1,8 миллиард сом джоярыкъды

Аллай бир ачха къоратырыкъды «ЕВРОЦЕМЕНТ груп» холдинг «Кавказцемент» завод бла аны болушчу санагъатларына этерик модернизациясын бардырыргъа.
Аны юсюнден айтылады Сочиде болгъан Россиячы инвестицион форумда КъЧР-ни Башчысы Темрезланы Рашид бла «ЕВРОЦЕМЕНТ груп» холдингни президенти Скороход Михаил къол салгъан келишиуде.
«Кавказцемент» заводда бу иш кесеклеге бёлюнюб бардырылады. Аны биринчи кесеги этилиб бошагъанды. Ол ишге 500 миллион сом инвестиция ачха джоюлгъанды.
Бусагъатда компания аны экинчи кесегин ишлей турады. Ол хайырланыугъа берилсе, предприятие бир сагъатха 153 тонна цементге зыгъырны эзерикди.
КъЧР-ни Башчысы Темрезланы Рашид, «ЕВРОЦЕМЕНТ груп» холдинг «Кавказцемент» заводда бардыргъан ишге уллу багъа бере: «Компания, уллу ачха джоя, белгилеген ишлерин джетишимли толтуруб барады. «Кавказцемент» завод Къарачай-Черкесияны эм уллу предпрятиелерини бириди. Ол неден да алгъа джергили экономиканы бегитген, джюзле бла адамланы тутхучлу айлыкъла бла баджаргъан предприятиеди. Аны бла да къалмай, холдинг мында тюрлю-тюрлю социал программаланы толтурургъа да къошулады. Ол себебден сиз «Кавказцемент» заводну ёсдюрюу бла аны модернизациясын бардыргъан ишигизде КъЧР-ни властларыны органларындан не тюрлю да джакълыкъ табханлай турлукъсуз», - дегенди.
Андан сора холдингни президенти Скороход Михаил, предприятиени джангыртыу ишле джетишимли баргъанларын чертиб сёлешгенди. Заводну проектин толусу бла толтурургъа энтда 1,8 миллиард сом джоюллугъун айтханды. Бусагъатда, дегенди ол, предприятиени газ поршенни тамалында ишлерик теплостанциясыны къурулушу барады. Ол битсе, 24,9 МВт электроэнергия бериб турлукъду. Электростанцияны оборудованиеси келтирилиб бошаб, аны баш корпусларыны монтажлары этилиб тебрегендиле.
Бютеулей да завод ишлениб бошаса, бусагъат заманны мийик излемлерине келишген иш орунла ачыллыкъдыла, цементни асыулулугъу бла производствону экологиясы мийик дараджалы боллукъдула. Республиканы ёсе баргъан излемин толтурурча бир цемент чыгъарыб да турлукъду.
Къарачай-Черкесияны Башчысы Темрезланы Рашид, кёб джылладан бери бизни республика бла хайырлы иш джюрютюулени къураб эмда мында къурулуш санагъатны ёсдюрюуге уллу юлюш къошуб келгени ючюн Скороход Михаилгъа «Къарачай-Черкес Республиканы махтаулу къурулушчусу» деген ат атаб, знагы бла документин берди. Скороход Михаил да Къарачай-Черкес Республиканы саугъаларын разы болуб алды.