«АФЫР ЙПАРТА» – ЙАГЪЬУ РЫХЪАЗЛА

Декабрь а 13 Черкесск город йаныргIалу й-11- хауа арыпхьара Квта апны «А-Фыр йпарта» ахьызта патриот нархара зму айззара акIвшатI. Ауи йалан КЧР АуагIа Айззара (а-Парламент) адепутат ГАНШИН Алексей, «Единая Россия» политика партия КЧР-ла ахъвшара а-Исполком аунашвачпагIв йхъвдаквцIараква зырхъйауа ДЖАМБАЕВ Руслан, «Апхьарта шIыц» партия проект ашIыпIа координатор, й-11-хауа арыпхьара Квта адиректор ЛЯШОВА Елена, апхьагIвчва, арыпхьагIвчва. Ляшова Елена айззара гIахъылтIуата йшылхIвазла, «А-Фыр йпарта» асабиква рпатриот бжьара йазынарху айззара «Апхьарта шIыц» «Единая Россия» политика партия апроект апкъ йтата йадыргалтI. – УахьчIва хIапхьарта й-3-хауа акласс апны Абашта айсра Ду агIан хI-Псадгьыл ахчара йазгылаз апартизан гвып ркомандир, а-Фыр ВОРОБЬЕВ Геннадий Максим йпа йзынарху апарта хIыргылуаштI. Ауи а-Фыр йынцIра-бзазара, айсра агIан хъацIара шгIайырбаз йгIарыквчважвауа хабар ангIвылапI, йсурат, йгIайквнадыргаз артшхъвагаква аныпI. Бзита йапхьауа, зхIаль пшдзу асабиква ракIвпI апарта йадзхъачIвуш, – лхIватI Ляшова Елена. Воробьев Геннадий асквш 1905 агIан Ярослав область, Шелепино город апны дйытI. Асквш 1921 агIан Ярослав апаровоз уыхвара завод апны йынхара джвыквицIатI. Ауаъа слесарьта, строгальщикта, фрезеровщикта жвсквша дынхатI. Воробьев Геннадий асквш 1930 агIан Иваново область апны аколхоз даунашвачпагIвта ддыргылтI. Ауаъа дшынхуз Москва а-Коммунист университет дыцIалтI. ЙхIаракIу апхьарта дангIалга Лагъь КIавкIаз нхара дгIарщтитI. Ставрополь край, Изобильна район «Передовой» совхоз анхара комитет дапредседательта асквш 1937 октябрьдза, уацIыхъван Пятигорск город йаныргIалыз апартия акрай комитет апны инструкторта йхъвдаквцIараква йырхъйатI. Асквш 1938 агIан Воробьев Геннадий Буденновск район апартия акомитет апны йапхъахауа секретарьта ддыргылтI. Ауи йунашва йацIаз арайон амлыкврхIартаква рдахIвраква рыхъазла акъраль акытмлыкврхIара гIарбараква йызнымкIва ддрайгватI. Воробьев Геннадий акытмлыкврхIара уысква рпны нхарала йдахIвраква гIалыркIгIауата асквш 1940 агIан «Знак почета» орден гIайквнадыргатI. Асквш 1940, мартI а 28 Коммунист партия аунашвачпагIвчва рунашвала сквш 35 зхъыцIуаз Воробьев Геннадий Черкесия ВКП (б) обком йапхъахауа секретарьта ддыргылтI. Ауи ареспубликала акытмлыкврхIара уысква гIащтIихуата ауагIа аргваныта дрыцынхун, акытква дгIархъыкIвшумца абзазагIвчва дрынйалун. Ауасамца черкес бызшвагьи ййырдыртI. Абашта айсра Ду агIан анамыцаква хIреспублика йангIатал Черкесск апны йадыркIылыз апартизан гвып дрылалтI. Буково хIабльа апны анамыцакви апартизанкви ралакшара апны Воробьев дызлаз айсыгIвчва щардагIвы гIарщытI. Апартизанква ангIакIвдырша гвып-гвып тшыршан, ащхъакваламца анамыцаква йырнапIыцIцIтI. Воробьев Геннадий дызлаз агвып Малка дзыгIв ахьыла Ар Къапщ айсыгIвчва йрызцарныс рмурадын. Ауаса, тшызрымчыз анамыцаква ауат йгIарпшIалтI, ауаъа алакшара чвгьа гIаншатI. Ари айбащра апны апартизанква Воробьев Геннадий, Мирошников Петр, Кобзев Федор датшагьи ачкIвынчва р-Псадгьыл рхчауата рхъа щтIарцIатI. Ауи анынша асквш 1942 октябрь агIан акIвпI. Ауат афырква рхъвадиква ъацIу уахьчIва йъагIадзаз йыгьгIармаустI. Воробьев Геннадий Максим йпа анамыцаква дырпшIагылата хъацIарата йгIайырбаз ахъазла Абашта айсра йапхъахауа степень а-Орден, «Партизану Отечественной войны» йапхъахауа степень амедаль шгIайквнадыргаз апхьарта апарта йанырцIатI. Ауи йхъмаштылра йазынархаз айззара апны апхьагIвчва Воробьев Геннадий йынхара-бзазара, айсра агIан анамыцаква дырпшIагылата хъацIара шгIайырбаз йауацIыхта йгIаквчважватI, апатриот ашваква рхIватI, ауысаква йгIарыпхьатI. Апхьарта адиректор Ляшова Елена йшылхIвазла, Воробьев Геннадий йпа Леонид асабиква рыгIзара-бжьара, рарыпхьара сквш 40 айхIа дазынхатI, Черкесск город й-11-хауа апхьарта дадиректорта чкIвыныргIа рпатриот бжьара къару ду алайцIатI. Ауи йайцIба Воробьев Юрий Черкесск город йаныргIалу АйгIайра Парк апны «Йымчвуа Амца» азыркIыз дрыуапI. – «Единая Россия» политика партия чкIвыныргIа рпатриот бжьара йазынарху апроект пхатшаква абзазара йаланажьитI. УахьчIва а-Фыр Воробьев Геннадий йхъмаштылра йазынарху айззарагьи ауат йрыуапI. Ари апхьарта апны асабиква хIкъраль атурых, айгIайра гIатызгаз рыхьызква рдыруата ргIадзныргылра, рарыпхьара къару алазцIауа зымгIвагьи сшвзыразпI, – йхIватI Джамбаев Руслан. Воробьев Леонид йпа йпхIа Наталья хI-Псадгьыл ахчара дазгылата зхъа щтIазцIаз лабаду йаба Геннадий йхъмаштылра йазынарху апатриот акция адызгалыз, анйара йгIадгылыз дшырзыразу лхIватI. Ауи лаща айззара дызгIадымгылызтынгьи, йгIачважвара знырцIаз авидео гIадырбатI. Айззара ацIыхъва йаннадза хвбагIвацала йапхьауа йхпахауа акласс апхьагIвчва Червонова Анна йгьи Вегелин Анна акласс апны йдыргылыз «а-Фыр йпарта» йадзхъачIвата апхьара сахIат джвыквырцIатI.