Актуально Глава КЧР Рашид Темрезов в Тырныаузе КБР принял участие в открытии Дворца культуры им. Кайсына Кулиева Актуально Четверть сотрудников компаний КЧР по неосторожности «сливают» рабочие логины и пароли интернет-мошенникам Актуально Представителей IT-индустрии КЧР пригласили на бесплатный вебинар по акселерационной программе от Минцифры России Актуально Врач рассказала, кому категорически противопоказан кофеин Актуально В КЧР определили победителя регионального этапа Всероссийского конкурса »Учитель года России» - 2024

АБХАЗИЯ АПРЕЗИДЕНТ ЙЫХЬЫЗ АХЪМАШТЫЛРА ЙАЛАЗЛУШТI

26.07.2019 372
АБХАЗИЯ АПРЕЗИДЕНТ ЙЫХЬЫЗ АХЪМАШТЫЛРА ЙАЛАЗЛУШТI
Абаза уагIахъа фестиваль апкъ йтата июль а 22 а-Печать а-Тдзы апны асквшква 2005 – 2011 руацІа Абхаз Республика йа-Президентыз БАГАПШ Сергей Василий йпа йгІайыквчважвауа «Путь мудрости и мужества» книга апрезентация йазынархата анйара акІвшатІ. Ауи йалан Апсны йгІатыцІыз афилология наукаква рдоктор, Абхаз къральыгІва университет апрофессор, агIвгIвы, апублицист БЕБИЯ Екатерина, Абхаз къральыгІва университет арыпхьагІвчва САКАНИЯ Гунда, ЧХАМАЛИЯ Алхас, АНКВАБ Ахра йгьи астудентква, хІреспублика уагІахъа газетква рынхагІвчва, апхьахьаква, ажвлара уыснкъвгагІвчва, агІвгІвчва, ахабарргагаква ржурналистква. «Абазашта» газет аредактор хъада Къвыл Фардауыс анйара гІахъылтІуата Багапш Сергей хІуагІахъа пІатІу ду шйыквырцІуз, гІвычІвгІвыс црита дшырпхьадзуз гІалылкІгІатІ. – Сергей Василий йпа Къарча-Черкес дангІайрыз «Абаза» жвлара организация, «Апсны» автоколонна, «Абазашта» газет аредакция дырнамшылуата зынгьи йгьагІвйымщтуазтІ. Ауи Абхазия йайсыз аветеранква, айсра йаладзыз хІхаквлагІвчва ран-рабачва дрынйарныс йанакІвызлакІгьи заман гІайауан. Ауат анйараква швабыж пхата йакІвшалун. УахьчІва йгІайззаз зымгІва Багапш Сергей йыхьыз хІызтлапІапІ, – лхІватІ Къвыл Фардауыс. Абхаз Республика йгІвыджьхуз апрезидент Багапш Сергей дкъральыгІва уыснкъвгагІвын. Абхазия хъахвитра анайау угІалагата а-Правительства апны йапшым аъанатІаква йымата дынхатІ, гІван Абхаз Республика дапрезидентта далырхтІ. Асквш 1992 агІан Багапш Сергей Абхаз АССР аминистрква р-Совет апредседатель йапхъахауа дизаместительын. Агрузин-абхаз айсра ангІалага грузин тгІачвата жвабапхьадзара СогІвым йтыцІырныс рылйыршатІ, ауи ахъазла агрузинква ртланыкъва, йалкІгІата Грузия знапIыцІаз Шеварднадзе Эдуард, йрачважвуз йара йакІвын. Айсра ъадзакІвшуз асквшква руацІа Абхазия абджьарла, хыхъвшвла, былчІвыла, медикаментла, фачІвыла радгалра хъвдаквцІарата йыман. ГІвадахь Россия йгьи Лагъь КІавкІаз йтыцIта дара ртахъырала айсра йпшцIаз дрыдынхалуан, агрузин-абхаз апшIагылра мамырла йалгара ахъазла айчважвараква дрылан. – Азаман мгІвайсуаштІ, ауаса Сергей Василий йпа ауыжвгІанчІвикви ауат ртынхакви рхъмаштылра анцІрала далазлуштІ, Абхаз Республика ахъахвитра Россия Федерация швъала йрыбагъьата йанацнакI Багапш Сергей даунашвачпагІвта йшыншаз зынгьи йгьырхъаштылуашым. Бебия Екатерина йгІацІылщтыз акнига ахьызлагьи йгІаугвынгІвитІ дгІазквчважвауа агІвычІвгІвыс мгІвата йгІамидаз хъацІарала йшырчвыз, – йгIалылкIгатI Къвыл Фардауыс. Апсны йгIатыцIыз асасчва агIарайгвара ажваква рзынайырхатI Къарча-Черкес къральыгIва университет апроректор ПIаз Сергей. ЙшыгIдырхуа апшта, Багапш Сергей Абхазия апрезидентра ахъазла йгIванхауата алхраква данрылал, хIыштала йыззхъайцIаз ауагIаква ПIаз Сергейгьи дрылан. Ауи атлахан агIан Багапш Сергей заман айшысла дсцрихатI, – йгIаликIгIатI ПIаз Сергей йгIачважвара апны. – Йгьаъамма гIвычIвгIвыс зны ахIа дуымбаскIва дуаргванхауата?! Сара сыхъазла Багапш Сергей ауаса далтI. Ауи йызнымкIва Къарча-Черкес дгIайтI, хIышта аунашвачпагIвчва дрынйун. ЙалкIгIата, Россия аунашвачпагIвчва рпны Абаза район агIаныршара ауи йажва шакIву йацхърагIаз бзита йыгIдыритI йгьи йыгьхIхъаштылуашым. Ауи агIвычIвгIвыс пшдза йгIайыквчважвауа акнига апрезентация акIвыршара уахьчIва йадызгалыз «Абазашта» газет аредактор хъада Къвыл Фардауыс сылзыразпI. Абаза газет йанакIвызлакIгьи апшта, хIуагIахъа йырзацапшта, тшъазыркIкIуа тшгIвата йалитI, ауаса йанаъазара, акнига ахабар ажвлара йшрылалуаш ажва гьалам. Бебия Екатерина йгIацIылщтыз акнига напа 244 гIацIанакIитI. Ауи йанылтI урышв йгьи абхаз бызшваквала апхъанчIвиква рбзазара атурых, Багапш Сергей йсабихъа угIалагата дшгIабзазаз, баргвырата дгIазылсыз, йгвы змыртынчуаз, дзыргвыргъьуз агIаншараква, Абхазия даунашвачпагIвта йылшаз зымгIва. Ауи адуней анихIваджь йгIаквчважвауа «Абхазия в трауре» гIвыралагьи йгIаугвынгIвитI абхазква рыхъазла Багапш Сергей дшкъалаз, йджьабауа ауагIаква рсурат уыладзква гIамиуата уыгьзапшуам. – Сергей Василий йпа йгвбайара, рахIа йхъадахугьи, йгIвычIвгIвысагIара гIвына гьрымамызтI,– лхIватI Бебия Екатерина. – Ауи Къарча-Черкес швабыжта бзи йбун, абазаква айщчва црита йпхьадзун. Ауи ъанатIала дынхузтIхIва, йылшараква хIаракIызтIхIва, йхъа хвыцкIлагьи йыртшхъварныс дачвпхащун. ЙыздырхитI, йаба йыхъазла гIвыра срыхIазырырныс йшйымуыз. «Сара уахьчIвала акъраль снапIыцIапI, ауи гьангIалрым» гIасайхIвтI ауи агIан. Ауаса асквшква цата адуней йхIваджьырныс щарда йымахымкIва, йара-йара йынцIра-бзазара сахайыргIвазарныс шитахъхаз джьасщатI. АгIвычIвгIвыс щарда дшнамихуаш йдыритI анырхIвауа цIабыргызапI. Йаргьи Сергей Василий йпа йбзазара йауата йгIасайхIвырныс дызхадзахыз акIвпI акнига йащатахаз. «ЗакIгьи бахъымгвыргIван, зымгIва бзихуштI» – йажваква ужвы йъагIадзазгьи слымхIа йтгаркIвитI. Ардзынба Владислав йапшта, Багапш Сергейгьи марата дыгIбун. «Абазашта» газет аредактор, аредакция анхагIвчва, йгIайззаз ауагIа уахьчIва хIгвтараква швыцагIвхIшарныс ъахIылшвыршауа ахъазла хIшвзыразпI. Багапш Сергей дшполитик дууыз, дшдипломатыз, й-Абашти йуагIахъи бзи йшибуз, гвылагьи псылагьи ауат дшрызцIабыргыз, азаман дапхъанысуата Абхазия ахъахвитра къалата дшазгылаз лхIвауата дгIачважватI Абхаз къральыгIва университет арыпхьагIв, ауысагIв Сакания Гунда. Ауи йшгIалылкIгIазла, йанатахъхара, ауагIахъа ззыхчуш Анчва дгIарититI. Багапш Сергей ауи йапшу дгIвычIвгIвысын. Ажва йазъазу Бебия Екатерина апхъагылагIв йтурасы абгата йылзыгIахътIтI. Ауи лкнига цхIа хьапщта абазакви абхазкви хIаднакIылуаштI. Анйара йалаз КЧР АуагIа Айззара адепутат, ареспублика УагIахъа библиотека адиректор Хапчаев СальыхI хIпарламент аделегация Абхазия йанца пхата йшгIарпылыз, Багапш Сергей йцри шта апны хвыта йыквырцIуз цIолата йшйылайхIваз гIайгвалашвахтI йгьи ауи йгIайыквчважвауата акнига апрезентация абиблиотека апынгьи амаль амамкIва йшадыргалуаш йрыбагъьатI. Академик, агIвгIвы, «Апсны» транспорт нхарта знапIыцIу Этлыхв Олег йынбжьагIв цIабыргы пхата дгIайгвалашвахуата асквш 2011 агIан адуней йачвыдзыз йагъьыз ауагIаква рпны Багапш Сергей йыхьыз апхъадзата йшану гIаликIгIатI. – Сергей Василий йпа адуней йхIваджьта даныцIахIцIуз амш аквашуа йашIамсуа йгIакватI. СогIвым утыцIта ауи дъагIгахуаз йцри кыт Джьгьардадза дугьи хвыцгьи ахIврапшдзаква рнапIыцIакIта, амгIва аурала агIвытланыкъвакIлагьи йгылата днардастI. Ауи агIвычIвгIвыс пшдза Апсны йахъазымкIва, Россия аунашвачпагIвчва хвду йыквырцIун. ЙыздырхитI, Абаза район агIаныршара уыс аквыргъвгъварахата Москва хIанца, РФ а-Правительства а-Председатель Багапш Сергей Василий йпа тшгIайзынайырхауата йгIайайхIвыз: «ХIара хIыхъазла уажва Сталин йунашва йапшпI». Ауи акIвпI йаргьи Багапш Сергей «ауагIа рпрезидент»- хIва йызйыпхьуз, – йгIаликIгIатI Этлыхв Олег. Айззара апны йгIачважваз апхьахьа, ажвлара уыснкъвгагIв Гвана Муминат, КЧР-ла гIатгара зму ажурналист ЧкIала Георгий, абхаз айсра аветеранква – «Черкес хэку» газет аредактор хъада ТхIагъапса Уывжыкъва йгьи Багапш Сергей «Орден Леона» медаль гIазквнайыргаз Ашба Роберт, «День Республики аредактор хъада Кратов Евгений ауагIахъаква ращтаныкъвара магIныта йаму, ауи йазгылаз агIвычIвгIвыс бергьльы Багапш Сергей щта пшдзата йгIанижьыз Бебия Екатерина лкнига апны йшгIахъылтIуа рхIватI. «Багапш Сергей йапшкву ауагIахъаква гIащаквхарныс акIвпI йызгIаншауа. Ауи йзынархата уахьчIва хIызлу анйара атахъдзапI. Уачвыхъарата айгвара гьгIаубжьашвушым, хIанйалауа, гвхътIыла хIайчважвауа хIаъазтын акIвпI Багапш Сергей йшитахъыз апшта ауагIахъаква хIацзакIыра анхIзыгIарбуш», – йхIватI Кратов Евгений. Абхаз къральыгIва университет астудентква рыхьызла йгIачважваз Матуа Ратха Багапш Сергей Василий йпа Апсны йазитахъыз дара йшнадырдзахуаш лрыбагъьатI.
372 просмотров


Комментарии

Написать
Комментарии >



Подписывайтесь на RIAKCHR в Одноклассниках Получайте свежие статьи и новые публикации на свой мобильный
Вступайте в сообщество RIAKCHR в “ВКонтакте” Получайте свежие статьи и новые публикации на свой мобильный
Вступайте в сообщество RIAKCHR в “Telegram” Получайте свежие статьи и новые публикации на свой мобильный