АБАЗАКВА РТУРЫХ ГIАЩАКВЫРГЫЛХРА КЪАРУ ЩАРДА АЛАЗЦIАЗ АПХЬАХЬА

бергьльу акIавкIазрдырыгIв, абаза уагIахъа дрыуата аистория наукаква йырдокторхаз йапхъахауа аэтнолог, Къарча-Черкес Республикала гIатгара зму анаука анхагIвы, наука нархара зму йагъьу акнигаквала а-Всероссийска анкъвакъвра алауреат, Абаза район агерби абаракъи равтор ТХIАЙЦIЫХВ Михаил Семен йпа арат амшква сквш 70 йрыцкьатI. Сквш хынгIважви жваба йыгьныбыжь хвыцым, щтахьла утхъахта агIвычIвгIвыс йынцIра-бзазара шгIамгIвайсыз, дахIврата дыззынадзаз уаквчважварныс уархвититI. ТхIайцIыхв Михаил Псыжв кыт апны дгIадзынгылтI. Йаба Семен Шумахва йпа амилиция органква дрылан, алейтенант ахIба йчын йымата хIабльа инспекторта дынхатI. Йан Лиза ЧугIайыб йпхIа арепрессия йалашваз атгIачва дрыуапI, гIапсара щарда лхътыстI. Ага ауаса йаъазтынгьи, абзазара дазгIашыкъын, библиотека нхагIвыта дапхьан, сквш 30 айхIа Псыжв кыт абиблиотека дынхатI, ауи унашва ахъылцIатI. Михаил Семен йпа Псыжв кыт аквтанай апхьарта дангIалга Урал апны ар къвырльыкъвхара дахъыстI. Асквш 1972 агIан Ставрополь къральыгIва педагогика институт аистория-филология факультет дыцIалтI. ДангIалга Гулиа Д. И. йыхьыз зхъу Абхазия анаукархъвыхра институт дынхарныс ддрайгватI. Йара ауи асквш МГУ аистория факультет гIвысквшала дапхьарныс дырщтитI. Ауи амщтахь йара ауаъа аспирантурагьи дыцIалтI. Анаука нхара тшадызкIылыз аисторик асквш 1985 агIан «Этнокультурные связи абазин в XIX– начале XX» темала кандидат нхара йхчатI. Ауаъа йгIашIарышвта аистория наукаква ркандидат анаука мгIва дыгьтымцIтI. Абхазия анаука-рхъвыхра институт апны асквшква 1985–1992 рагIан лаборантта, уадыргIвана наука нхагIвы ахIбата дынхатI. Ауи йацйырцауата Абхаз къральыгIва университет апны апхъанчIви дуней аисторияла лекция дгIапхьун. ТхIайцIыхв Михаил асквшква 2002–2005 рагIан Ломоносов М.В. йыхьыз зхъу МГУ аистория факультет апны доктор диссертация хчара тшазирыхIазыртI. Асквш 2005 агIан «Абазины на Северном Кавказе и в Турции (XVIII–XX вв.)» темала дахIврала доктор диссертация йхчатI. Ауи асквш 2007 йгIашIарышвта агуманитар рхъвыхраквала Къарча-Черкес институт апны дынхитI, аистория йгьи КЧР ауагIахъаква рхъвшара даунашвачпагIвын, уахьчIвала абаза хъвшара апны днаука нхагIвы хъадапI. Аинститут апны анхара йацйырцауата йхIаракIу апхьартаква рпынгьи дарыпхьагIвпI. Апхьахьа кIавкIаздырыгIв йнаука уысхара йалкIгIата йыззынарху апхъанчIви заман йгIашIарышвта абазаква ртурых рдырра, йгIащаквыргылхра акIвпI. Асквш 2003 агIан ауи Трыкв апны абаза мхIаджьырква ртынхаква ъабзазауа акытква рпны наука-этнография экспедиция даъан. Россия атурых апны йапхъахауата ауи апш рхъвыхра ТхIайцIыхв Михаил йакIвйыршатI. Ауи амщтахьгьи гIван Трыкв дцатI – асквш 2005 йгьи асквш 2011 рагIан. Йшалу абазаква ъабзазауа кытта 49 дгIархъыкIвшатI йгьи йазикIкIыта йырхъвыхыз ашвъаквала акнига джьащахъваква гIацIищттI – «Турецкие абазины» йгьи «Через Босфор к абазинам – потомкам махаджиров». Ауат йгIарыквчважвауа агIвыраква «Абазашта» газетгьи йгIаквшватI. Акнигаква Ломоносов М.В. йыхьыз зхъу МГУ аистория факультет аэтнология кафедра абиблиотека афонд йаланакIитI, «Этнография народов России в сопредельных странах» йгьи «Этнология народов Кавказа» курсква йгIарыпхьауа йгIадрысабапитI. АкIавкIазрдырыгIвчва йшгIалыркIгIазла, акнигаква йрыщатахаз аэкспедиция агIарбараква ауыжвгIанчIви наука рхъвыхраква рыхъазла рмагIны дупI, адуней наука апны йрыквчважвитI. ЙагIвсыз асквш агIангьи апхьахьа Иордания йгьи Египет рпны экспедиция даъан. МызкIыла ауи абазаква дрынйатI, драчважватI. Россия атурых аурала йапхъахауата МарагIацIцIырта Аргваны акъральква рпны ауи апш наука-этнография рхъвыхра адызгалыз ТхIайцIыхв Михаил йакIвпI. УахьчIва ауаъа йгIазикIкIыз ашвъаква дрыдынхалитI. ТхIайцIыхв Михаил ажвлара уысквагьи джьгарта дрылапI.ХIкъраль апны апсахраква ангIаджвыквыл йагIвсыз асквшышв асквш 90-ква йгIашIарышвта абазаква уыста йгIащтIырхлакIгьи аквта далагылата дгIамгIвайситI, Абаза район гIаныршара ацIыхъва йтагылаз дрыуапI. Асквш 1989 агIан йакIвшаз абазаква йапхъахуз рсъезд апны хIуагIахъа уысква йхътIыта ауатыкв йгIатайцIатI, Абаза район гIаншанадзыкIьара административна квта хIымазлара шатахъула дгIамчважвауата съездкIгьи гьакIвымшатI, ауи йазынархата гIвброшюракI гIацIищттI, ажвлара хабарргагаква рпны йгIвыраква гIаквшватI. Апхьахьа абазаква руысква ауатыкв йъагIатайцIуз ауат асъездква рпны йгьахъазым. Асквш 1999 агIан Россияла йапхъахауата Москва апны йакIвшаз «Коренные малочисленные народы России на пороге XXI века: проблемы, перспективы, приоритеты» конгресс далан. Ауаъа «Этнокультурные и этнополитические проблемы абазин на пороге XXI века» темала дгIачважватI. Асквш 2000 агIангьи Москва апны РФ а-КъральыгIва Дума ауагIахъа уысквала акомитет йаднагалыз апарламент аквчважвараква рпны «Об этнополитической ситуации абазинского народа в новейшее время» темала ажва йыман. Асквш 2013 агIан Брюссель йакIвшаз Европарламент алачIвара апны ТхIайцIыхв Михаил йгIачважвара ауи аъара йрымаджьащахъвахан, йцIасмызтынгьи, йгIванхауата ажва йырттI. ТхIайцIыхв Михаил жвасквша айхIа абазаабхаз уагIахъа р-Дуней Ассоциация (уахьчIвачIви ВААК) аисполком далан. Асквшква 2011–2012 рагIан абазаква Египет йгьи Сирия апны йыншуз йгIалцIла Москва йту КIавкIаз ауагIахъаква рдиаспора ахIварала РФ а-Президент й-Администрация ахъазла наука щата амата абазаква ртурых ъагIайырбаз швъа йгIвытI. Апхьахьа йнаука йгьи йыжвлара уысхара шабгу газет гIвыракIла йгьузыгIарбушым. Айшыста йухIвызтын, ауи книгата гIважва айхIа, уыжвгIанчIви заман апны абазаква рэтнополитика уысква дъагIарыквчважвауа аброшюраква йкъальам йгIацIцIтI. Акнигаква йрылапI йцри кыт Псыжв атурых, ауаъа ййыз агIвычIвгIвыс бергьыльква йгIарыквчважвауа «Аул многоликой России» гIацIщтра. СынчIвагьи адуней йгIаквылтI йкыт йазынарху «Абазины многонациональной России» книга. Апхьахьа йгIвыраква асквш 2011 йгIашIарышвта йагъьу анаука книгаквала анкъвакъвра апны йащтацауата быжьны йгIалыркIгIатI. Ауи педагогика дыррала анаукаква р-Дуней Академия, анаукаква р-Адыгьа (Черкес) Дуней Академия дрылапI, йыхьыз «Выдающиеся деятели науки и культуры современной России» энциклопедия ажвар, «Знаменитые люди Кавказа», «Абхазский биографический словарь» датшагьи рпны йаншвалтI. ТхIайцIыхв Михаил йнаука уысхара ртшхъвага щардала йгIалыркIгIатI. Ауат йрыуапI «Россия Федерацияла гIатгара зму анаука анхагIвы». Абхаз къральыгIва ахъахвитра щаквыргылра къарута йалайцIаз йгIалцIла Абхаз Республика а-Президент йунашвала «Честь и Слава» орден й-III- хауа астепень, «За отвагу» медаль гIайквнадыргатI. Апхьахьа, ажвлара уысхагIв бергьльы тгIачва гIальаматгьи йымапI. Ауи йхъапщыла Фариза Черкесск город ачымазагIвтара анестезиологии ареанимотологии рхъвшара сквшщарда даунашвачпагIвын, КЧР-ла гIатгара зму дайъазагIвпI. Рпа Шамиль дахIврала Ставрополь къральыгIва университет аэкономика факультет дгIалгатI йгьи Лагъь-КIавкIаз атаможня Унашвачпарта а-Минераловодск таможня апны дынхитI. Михаили Фаризи пхIата дырпхьадзитI рпа йгIайнатIахаз АгырбаргIа ртпхIа Анжела. АтгIачва шIа хгIвысабичва рагIзитI: Радмир, Дамир, Айнар. Абаду йшихIвауала, йрыхьызхуш анщаквдыргылуаз йгIаныцIуа бзибзи йазхъвыцтI. Араса Радмир «анасып гIазгуа» гIаныцIитI, Дамир – айха, айрышра, акъыль, Айнар анартква рфыр хъадаква дрыуапI. Ауат рабаду швапхата дырзалуа йшгIадзынгылуаш кьангьашра гьалам.