайг сшайгвыргъьаз ажвала йгьузыхIвушым, млыкв дукI Анчва йдуу йгIаситызшва йызбатI, – лхIвитI Елизавета. – Ауи агIан уыхьыз зцIарышвыз гIвыра щарда сгвы йнадзауата срыпхьатI. «Ари йымгIанийищтI?»-хIва Люба санылцIгIа, «Ауи сан Хаджьат длащапI», – лджьауапхатI. Ауищтарагьи угвынскIылын, «Абазашта» газет шгIасадзауа уыхьыз зцIу агIвыраква зымгIва рапхъа сырзыпшгIитI. Уцри бызшвала йгIауачважвауа агазет ацкIыс хъагIата йспхьадзауа закIгьи гьаъам. ГазетзаджвыкI сампхьауата йагIвсщтырквын, абзазара апны уыс дудздзакI сыгхушызшва йызбитI. Къванча Елизавета сквш 77 йахъылцахьазтынгьи лылаква бзита йгIащтIырхитI, ансисквша лпенсия йгIалылхитIта мачвы ацIалцIитI. Ауи лтгIачва йырхъазымкIва, дызщтаныкъвауа лыгвлачва, лъахIыльчва цри бызшвала йчважвауа «Абазашта» газет йгIадзынгылуа абанпараква рыхъазла хвыта йаму ралхIвитI, мачвы шацIарцIуш йаквлыргвышхвитI. Сара Къванча Елизавета лунагIва сангIаджвылцIхуаз багъьата йхъасцIатI ауи йлапшу ауагIа пшдзаква шракIву абызшва ахчара къалагIвырта йазгылу