АЪАЧIВАГIАГIВЧВА РРЫХIАЗЫРРА ЙАЗХЪВЫЦИТI

Август а 8 КЧР Ажвлара палата апны агIвнабзазарта-коммунальна млыкврхIара анхагIвчва ррыхIазырра йапщылу абаргвыраква йъарылачважваз алачIвара акIвшатI. Ауи йалан КЧР Ажвлара палата апны йгIаныршу уыхварала, ЖКХ-ла, экологияла, апсабара хчарала йгьи аштаква раныргIалрала акомиссия апредседатель БАРКОВ Анатолий, уыхварали ЖКХ-ли КЧР аминистр йзаместитель БАТЧАЕВА Зульфира, арыпхьарали наукали КЧР аминистр лзаместитель КАРАСОВА Заира, «Деловая Россия» Россия жвлара организация КЧР-ла ахъвшара апредседатель ГВАНА Игорь, абзазагIвчва акоммунальна цхърагIараква дызрадзауа аорганизацияква ргIащтийыгIвчва, Черкесск йтагылу аъачIвагIа гIацIгартаква рынхагIвчва. Айззара йалаз йшгIалыркIгIазла, хIреспублика апны фатар щардала йалу атыдзква йшатахъу апшта йъархьымпшуа, акоммунальна цхърагIараква ъагъьрымчIвуа йгIарылцIуа ашшраква щардапI. Ари ауыс зымгIва рапхъа ауатыкв йгIатазгаз Барков Анатолий йшихIвазла, хIреспублика апны ЖКХ анхагIвчва рщарда зхачIвква нардзата йызмырхъйауа, айха апрысылра, дзы гIазкIылсуа атруба псахра йа датша рчIаджьра йазъазам ъачIвагIагIвчвапI. – Фатар щардала йалу атыдзква раъаща йахъпшылра атахъу дырра зму ЖКХ аъачIвагIагIвчва ракIвпI. Датша ъачIвагIа тшазызбжьаз щардагIвы нхара йгIарахвитI. Ауат рхъвдаквцIараква нардзата йъадмырхъйауа йгIалцIла уахьчIва хIызлачважвауа абаргвыраква гIаншитI. Асквш 2013 агIан РФ а-Правительства йщаквнаргылыз ЖКХ ахъазла аъачIвагIагIвчва зладрыхIазыруа афедеральна къральыгIва арыпхьара стандарт шIыцква (ФГОС) хIреспублика апны йшгIадрысабапуа, ЖКХ апны йынхуш аъачIвагIагIвчва шдрыхIазыруа уарыразуашта йгьаъам. ЙагIвсыз асквшква руацIа ЖКХ анхартаква рпны йынхуш аъачIвагIагIвчва дрыхIазырра ахъазла йхIаракIу апхьартаква, аъачIвагIа гIацIгартаква заджвгьи гьрымщтитI, – йхIватI Барков Анатолий. ХIреспублика апны фатар щардала йалу атыдзква уырчIаджьра ахъазла раъаща ззырхъвыхуаш, ари анархарала дырра цIола зму аъачIвагIагIвчва мачIыгIвдзапI, уахьчIвала чкIвыныргIа ауи аъачIвагIа йгьадрыпхьум. Барков Анатолий унашва зхъицIауа ЖКХ анхара хъпшылра ахъцIарала ареспублика Квта йшщаквнаргылызла, ЖКХ анхартаква процент 80 рпны аъачIвагIагIвчва радкIылрала, ауат ауыс йазыбжьарала ахачIвква нардзата йгьдырхъйум. – ЖКХ аъачIвагIагIвчва ррыхIазырра йазалху а-ФГОС шIыц хIкъраль жвсубъекткI рпны акIвпI йъагIадрысабапуа. ЗымгIвагьи йшыгIдыруа апшта, хIкъраль асубъектква рпны ЖКХ анхагIвчва адыркIылырныс РФ а-Правительства хачIвы лнахтI. Архъйара власть органква ауи дырхъйауата ЖКХ анхартаква рпны архъвыхраква акIвзыршуш, аъачIвагIагIвчва ррыхIазырра анзыргIалуаш координационна квта гьгIандмыршастI. Арат ауысква хIмырхъйакIва, ЖКХ апны йынхуш дырра цIола зму аъачIвагIагIвчва хIымрыхIазыруата абаргвыраква йыгьрылдзгIушым, – йгIаликIгIатI Барков Анатолий. Карасова Заира йшылхIвазла, уахьчIвала хIреспублика апны 9-нзкьыгIв йапшым аъачIвагIаква тшъарзырбжьауа арыпхьара нхартата гIважва нхитI. ЙхIаракIу арыпхьара нхартаква быжьба йнадзитI. Черкесск йаныргIалу атехнология колледж сынчIва йгIалгаз 25-гIв ЖКХ апны мастерта йзынхуштI. Ауат йрыуата 11-гIв рынхара джвыквырцIахьатI. – ХIреспублика аъачIвагIа гIацIгартаква рпны ащардагIв уыхвагIвта йапхьитI. ЖКХ апны аъачIвагIагIвчва шнамхъауа, ауат зрыхIазыруаш арыпхьагIвчва шмачIдзу апхьадзараква йгIадырбитI. ХIара апхъахьыла ари ауыс агъьызчIвуаш амальква шгIахIрысабапуаш хIазхъвыцитI. «Арыпхьара» уагIахъа проект йгьи «Апрофессионал шIаква» федеральна программа рыпкъ йтата асквш 2024-дза хIреспублика аъачIвагIа гIацIгартаква рымлыкв щата агъьхIчIвра атахъыпI, чкIвыныргIа йапшым аъачIвагIаква йъарзырбжьауа (50) уыжвгIанчIви ъамапсымала йадыгIгалуаштI. ЗъачIвагIадырра йалазырхIуш ЖКХ анхартаква ръачIвагIагIвчва шIаква ауат рпны тшырбжьарныс рылшуштI. ЧкIвыныргIа ЖКХ аъачIвагIаквала йапхьарныс ахъазла йхIаракIу апхьартаква рыцIалрагьи гватра азалхIхуаштI, анхартатыгIвчва хIрыцынхуштI, – лхIватI Карасова Заира. Батчаева Зульфира йшылхIвазла, ЖКХ гIаршIыцхра, апшцIаква раныргIалра, атыдзква капитальна рчIаджьра драдзара, зыгIвнабзазарта амуыхуа йрызпсахра нархараквала апрограммаква абзазара йаларжьитI. Ауат ауысква йрыцызкIуаш, апрограммаква рпны йгIарбу ахачIвква зырхъйуш аъачIвагIагIвчва йырзыбжапI. – УахьчIвала ЖКХ анхартаква рпны аъачIвагIагIвчва гвып унашва рхъызцIуш, рынхара адызгалуаш унашвачпагIвта 30-гIв – 40-гIв гьрызхъум. Ауи йахъазымкIва, асантехника апны угIалагата анхараква зырхъйауа мачIыгIвпI. Апхъала анхагаква рыма атыдзква йшгIархъыкIвшуз йапшымкIва, ужвы дзы гIауызщтуагьи, псабара газла йадызгалуагьи автоматикала йынхитI. Ажва ахъазла, атруба дзы, псабара газ ангIакIылсуа акомпьютер йгIанарбитI. Ауаса ЖКХ ашIыцраква гIалалитI. Ужвы абзазагIвчва дзыла, пхарала йадызгалуа, фатар щардала йалу атыдзква раъаща йахъпшылуа аорганизацияква йындырхуш ауыс йазычпу, дырра зму аъачIвагIагIвчва шIаква ррыхIазырра шхIрыласуаш хIазшвырхъвыц, – лхIватI Батчаева Зульфира. Айззара апны ЖКХ анхартаква, аъачIвагIа гIацIгартаква ргIащтийыгIвчвагьи гIачважватI, аъачIвагIагIвчва ррыхIазырра ауысла ргвгIанаграква рхIватI, агIвнабзазарта-коммунальна млыкврхIарта анхагIвчва бзиква агазетква йгIарыншвалырквын, телебарала йгIадырбарыквын, ршвапха гIазрысабапуаш чкIвыныргIа йшрылахIуш гIалыркIгIатI